ທ່ຽວຊົມຖໍ້ານາງຫຼຽວ

  ຖໍ້ານາງຫຼຽວ ເປັນຖໍ້າທຳມະຊາດຖືກປົກຄຸມໄປດ້ວຍປ່າໄມ້ສີ ຂຽວອຸ່ມທຸ່ມສົດຊື່ນທີ່ເບັ່ງບານຕະຫຼອດປີ ເພາະມັນເປັນເຂດພູສູງ ແລະໝອກປົກຄຸມເກືອບຕະຫຼອດປີ,ພາຍໃນຖໍ້າອາກາດເຢັນ,ພື້ນຮາບພຽງດີ,ບາງບ່ອນເປັນຫີນງອກ ຕັ້ງຢູ່ສູງຊັນຂຶ້ນໄປດັ່ງຮູບທາດຢູ່ເພດານດ້ານເທິງເປັນຫີນຍ້ອຍ ໂຕ່ງໂຕ່ຍລົງມາ ຊຶ່ງຄົນທ້ອງຖິ່ນນີ້ເອີ້ນວ່າ:ນົມຜາ,ທີ່ຜາຜະໜັງ ຖໍ້າກໍ່ມີຫີນຍ້ອຍລົງມາເກາະຢູ່ຕາມຜາຜະໜັງຖໍ້າມີຫຼາຍຮູບຫຼາຍສີເຫັນແລ້ວສຸດທີ່ອອນຊອນເຫຼືອທີ່ຈະພັນລະນາໃນຄວາມງາມຂອງ ທຳມະຊາດສ້າງໄວ້ຖໍ້າມີຄວາມຍາວປະມານ 100 ແມັດ ຕັ້ງຢູ່ບ້ານປ່າຊາງ ເມືອງຄອບຫ່າງຈາກເທສະບານເມືອງຄອບປະມານ 22 ກິໂລແມັດ,ນັກທ່ອງ ທ່ຽວສາມາດໄປຊົມຄວາມງາມຂອງຖໍ້ານາງຫຼຽວໄດ້ໂດຍມີເສັ້ນທາງທີ່ໄປ-ມາໄດ້ສະດວກ.

ຕາມເຖົ້າແກ່ບູຮານເລົ່າສືບຕໍ່ກັນມາວ່າ:ເມື່ອກ່ອນມີພະຍາເມືອງ ຈຽງຕອງ ຊື່ວ່າທ້າວ ແສງເມືອງ ຊຶ່ງເປັນລູກຊາຍຜູ້ທີ 4 ຂອງພະຍາເມືອງຊຽແຂງ(ເມືອງວຽງພູຄາ ແຂວງຫຼວງນໍ້າທາ ໃນປະຈຸບັນ), ໃນເວລາຕໍ່ມາພະຍາເມືອງຜູ້ເປັນພໍ່ໄດ້ສິ້ນພະຊົນບັນດາລູກ ຊາຍຈຶ່ງເກີດຍາດຊິງຕຳແໜ່ງເລີຍເຮັດໃຫ້ບໍ່ຖືກກັນ,ທ້າວແສງເມືອງ ຈຶ່ງໄດ້ລ່ອງເຮືອລົງມາຕາມລຳແມ່ນໍ້າຂອງ, ມາເຫັນພູຜາທີ່ສູງຊັນ,ມີຖ້ໍາມີຮູທີ່ສວຍງາມ; ທ້າວ ແສງ ເມືອງ ຈຶ່ງເຕົ້າໂຮມບ່າວໄພ່ ລາດ ຊະດອນ ສ້າງຕັ້ງເປັນເມືອງຈຽງ ຕອງ (ປະຈຸບັນເອີ້ນວ່າຊຽງທອງ) ທີ່ຂຶ້ນກັບເມືອງປາກທາ ແຂວງບໍ່ ແກ້ວ.

ພາຍຫຼັງທີ່ທ້າວ ແສງເມືອງ ໄດ້ສ້າງຕັ້ງເມືອງຈຽງຕອງ ແລ້ວກໍ່ ໄດ້ຜູກມິດໄມຕີກັບເມືອງຂອມໄຂ (ເມືອງຄອບ ໃນປະຈຸບັນ),ພະຍາ ເມືອງຂອມໄຂໃນເວລານັ້ນມີລູກສາວງາມຄົນໜຶ່ງຊື່ວ່າ: ນາງ ຂຽວຄຳ, ທ້າວ ແສງເມືອງ ຕ້ອງການ ຢາກເອົານາງມາເປັນຄູ່ຮ່ວມຊີວິດ ແລະໄດ້ນັດນາງມາພົບຢູ່ຖໍ້າທົ່ງ ແລ້ງເປັນປະຈຳ,ວັນໜຶ່ງນາງ ຂຽວຄຳ ໄດ້ມາລໍຖ້າທ້າວ ແສງເມືອງ ຢູ່ຖໍ້າທົ່ງແລ້ງ, ແຕ່ວ່າທ້າວ ແສງ ເມືອງ ບໍ່ມາຕາມທີ່ໄດ້ນັດໝາຍກັນໄວ້,ນາງຈຶ່ງໄດ້ນັ່ງງອຍຢູ່ປາກ ຖໍ້າ ແລະຫຼຽວເບິ່ງຊາຍຊູ້ຈົນຕາເວັນຕົກດິນ ນາງຈຶ່ງຮ້ອງໄຫ້ອອກມາດ້ວຍຄວາມເສຍໃຈ, ດັ່ງນັ້ນ ຊາວບ້ານຈຶ່ງໄດ້ປ່ຽນຊື່ຖໍ້າທົ່ງແລ້ງມາເປັນຖໍ້ານາງຫຼຽວຈົນເຖິງປະ ຈຸບັນ.

ພາບ ແລະຂາ່ວຈາກ: ໜັງສືພິມເສດຖະກິດ-ສັງຄົມ

แชร์