ຈັບໂຈນທີ່ລັກຂ້າງົວ

  ເຈົ້າໜ້າທີ່ຕຳຫຼວດໜ່ວຍງານຄະດີອາຍາ ປກສ ເມືອງໝື່ນ ແຂວງຽງຈັນ ໄດ້ລົງແກ້ໄຂເປົ້າໝາຍເຄື່ອນໄຫວລັກຊັບພົນລະເມືອງໃນຂອບເຂດບ້ານໂນນຕ້ອງຊຶ່ງສາມາດກັກຕົວຜູ້ຖືກຫາລັກຊັບປະເພດງົວໄດ້ 1 ຄົນ ຊື່ທ້າວ ເຢ້ເຮີ ອາຍຸ 42 ປີຊາວນາຢູ່ບ້ານດັ່ງກ່າວຄັ້ງວັນທີ 16 ມັງກອນ 2019.

  ຜ່ານການສຶບສວນ-ສອບສວນ ທ້າວ ເຢ້ເຮີ ຮັບສາລະພາບວ່າ: ໃນວັນທີ 13 ພະຈິກ 2018 ຜູ້ກ່ຽວໄດ້ກະກຽມເອົາມິດ 1 ດວງ, ຄ້ອນຕີ 1 ອັນ, ຈົກ 1 ດວງ, ເກືອ 1 ຖົງນ້ອຍ ແລະ ໂຄມໄຟຈຸດປະສົ່ງແມ່ນຈະລັກງົວປະຊາຊົນຫຼັງຈາກນັ້ນຜູ້ກ່ຽວກໍ່ຍ່າງອອກຈາກເຮືອນໄດ້ປະມານ 20 ນາທີ ຈຶ່ງຮອດຄັງຈຸດຈະລັກງົວແລ້ວເອົາເກືອທີ່ກຽມໄປນັ້ນໃຫ້ງົວກິນຂະນະນັ້ນໄດ້ໃຊ້ຄ້ອນຕີທຸບຫົວງົວຈຳນວນ 3 ບາດ ເຮັດໃຫ້ງົວລົ້ມລົງຕາຍຄາທີ່.

  ຈາກນັ້ນຜູ້ກ່ຽວກໍ່ໃຊ້ມີດປາດເອົາຊີ້ນຂາຈຳນວນ 4 ຂາ ເພື່ອໄປຢ້າງໄຟໄວ້ກິນສ່ວນທີ່ເຫຼືອແມ່ນເອົາໄປຝັງດິນແລ້ວເອົາຝົດໄມ້ ແລະເຟືອງປົກໄວ້ເພື່ອປົກປິດຫຼັກຖານບໍ່ໃຫ້ເຈົ້າຂອງງົວຮູ້ຕໍ່ຈາກນັ້ນຜູ້ກ່ຽວກໍ່ເອົາຊີ້ນຂາງົວທັງ 4 ຂາ ຢ້າງໄຟກັບມາເຮືອນຮອດເຊົ້າມື້ຕໍ່ມາໄດ້ເອົາຊີ້ນໄປຂາຍໃຫ້ພີ່ນ້ອງຢູ່ບ້ານດຽວກັນຈຳນວນ 2 ກິໂລ ໃນລາຄາ 65 ພັນກີບ ສ່ວນທີ່ເຫຼືອແມ່ນຢ້າງໄວ້ກິນຢູ່ພາຍໃນຄອບຄົວຕົກມາຮອດວັນທີ 16 ມັງກອນ 2019 ອຳນາດການປົກຄອງບ້ານສົມທົບກັບເຈົ້າໜ້າທີ່ຕຳຫຼວດ ປກສ ເມືອງໜື່ນໄດ້ກັກຕົວຜູ້ກ່ຽວມາດຳເນີນຄະດີຕາມລະບຽບກົດໝາຍຂອງບ້ານເມືອງ.

  ເຈົ້າໜ້າທີ່ຕຳຫຼວດໜ່ວຍງານສຶບສວນ-ສຶບສວນກອງບັນຊາການ ປກສ ເມືອງໝື່ນໃຫ້ຮູ້ວ່າການກະທຳຂອງ ທ້າວເຢ້ເຮີ ແມ່ນມີເຈດຕະນາຊັບພົນລະເມືອງແທ້ຊຶ່ງການກະທຳດັ່ງກ່າວແມ່ນໄດ້ສ້າງຄວາມບໍ່ສະຫງົບ ແລະສ້າງຄວາມບໍ່ເປັນລະບຽບຮຽບຮ້ອຍໃຫ້ແກ່ສັງຄົມ ແລະຜິດຕໍ່ກົດໝາຍອາຍາມາດຕາ 231 ແຫ່ງ ສປປ ລາວ.

--------

ຂຽນໂດຍ: ພິໄຊຍະວົງ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์