ເມືອງໂພນທອງ ເປີດສົກຮຽນໃໝ່

  ພິທີເປິດສົກຮຽນໃໝ່ສົກຮຽນ 2019-2020 ທົ່ວເມືອງ ໂພນທອງ ແຂວງຫຼວງພະບາງ ໄດ້ຈັດຂຶ້ນໃນວັນທີ 2 ກັນຍາ 2019 ຢູ່ເດີນໂຮງຮຽນ ມສ ໂພນທອງ ໂດຍການເປັນປະທານຂອງທ່ານ ສົມມາລີ ຄໍາເກັ່ງ ເຈົ້າເມືອງໂພນ ທອງ, ທ່ານ ສົມແພດ ພົມມະຈັນ ຮອງຫົວໜ້າຫ້ອງການສຶກສາທິ ການ ແລະກີລາເມືອງໂພນທອງ, ທ່ານ ພົງສະຫວັນ ອິນດາລັກ ຮອງອໍານວຍການໂຮງຮຽນ ມສ ໂພນທອງ ພ້ອມດ້ວຍສະມາຄົມພໍ່ແມ່ນັກຮຽນ,ພະນັກງານຄູ-ອາຈານຕະຫຼອດຮອດນັກຮຽນເຂົ້າ ຮ່ວມ.

ທ່ານ ສົມແພດ ພົມມະຈັນ ໄດ້ລາຍງານການຈັດຕັ້ງປະຕິບັດການຮຽນ-ການສອນສົກຮຽນຜ່ານມາແລະການກະກຽມໃຫ້ແກ່ສົກຮຽນໃໝ່ 2019-2020 ໃນທົ່ວເມືອງ ໂພນທອງ ມີໂຮງຮຽນທັງໝົດ 41 ແຫ່ງໃນນີ້ມັດທະຍົມຕອນປາຍ 2 ແຫ່ງ,ມັດທະຍົມຕອນຕົ້ນ 5 ແຫ່ງ,ປະຖົມ 37 ແຫ່ງ, ອະນຸບານ 9 ແຫ່ງ ແລະຫ້ອງລ້ຽງເດັກ 1 ຫ້ອງທົ່ວເມືອງມີນັກຮຽນທັງໝົດ 1,523 ຄົນ, ຍິງ 641 ຄົນ, ມີພະນັກງານ ຄູທັງໝົດ 212 ຄົນ, ຍິງ 90 ຄົນ,ໃນສົກຮຽນ 2018-2019 ຜ່ານມາອັດຕາເຂົ້າຮຽນຂອງເດັກ 3-5 ປີ ກວມ 50%, ອັດຕາເຂົ້າຮຽນ ເດັກອາຍຸ 5 ປີ ກວມ 83,21%, ອັດຕາເຂົ້າຮຽນສຸດທີ່ຊັ້ນປະຖົມ 95,66%, ອັດຕາການເຂົ້າຮຽນ ລວມມັດທະຍົມຕົ້ນ 70,71%, ມັດທະຍົມປາຍ 36,22% ປີຜ່ານ ມາ ສາມາດສົ່ງນັກຮຽນເກັ່ງເຂົ້າ ສອບເສັງແຂວງໄດ້ອັນດັບທີ 1 ຂອງແຂວງ ແລະລະດັບຊາດຊັ້ນ ມໍ4 ໄດ້ອັນດັບທີ 3 ຄືວິຊາຟິຊິກ ສາດ.

ທ່ານ ສົມມາລີ ຄໍາເກັ່ງຍັງໄດ້ຮຽກຮ້ອງໃຫ້ຜູ້ບໍລິຫານການສຶກສາທຸກຂັ້ນຕ້ອງເພີ່ມທະວີຄວາມຮັບຜິດຊອບຂອງຕົນໃຫ້ສູງຂຶ້ນ,ເປັນ ເຈົ້າການໃນກາເຄົາລົບນັບຖືປະຕິບັດລະບຽບກົດໝາຍໃຫ້ເຂັ້ມງວດ ແລະຍັງຮຽກຮ້ອງເຖິງນັກຮຽນໃນທົ່ວເມືອງຕ້ອງເອົາໃຈໃສ່ຄົ້ນຄວ້າດ້ວຍຕົນເອງໃຫ້ຫຼາຍຂຶ້ນ,ຮຽນໃຫ້ມີຄວາມຮູ້,ຄວາມສາມາດ,ຝຶກຝົນຫຼໍ່ຫຼອມຕົນເອງໃຫ້ກາຍເປັນນັກຮຽນທີ່ດີຂອງຄູ-ອາຈານເປັນຄົນດີຂອງພໍ່ແມ່ ແລະເປັນພົນລະເມືອງ ດີຂອງຊາດເພື່ອກຽມພ້ອມເຂົ້າໃນການປະກອບສ່ວນເຂົ້າໃນການປົກປັກຮັກສາ ແລະສ້າງສາພັດທະນາປະເທດຊາດໃຫ້ຈະເລີນຮຸ່ງເຮືອງ.

ພາບ ແລະຂາ່ວຈາກ: ໜັງສືພິມເສດຖະກິດ-ສັງຄົມ

แชร์