ເກືອບ 20 ເສັ້ນທາງເມືອງໄຊທານີ ຈະຖືກສ້ອມແປງສຳເລັດທ້າຍປີນີ້

  ໄຊທານີ ເປັນເມືອງໜຶ່ງທີ່ໃຫຍ່ສຸດໃນບັນດາ 9 ເມືອງຂອງນະຄອນຫຼວງວຽງຈັນ ແລະຈັດໃນປະເພດເຄິ່ງຕົວເມືອງເຄິ່ງຊົນນະບົດ, ທັງເປັນເມືອງທາງຜ່ານກວມເອົາເສັ້ນທາງຫຼວງແຫ່ງຊາດຫຼາຍສາຍ,ໂດຍໃນປີຜ່ານມາກໍຄືປີນີ້ບັນດາເສັ້ນທາງສຳຄັນ,ເສັ້ນທາງສາຍຍ່ອຍ, ສາຍແຍກເຂົ້າບ້ານໄດ້ຮັບຄວາມເສຍຫາຍຈາກໄພທຳມະຊາດ, ຊຶ່ງຜ່ານມາກໍໄດ້ມີການແກ້ໄຂສຸກເສີນໄປແລ້ວຈຳນວນໜຶ່ງ ແລະຍັງເກືອບ 20 ໂຄງການເສັ້ນທາງຂອງເມືອງທີ່ຈະໄດ້ຮັບການສ້ອມແປງແກ້ໄຂໃຫ້ສຳເລັດທ້າຍປີນີ້.

  ທ່ານ ເພັດສົມພອນ ແສນສີ ຫົວໜ້າ ຫ້ອງການໂຍທາທິການ ແລະຂົນສົ່ງ (ຍທຂ) ເມືອງໄຊທານີ ໃຫ້ສຳພາດກັບ ທີມຂ່າວໜັງສືພິມເສດຖະກິດ-ສັງຄົມ ຜ່ານທາງໂທລະສັບວ່າ: ໃນປີຜ່ານມາ ກໍຄືປີນີ້ໄຊທານີ ເປັນເມືອງໜຶ່ງທີ່ໄດ້ຮັບ ຜົນກະທົບຈາກໄພທຳມະຊາດຫຼາຍສົມ ຄວນ ໂດຍສະເພາະແມ່ນບັນດາເສັ້ນທາງ ສຳຄັນຫຼາຍສາຍຖືກນໍ້າຖ້ວມ,ນໍ້າເຊາະເຈື່ອນ,ເສັ້ນທາງເປ່ເພຫຼາຍຈຸດ,ຊຶ່ງຜ່ານມາເມືອງໄດ້ໃຊ້ງົບປະມານຈຳນວນໜຶ່ງເພື່ອສ້ອມແປງແກ້ໄຂສຸກເສີນໄປແລ້ວຕົ້ນຕໍ 4 ເສັ້ນທາງຄື: ເສັ້ນ ທາງແຕ່ສາມ ແຍກໂຮງງານເບຍໄທເກີ້-ບ້ານໜອງໂນ, ເສັ້ນທາງແຕ່ບ້ານເວີນຄຳ-ຈະເລີນໄຊ-ໂພໄຊ, ເສັ້ນທາງ ແຕ່ປາກຊາບໃໝ່-ແສນອຸດົມ ແລະເສັ້ນທາງບ້ານແກ້ງໄຄ້-ບ້ານທ່າສົ້ມມໍ-ອຸດົມຜົນ, ດ້ວຍການໃຊ້ ລົດປັບໜ້າທາງ, ຖົມຂຸມໄປແລ້ວຄັ້ງໜຶ່ງ, ສ່ວນເສັ້ນທາງແຕ່ບ້ານໜອງວຽງຄຳ-ມຊ ປະຈຸບັນໄດ້ສຳເລັດກອງປະຊຸມປຶກສາຫາລືກັບຂັ້ນບ້ານ, ຂັ້ນ ມຊ ແລະໄລຍະຜ່ານມາກໍໄດ້ແກ້ໄຂສຸກເສີນໄປແລ້ວ ແລະໃນເດືອນຕຸລາທີ່ຈະມາເຖິງນີ້ຫຼັງສິ້ນສຸດຝົນກໍຈະເລີ່ມລົງມືກໍ່ສ້າງຄາດໃຫ້ສຳເລັດທ້າຍປີນີ້.

