ຊຽງຂວາງ ຖອດຖອນບົດຮຽນວຽກຂ່າວສານສຶກສາ-ກີລາ

   ພະແນກສຶກສາທິການ ແລະກີລາແຂວງ (ສກຂ) ຊຽງຂວາງ ຈັດກອງປະຊຸມຖອດຖອນບົດຮຽນການຈັດຕັ້ງປະຕິບັດວຽກງານຂ່າວສານການສຶກສາ ແລະ ກີລາຂອງພະແນກປະຈໍາປີ 2018 ແລະວາງທິດທາງແຜນການ-ການ ເຄື່ອນໄຫວໃນຕໍ່ໜ້າ (2019) ໃນວັນທີ 16 ມັງກອນ 2019 ນີ້, ທີ່ຫ້ອງປະຊຸມພະ ແນກສຶກສາທິການ ແລະກີລາແຂວງ, ພາຍໃຕ້ການເປັນປະທານຂອງທ່ານ ທອງສີ ພັນທະວົງ ຮອງຫົວໜ້າພະແນກສຶກສາທິການ ແລະ ກີລາແຂວງ, ເຂົ້າ ຮ່ວມມີຫົວໜ້າ ຫຼື ຮອງຫົວໜ້າຫ້ອງການສຶກສາທິການ ແລະກີລາເມືອງ, ຫົວໜ້າຂະແໜງການທີ່ກ່ຽວຂ້ອງຂອງພະແນກ, ຜູ້ຮັບຜິດຊອບວຽກງານຂ່າວ ສານຂັ້ນເມືອງຂັ້ນໂຮງຮຽນທີ່ຂຶ້ນກັບພະແນກ, ຄະນະຮັບຜິດຊອບກອງປະຊຸມຕະຫຼອດຮອດແຂກຖືກເຊີນເຂົ້າຮ່ວມ.

  ທ່ານ ຄານສີສະຫວັນ ພົງພັກດີ  ວິຊາການຂ່າວສານພະແນກສຶກສາທິການ ແລະກີລາແຂວງໄດ້ກ່າວລາຍງານໃຫ້ຮູ້ເຖິງຈຸດປະສົງເປົ້າໝາຍຂອງກອງປະຊຸມແມ່ນເພື່ອທົບທວນ ແລະຕີລາຄາຄືນກ່ຽວກັບການຈັດຕັ້ງປະຕິບັດວຽກງານຂ່າວສານຂອງພະແນກສຶກສາທິການ ແລະກີລາແຂວງໃນໄລຍະ 1 ປີຜ່ານມາ (2018), ຜົນໄດ້ຮັບ,ຂໍ້ຄົງຄ້າງ ແລະຈຸດທີ່ຈະໄດ້ປັບປຸງແກ້ໄຂໃນຕໍ່ໜ້າ,ພ້ອມທັງຄົ້ນຄ້ວາປຶກສາຫາລືປະກອບຄໍາຄິດຄໍາເຫັນໃສ່ຮ່າງບົດສະຫຼຸບ,ຮ່າງແຜນ ການ-ການເຄື່ອນໄຫວໃນຕໍ່ໜ້າປີ 2019 ໃຫ້ມີຄວາມສົມບູນ ແລະເອກະພາບກັນ, ແນໃສ່ສ້າງໃຫ້ວຽກງານຂ່າວສານຂອງພະແນກມີຄວາມເຂັ້ມແຂງກາຍ ເປັນກະບອກສຽງທີ່ສໍາຄັນໃນການນໍາສະເໜີຂໍ້ມູນຂ່າວສານທີ່ໜ້າເຊື່ອຖືໄດ້ນອກຈາກນັ້ນ.ຍັງໄດ້ຍົກໃຫ້ເຫັນເຖິງຜົນງານການ ເຄື່ອນໄຫວວຽກງານຂ່າວສານ ຂອງພະແນກໃນໄລຍະ 1 ປີຜ່ານມາ (2018) ມີຜົນງານຫຼາຍດ້ານທີ່ສາມາດປະຕິບັດໄດ້ເປັນຕົ້ນແມ່ນລົງເກັບກໍາຂ່າວຕ່າງໆຢູ່ພາກສະໜາມໄດ້ 80 ກ່ວາຄັ້ງ, ຂຽນ ຂ່າວໄດ້ທັງໝົດ 122 ຂ່າວ, ຄັດຈ້ອນບົດຂ່າວເດັ່ນສົ່ງໃຫ້ສໍານັກພິມຂອງໜັງສືພິມຕ່າງໆເພື່ອນໍາອອກຂ່າວໄດ້ 102 ຂ່າວ, ນໍາເອົາຂ່າວໄປອ່ານຢູ່ສະຖານີວິທະຍຸກະ ຈາຍສຽງແຂວງຊຽງຂວາງ (ລາຍການສົ່ງເສີມການສຶກສາ) ໄດ້ທັງໝົດ 44 ຄັ້ງ, ລາຍງານຂ່າວສົດໃຫ້ສະຖານີວິທະຍຸກະຈາຍສຽງແຫ່ງ ຊາດໄດ້ 2 ຄັ້ງ, ໄດ້ຮັບຂ່າວຈາກເຄືອຂ່າຍຂ່າວສານຂັ້ນເມືອງ ແລະຂັ້ນໂຮງຮຽນ 46 ຂ່າວ ແລະ ເຂົ້າຮ່ວມຂະບວນການເຄື່ອນໄຫວວຽກງານຕ່າງໆທີ່ທາງຂັ້ນເທິງຈັດຂຶ້ນຕາມການມອບໝາຍໄດ້ສໍາເລັດ.

