ຈີນຊຸກຍູ້ອຸດສາຫະກຳເພື່ອຫຼຸດຜ່ອນ ຄວາມທຸກຍາກ

    ລັດຖະບານ ສປ ຈີນ ພະຍາຍາມຊຸກຍູ້ການພັດທະນາອຸດສາຫະກຳໃຫ້ເຕີບໃຫຍ່ຂະຫຍາຍ ຕົວຂຶ້ນເປັນກ້າວໆເພື່ອຫຼຸດຜ່ອນ ຄວາມທຸກຍາກ.ຕາມຂ່າວຕ່າງປະເທດລາຍງານວ່າກອງປະຊຸມຊຸກຍູ້ວຽກງານຫຼຸດຜ່ອນຄວາມທຸກຍາກດ້ວຍການພັດທະນາອຸດສາຫະກຳທົ່ວປະເທດຈີນໄດ້ຈັດຂຶ້ນຢູ່ນະຄອນກວາງ ຢວນແຂວງເສສວນໃນວັນທີ 1 ກັນຍານີ້, ທ່ານ ຮູຊຸນຮວາ ກຳມະການກົມການເມືອງສູນກາງພັກກອມມູນິດຈີນ ເນັ້ນໜັກວ່າ:ຕ້ອງລົງເລິກຜັນຂະຫຍາຍແນວຄິດສຳ ຄັນຂອງທ່ານເລຂາທິການໃຫຍ່ ສີ ຈິ້ນຜິງ ກ່ຽວກັບວຽກງານຫຼຸດຜ່ອນ ຄວາມທຸກຍາກ,ປະຕິບັດຕາມແຜນການທີ່ວາງໄວ້ກໍຄືນະໂຍບາຍຂອງສູນກາງພັກ ແລະລັດຖະບານ, ສຸມທຸກຄວາມພະຍາຍາມຊຸກຍູ້ການພັດທະນາອຸດສາຫະກຳໃຫ້ເຕີບໃຫຍ່ຂະຫຍາຍຕົວຂຶ້ນເປັນກ້າວໆ ເພື່ອຫຼຸດຜ່ອນຄວາມທຸກຍາກຢູ່ເຂດທຸກຍາກທັງເປັນການສະໜັບສະໜູນຢ່າງແຂງແຮງໃຫ້ປະຊາຊົນຜູ້ທຸກຍາກຫຼຸດພົ້ນອອກຈາກຄວາມທຸກຍາກຢ່າງໝັ້ນທ່ຽງ ແລະ ສ້າງຄວາມຮັ່ງມີຂຶ້ນເທື່ອລະກ້າວ. ທ່ານ ຮູຊຸນຮວາ ກ່າວວ່າ: ການຫຼຸດ ຜ່ອນຄວາມທຸກຍາກດ້ວຍການພັດທະນາອຸດສາຫະກຳເປັນນະໂຍບາຍພື້ນຖານໃນການເຮັດໃຫ້ປະຊາຊົນຫຼຸດພົ້ນອອກຈາກຄວາມທຸກຍາກຢ່າງໝັ້ນທ່ຽງ,ການພັດທະນາອຸດສາຫະກຳເພື່ອຫຼຸດຜ່ອນຄວາມທຸກຍາກຢູ່ເຂດທຸກຍາກໄດ້ຮັບຄວາມຄືບໜ້າເປັນຢ່າງດີ, ແຕ່ໃນດ້ານລວມແລ້ວຍັງຢູ່ໃນໄລຍະເລີ່ມຕົ້ນ ແລະຄົ້ນຄວ້າ, ຈຶ່ງຕ້ອງໃຊ້ມາດຕະການທຸກຢ່າງເພື່ອຊຸກຍູ້ໃຫ້ແຂງແຮງກວ່າເກົ່າ,ຄວນອອກແຮງພັດທະນາອຸດສາຫະກຳທີ່ມີເອກະລັກສະເພາະຢູ່ຊົນນະບົດຢ່າງມີຄຸນນະພາບ ແລະປະສິດທິພາບສູງ,ພັດທະນາຂະແໜງການປູກຝັງ ແລະລ້ຽງສັດຕາມສະພາບຕົວຈິງຂອງທ້ອງຖິ່ນ,ພັດທະນາຂະແໜງການປຸງແຕ່ງ ແລະຈໍລະຈອນຜະລິດຕະພັນກະສິກຳຕາມຄວາມຮຽກຮ້ອງຕ້ອງການຂອງການບໍລິໂພກໃນຂັ້ນສຸດທ້າຍ,ພັດທະນາຂະແໜງການໃໝ່ໂດຍອີງໃສ່ຊັບພະຍາກອນຊົນນະບົດ.

ຄວນເລັ່ງລັດພັດທະນາເສດຖະກິດຂັ້ນເມືອງໃຫ້ເຕີບໃຫຍ່ຂະຫຍາຍຕົວຂຶ້ນ,ອອກແຮງພັດທະນາອຸດສາຫະກຳທີ່ໃຊ້ແຮງງານຫຼາຍ,ເພີ່ມທະວີການດຶງດູດການລົງທຶນຂອງນັກທຸລະກິດ,ປະສານງານ ແລະປັບປຸງໂຄງປະກອບອຸດສາຫະກຳໃຫ້ດີຂຶ້ນໂດຍຖືເອົາເມືອງ ແລະຕາແສງເປັນຂອດສຳຄັນເພື່ອປັບປຸງລະບົບຈໍລະຈອນສິນຄ້າໃຫ້ສົມບູນຂຶ້ນ.

ພາບ ແລະຂາ່ວຈາກ:ໜັງສືພິມເສດຖະກິດ-ສັງຄົມ

• 04/09/2019