ເນື້ອທີ່ນາປີເຂດທົ່ງຮາບເມືອງເຊບັ້ງໄຟຖືກນໍ້າຖ້ວມກວມ 10 ບ້ານ

  ເລີ່ມແຕ່ວັນທີ 23 ສິງຫາ 2019 ລະດັບນໍ້າເຊບັ້ງໄຟໄດ້ຂຶ້ນສູງເຖິງ 17,39 ແມັດ ແລະ ໃນໄລຍະນີ້ນໍ້າຍັງບໍ່ສາມາດໄຫຼອອກໄດ້ຍ້ອນບັນດາຫ້ວຍສາຍພາຍ, ຫ້ວຍພອກ, ຫ້ວຍປາກາແມ່ນໄດ້ອັດປະຕູນໍ້າເຮັດໃຫ້ນໍ້າບໍ່ສາມາດໄຫຼເຂົ້າໄດ້ແຕ່ມາຮອດວັນທີ26 ສິງຫາ 2019 ລະດັບນໍ້າເຊບັ້ງໄຟສູງຂຶ້ນອີກເຖິງ 19,14 ແມັດ ເຮັດໃຫ້ນໍ້າໄຫຼເຂົ້າຕາມຫ້ວຍສາຂາທີ່ຍັງບໍ່ທັນມີປະຕູເປີດ-ປິດນໍ້າບວກໃສ່ນໍ້າໄຫຼໂຮມຢູ່ພື້ນທີ່ຕໍ່າຖືກຖ້ວມເປັນຕົ້ນແມ່ນເນື້ອທີ່ແຄມເຊບັ້ງໄຟ ແລະ ລຽບຕາມຫ້ວຍແມ່ນຖືກນໍ້າຖ້ວມເນື້ອນາໃນ 10 ບ້ານ ຂອງເມືອງເຊບັ້ງໄຟ ແຂວງຄຳມ່ວນ.  

ທ່ານ ຈັນທະໜອມ ນຽມມະນີວັນ ຮອງເຈົ້າເມືອງເຊບັ້ງໄຟໃນນາມປະທານຄະນະກໍາມະການຕ້ານໄພພິບັດຂັ້ນເມືອງ ແລະທ່ານ ພູທອນ ໄຊຍະວົງ ຫົວໜ້າຫ້ອງການກະສິກໍາ ແລະປ່າໄມ້ເມືອງໄດ້ເປີດເຜີຍຂໍ້ມູນຕໍ່ຜູ້ສື່ຂ່າວວ່າ: ໃນລະດູການຜະລິດເຂົ້ານາປີ 2019 ທົ່ວເມືອງມີເນື້ອທີ່ແຜນການປູກເຂົ້າ 8,4 ພັນເຮັກຕາ ໂດຍທົ່ວເມືອງສາມາດປັກດໍາຕົວຈິງໄດ້ 100% ຂອງເນື້ອທີ່ແຜນການໃນນີ້ເນື້ອທີ່ນາຫວ່ານ, ນາຢອດລວມມີ 3,36 ພັນເຮັກຕາ, ເນື້ອທີ່ນາດໍາ 5,04 ພັນເຮັກຕາ ໂດຍຈະຜະລິດເປັນສະບຽງອາຫານ 7,2 ພັນເຮັກຕາ ແລະຜະລິດເປັນສິນຄ້າ 1,2 ພັນເຮັກຕາ.

  ຢ່າງໃດກໍຕາມປະຈຸບັນມີເນື້ອທີ່ນາທີ່ຂຶ້ນກັບ 10 ບ້ານພາຍໃນເມືອງຊຶ່ງປະກອບມີ: ບ້ານຫາດຄໍາຮຽງ, ຍາງຄໍາ, ນາພອກ, ສົ້ມ, ຍາງໃຫຍ່, ຕຶງ, ບຶງຫົວນາ , ດົງໝາກບ້າ ແລະ ບ້ານໜອງບອນແມ່ນຖືກນໍ້າຖ້ວມ 780 ເຮັກຕາ ຊຶ່ງເທົ່າກັບ 19,45% ຂອງຈໍານວນເນື້ອທີ່ນາທັງໝົດໃນ 10 ບ້ານ ລວມມີ 2,3 ພັນຄອບຄົວ ແລະ 730 ຄອບຄົວຖືກຜົນກະທົບຕົວຈິງ ຊຶ່ງເຂົ້າທີ່ຖືກຖ້ວມແມ່ນເປັນເຂົ້າມານສ່ວນລາຍລະອຽດຂອງຄວາມເສຍຫາຍແມ່ນຍັງຢູ່ໃນຂັ້ນຕອນການກວດກາຕົວຈິງຂອງຫ້ອງການກະສິກໍາແລະປ່າໄມ້ເມືອງ.

  ທ່ານ ຈັນທະໜອມ ນຽມມະນີວັນ ໄດ້ກ່າວຕື່ມວ່າ: ປະຈຸບັນລະດັບນໍ້າເຊບັ້ງໄຟສູງກວ່າລະດັບນໍ້າຫ້ວຍ 1 ແມັດກວ່າຖ້າຫາກຝົນຍັງສືບຕໍ່ຕົກລົງມາ ແລະປະລິມານນໍ້າຫາກເພີ່ມຂຶ້ນອີກທາງເມືອງກໍ່ໄດ້ມີການແຕ່ງຕັ້ງຄະນະກໍາມະການຕ້ານໄພພິບັດຂັ້ນເມືອງ ພ້ອມນັ້ນກໍ່ຈະໄດ້ນໍາໃຊ້ໄດສູບນໍ້າກໍ່ຄືລະບົບປິດ-ເປີດແຕ່ລະຫ້ວຍເພື່ອສູບນໍ້າອອກ ຫຼື ລະບາຍນໍ້າລົງສູ່ແມ່ນໍ້າເຊບັ້ງໄຟ ພ້ອມທັງມີແຜນຮອງຮັບອື່ນໆເຊັ່ນ: ເຮືອ 19 ລໍາເພື່ອກຽມຍ້າຍຄົນ, ສິ່ງຂອງ, ສັດ ແລະເຄື່ອງຂອງໃຊ້ທີ່ຈໍາເປັນ.

---------

ຂຽນໂດຍ: ແດງສະຫວັດ ແສນພານິດ  

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์