 ປະຈຸບັນຍັງຢູ່ໃນລະດູຝົນ, ດັ່ງນັ້ນບັນດາແມ່ນໍ້າຫຼາຍສາຍອາດຈະມີລະດັບນໍ້າຂຶ້ນ-ລົງບໍ່ປົກກະຕິ, ຊຶ່ງແນ່ນອນຈະສົ່ງຜົນກະທົບຫຼາຍຕໍ່ກັບເສັ້ນທາງເປ່ເພການສັນຈອນໄປ-ມາບໍ່ສະດວກ, ການ ແກ້ໄຂກໍເປັນໄປໄດ້ຍາກ ແລະຮ້າຍແຮງ ກວ່ານັ້ນອາດຈະກະທົບຕໍ່ກັບເຮືອນ ຊານບ້ານຊ່ອງ, ເນື້ອທີ່ທຳການຜະລິດຂອງພໍ່ແມ່ປະຊາຊົນ, ພ້ອມດຽວກັນນັ້ນ ບັນດາເສັ້ນທາງລ່ອງງື່ມ ຫຼືຜູ້ທີ່ອາໄສຢູ່ ລຽບງື່ມ ແມ່ນມີຄວາມສ່ຽງສູງຕໍ່ກັບການ ເຊາະເຈື່ອນຂອງຕາຝັ່ງ, ໂດຍດຽວນີ້ ກໍ ໄດ້ມີການແຈ້ງເຕືອນປະຊາຊົນເຂດຫ້ວຍ ອີຫຸມ ພາຍຫຼັງທີ່ທາງມີການເຊາະເຈື່ອນ ຍາວ 20 ແມັດ ແລະກວມເອົາໜ້າທາງກວ້າງ 2-3 ແມັດ, ຖ້າຫາກມີແດດແມ່ນຈະເລັ່ງແກ້ໄຂທັນທີ ແລະເພື່ອເປັນການ ກຽມຮັບມືກັບສະພາບໄພທຳມະຊາດທີ່ອາດຈະເກີດຂຶ້ນເມືອງໄດ້ສົມທົບກັບກຳລັງ ປກສ, ປກຊ ຈຳນວນໜຶ່ງຫາກມີເຫດສຸກເສີນຈະໄດ້ແກ້ໄຂຊ່ວຍທັນ ແລະ ໃນປະຈຸບັນ ເມືອງພວມເລັ່ງໃສ່ການອະ ນາໄມລວງຄອງຕາມຖະໜົນໄກສອນ ດ້ວຍການໃຊ້ລົດຈົກ ໂດຍປະຕິບັດມາແຕ່ວັນທີ 28-31 ສິງຫານີ້ ແລະ ສະເພາະວັນທີ 31 ເມືອງໄດ້ແຈ້ງໃຫ້ 104 ບ້ານ ທົ່ວເມືອງອອກແຮງງານລວມໂດຍເລີ່ມແຕ່ວົງວຽນດອນໝູນໄປຕາມສາຍທາງຕ່າງໆ ເພື່ອບໍ່ໃຫ້ນໍ້າຖ້ວມອັ່ງເວລາຝົນຕົກ.

