ໄຂ້ຍຸງເພີ່ມຂື້ນເລື້ອຍໆ ທົ່ວປະເທດກາຍ 27 ພັນຄົນແລ້ວ

  ໄຂ້ຍຸງຍັງເປັນບັນຫາໜັກສົມຄວນທຳລາຍຊີວິດປະຊາຊົນລາວຂອບເຂດທົ່ວປະເທດ, ເນື່ອງຈາກສາເຫດຫຼັກຂອງການລະບາດຍັງແມ່ນການຖືເບົາຕໍ່ການປ້ອງກັນ, ຈຶ່ງເຮັດໃຫ້ສະຖິຕິທົ່ວປະເທດມີຜູ້ເປັນໄຂ້ຍຸງແລ້ວ 27 ພັນຄົນ, ສ່ວນການເສຍຊີວິດຍັງຢູ່ 55 ຄົນ, ໂດຍການເກັບກຳຮອດວັນທີ 28 ເຫັນວ່ານະຄອນຫຼວງວຽງ ຈັນຍັງໜ້າເປັນຫ່ວງສຸດ.

  ຈາກຂໍ້ມູນເປີດເຜີຍໃຫ້ຮູ້ຫຼ້າສຸດຮອດວັນທີ 28 ສິງຫາ 2019, ໃນຂອບເຂດທົ່ວປະເທດມີຜູ້ເປັນໄຂ້ຍຸງທັງໝົດ 27,16 ພັນຄົນ ແລະເສຍຊີວິດແລ້ວ 55 ຄົນ, ໂດຍສະເລ່ຍຈະເຫັນໄດ້ວ່າມື້ໜຶ່ງປະຊາກອນລາວເປັນໄຂ້ຍຸງບໍ່ຕໍ່າກວ່າ 100- 200 ຄົນຕໍ່ວັນ, ດັ່ງນັ້ນຈຶ່ງເຮັດໃຫ້ຕົວ ເລກໄຂ້ຍຸງສູງຂຶ້ນໄວວາພຽງໄລຍະບໍ່ພໍເທົ່າໃດເດືອນມານີ້ ແລະໃນນັ້ນ ນະຄອນຫຼວງວຽງຈັນ ກໍຍັງຈັດເປັນຈຸດທີ່ມີການລະບາດຫຼາຍກວ່າໝູ່ຮອດດຽວນີ້ມີແລ້ວ 6,5 ພັນຄົນ, ເສຍຊີວິດ 14 ຄົນ, ຮອງມາແມ່ນແຂວງສະຫວັນນະເຂດ ມີ 4,99 ພັນຄົນ, ເສຍຊີວິດ 20 ຄົນ, ຊຶ່ງຖ້າສົມທຽບລະຫວ່າງສອງແຂວງທີ່ມີປະຊາກອນອາໄສຢູ່ຫຼາຍ, ເປັນເຂດຊຸມຊົນເຮັດໃຫ້ຍຸງລາຍແຜ່ພັນໄດ້ງ່າຍທີ່ສຳຄັນຍັງຖືເບົາການເອົາໃຈໃສ່ປ້ອງກັນຕົ້ນຕໍແມ່ນການກຳຈັດໜອນນໍ້າຍຸງລາຍ, ເຖິງແມ່ນວ່າຜ່ານມາໜ່ວຍງານທີ່ກ່ຽວຂ້ອງໄດ້ເອົາໃຈໃສ່ໂຄສະນາເຜີຍແຜ່, ວິທີປ້ອງກັນໄຂ້ຍຸງລາຍ, ຈັດຂະບວນກຳຈັດໜອນນໍ້າຍຸງລາຍ,ສິດພົ່ນທຳລາຍບ່ອນອາໄສຂອງຍຸງຮ່ວມກັບຫຼາຍຝ່າຍຕະຫຼອດຮອດຊຸມຊົນທ້ອງຖິ່ນໄປແລ້ວ, ພ້ອມນັ້ນກໍຍັງມີ ແຂວງຈຳປາສັກ, ສາລະວັນ ແລະຄຳມ່ວນ ທີ່ຕົວເລກຜູ້ເປັນໄຂ້ຍຸງຍັງສູງຈາກການສະສົມມາຮອດປະຈຸບັນຈັດຢູ່ລະດັບ 3 ພັນກວ່າຄົນ, ສ່ວນແຂວງທີ່ບໍ່ໜ້າເປັນຫ່ວງແມ່ນແຂວງຜົ້ງສາລີ ແລະ ຫົວພັນຊຶ່ງມີຜູ້ເປັນໄຂ້ບໍ່ເຖິງ 10 ຄົນ, ນອກນັ້ນໃນບັນດາ 16 ແຂວງທົ່ວປະເທດຈັດວ່າເປັນແຂວງທີ່ໜ້າເປັນຫ່ວງ ແລະຄວນເຝົ້າລະວັງທີ່ສຸດເນື່ອງຈາກໄລຍະນີ້ຍັງຢູ່ໃນຊ່ວງລະດູຝົນ.

  ທ່ານ ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກເຄີຍກ່າວໄວ້ເມື່ອບໍ່ດົນມານີ້ວ່າ: ໃນໄລຍະຊ່ວງເດືອນກໍລະກົດ-ກັນຍາເປັນໄລຍະຂອງລະດູຝົນ, ແນ່ ນອນທຸກຂົງເຂດ ແລະທຸກພື້ນທີ່ບໍ່ສາມາດປາສະຈາກໄດ້ຕໍ່ກັບບັນຫານໍ້າອັ່ງ, ນໍ້າຂັງ ແລະ ນໍ້າຖ້ວມ, ຊຶ່ງພາຍຫຼັງນໍ້າບົກແຫ້ງຫາກບໍ່ມີການອະນາໄມຈຸດດັ່ງກ່າວຈະກາຍເປັນແຫ່ງເພາະພັນ ຂອງຍຸງລາຍ ຊຶ່ງເປັນສັດຕູທີ່ຮ້າຍແຮງໃນການທຳລາຍຊີວິດຂອງຜູ້ຄົນ, ສະນັ້ນທຸກຄົນຕ້ອງເປັນເຈົ້າການໃນການອະນາໄມເຮືອນຊານບ້ານຊ່ອງໃຫ້ມີຄວາມສະອາດບໍ່ໃຫ້ຮົກ, ຈຸດທີ່ມີນໍ້າອັ່ງ, ນໍ້າຄ້າງ ແລະຄິດວ່າຈະເປັນທີ່ພັກຂອງຍຸງຄວນທຳລາຍຖີ້ມ,ນອກຈາກອະນາໄມແລ້ວກໍຄວນເຝົ້າລະວັງບໍ່ໃຫ້ຍຸງກັດກໍເປັນການປ້ອງກັນຊະນິດໜຶ່ງເພື່ອບໍ່ໃຫ້ເປັນໄຂ້ຍຸງ, ເວລາເປັນໄຂ້ຄວນເຂົ້າໄປກວດກັບແພດໝໍ ແລະບໍ່ແນະນຳໃຫ້ຊື້ຢາມາກິນເອງເພາະຈະເປັນສາເຫດສ່ຽງຕໍ່ການເສຍຊີວິດໄດ້.

---------

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์