    ສໍາລັບທິດທາງແຜນການ-ການເຄື່ອນໄຫວໃນປີ 2019 ແມ່ນຈະສືບຕໍ່ເຄື່ອນໄຫວວຽກງານຂ່າວສານການສຶກສາ ແລະກີລາຂອງພະແນກສຶກສາທິການ ແລະ ກີລາແຂວງໃຫ້ເປັນປົກກະຕິ, ປະສານສົມທົບນໍາຄະນະພະແນກຂະແໜງການທີ່ກ່ຽວຂ້ອງຂອງພະແນກ, ຫ້ອງການສຶກສາທິການ ແລະກີລາເມືອງ, ເຄືອຂ່າຍຂ່າວສານຂັ້ນເມືອງ ແລະຂັ້ນໂຮງຮຽນເພື່ອໃຫ້ການເຄື່ອນໄຫວວຽກງານມີຄວາມສະດວກວ່ອງໄວ ແລະເປັນລະບົບຕໍ່ເນື່ອງ, ສຸມໃສ່ວຽກງານວິຊາສະເພາະກໍານົດການຂຽນຂ່າວໃຫ້ໄດ້ 338 ຂ່າວ, ໃນນັ້ນເຄືອຂ່າຍຂ່າວສານຂັ້ນເມືອງຂັ້ນໂຮງຮຽນຕ້ອງຂຽນຂ່າວໃຫ້ໄດ້ 288 ຂ່າວ, ລົງຊຸກຍູ້ສົ່ງເສີມວຽກງານ ຂ່າວສານຢູ່ຂັ້ນເມືອງ ແລະຂັ້ນໂຮງຮຽນໃຫ້ໄດ້ 2 ຄັ້ງຕໍ່ປີ, ມີການສະຫຼຸບຖອດຖອນບົດຮຽນການເຄື່ອນໄຫວວຽກງານຂ່າວສານເປັນແຕ່ໄລຍະເພື່ອປັບປຸງແກ້ ໄຂຂໍ້ຄົງຄ້າງໃຫ້ທັນເວລາພິເສດຈະໄດ້ກະກຽມຄວາມພ້ອມທຸກເງື່ອນໄຂເພື່ອຮັບໃຊ້ງານມະຫາກໍາກີລາແຫ່ຊາດຄັ້ງ ທີ່ XI ທີ່ແຂວງຊຽງຂວາງເປັນເຈົ້າພາບໃຫ້ເຕັມພາລະບົດບາດ.

   ໂອກາດດັ່ງກ່າວທ່ານ ທອງສີ ພັນທະວົງ ໄດ້ສະແດງຄວາມຊົມ ເຊີຍພ້ອມທັງຕີລາຄາສູງຕໍ່ກອງປະຊຸມເພາະເປັນພື້ນຖານໃຫ້ແກ່ການພັດທະນາວຽກງານຂ່າວສານຂອງພະແນກໃຫ້ກ້າວຂຶ້ນສູ່ອີກລະດັບ, ເພາະວຽກງານຂ່າວສານເປັນກະບອກສຽງ ແລະເປັນເສນາທິການໃຫ້ແກ່ພະແນກໃນການນໍາເອົາແນວທາງ ການພັດທະນາວຽກງານສຶກສາ-ກີລາຂອງແຂວງກໍຄືຂອງພະແນກພ້ອມທັງການເຄື່ອນໄຫວວຽກງານຕ່າງໆໃນຂົງເຂດສຶກສາ-ກີລາເຜີຍແຜ່ໃຫ້ສັງຄົມໄດ້ຮັບ ຮູ້ຢ່າງທົ່ວເຖິງ.

แชร์