  ທ່ານ ເພັດສົມພອນ ແສນສີ ໃຫ້ຮູ້ອີກວ່າ: ຄືຮູ້ໄຊທານີເປັນເມືອງທີ່ຈັດຢູ່ໃນປະເພດເຄິ່ງຕົວເມືອງ ແລະເຄິ່ງຊົນນະບົດ, ດັ່ງນັ້ນການແກ້ໄຂຈຶ່ງພົບຄວາມຫຍຸ້ງຍາກຕົ້ນ ຕໍດ້ານງົບປະມານ, ແຕ່ເຖິງຢ່າງ ໃດກໍດີ ເພື່ອຮັບປະກັນໃຫ້ບັນດາເສັ້ນ ທາງຕ່າງໆໄດ້ຮັບການແກ້ໄຂ, ເຮັດໃຫ້ ການສັນຈອນໄປ-ມາມີຄວາມສະດວກ, ເມືອງໄດ້ສຸມໃສ່ສ້ອມແປງແລະຟື້ນຟູ ເສັ້ນທາງຈຳນວນ 18 ໂຄງການຄື: ໂຄງການສ້ອມແປງ ແລະຟື້ນຟູທາງດິນ ແດງບ້ານດວງບຸດດີ, ທາງດິນແດງແຕ່ ປາກຊາບໃໝ່-ສົມສະໄໝ-ບ້ານນາຂາວ, ທາງດິນແດງບ້ານໜອງເຂັງ, ທາງດິນ ແດງ ແຕ່ສາມແຍກໂຮງງານເບຍໄທ ເກີ້-ບ້ານໜອງໂນ, ທາງດິນແດງ ແຕ່ ບ້ານປາກຊາບໃໝ່-ບ້ານແສນອຸດົມ, ທາງດິນແດງ ແຕ່ບ້ານດົງບັງ-ບ້ານນາ ພອກ, ທາງດິນແດງ ແຕ່ທາງເລກ 10, ບ້ານໂພນຄໍ້-ດວງບຸດດີ-ນາແຖ-ທ່າດິນ ແດງ-ທ່າຈຳປາ-ນາຕານ, ທາງດິນແດງ ແຕ່ທາງເລກ 10, ບ້ານທ່າງ່ອນ, ແກ້ງ ໄຄ້, ທ່າສົ້ມມໍ, ລາດຄວາຍ, ທາງດິນແດງ ຈະເລີນໄຊ-ໂພນໄຊ, ທາງດິນແດງເຂົ້າ ບ້ານຫາດວຽງຄຳ, ທາງດິນແດງແຕ່ບ້ານທ່າສົ້ມມໍ-ອຸດົມຜົນ, ທາງດິນແດງເວີນຄຳ-ສາມສະອາດ, ໂຄງການສ້ອມແປງຂົວນໍ້າເຄັມ, ສ້ອມແປງ ແລະຟື້ນຟູທາງແຕ່ບ້ານໜອງວຽງຄຳ-ນາທົ່ມ, ແຕ່ຕານມີໄຊ-ໂນນສະອາດ, ທາງດິນ ແດງແຕ່ທົ່ງມັ່ງ-ສຳບອນ-ໂພນແພງ, ສ້ອມແປງ ແລະຟື້ນຟູ ບ້ານປາກຊາບເກົ່າ, ໂຄງການສ້ອມແປງ ແລະຟື້ນຟູແຕ່ໂນນສະອາດ-ລາດຄວາຍ-ດົງບັງ, ຊຶ່ງບັນດາໂຄງການທັງໝົດນີ້ພາຍຫຼັງສິ້ນສຸດລະດູຝົນໃນເດືອນຕຸລາແມ່ນຈະເລີ່ມລົງມືສ້ອມແປງຄາດວ່າຈະໃຫ້ສຳເລັດພາຍໃນທ້າຍ ປີນີ້ ແລະນອກຈາກ 18 ໂຄງ ການທີ່ກ່າວມານັ້ນເມືອງກໍຍັງສຸມໃສ່ບັນດາເສັ້ນທາງອື່ນໆ ທີ່ເຫັນວ່າມີຄວາມຈຳເປັນ, ທັງນີ້ກໍເພື່ອແນໃສ່ເຮັດໃຫ້ການສັນຈອນໄປ-ມາມີຄວາມສະດວກຂຶ້ນ.

-------

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

แชร์