ມ່ວນຊື່ນບຸນຊ່ວງເຮືອທີ່ນະຄອນຫຼວງພະບາງ

  ເພື່ອຊຸກຍູ້ການສະເຫຼີມສະຫຼອງປີທ່ອງທ່ຽວລາວ-ຈີນ ວັນທີ 29 ສີງຫາ 2019 ນີ້ ນະຄອນຫຼວງພະບາງ ໄດ້ຈັດບຸນຊ່ວງເຮືອປະເພນີປະຈຳປີ 2019 ໃຫ້ກຽດ ເຂົ້າຊົມມີ ທ່ານ ອາຊາງ ລາວລີ, ທ່ານ ສົມສະຫວາດ ເລັ່ງສະຫັວດ ທີ່ປຶກສາຄະນະບໍລິຫານງານສູນກາງພັກ, ພ້ອມດ້ວຍການນຳຂັ້ນແຂວງ, ຂັ້ນນະຄອນ-ເມືອງ, ມວນຊົນທັງພາຍໃນ ແລະຕ່າງປະເທດຕາມແຄມຝັ່ງນໍ້າຄານ.

  ພິທີເລີ່ມແຕ່ຕອນເຊົ້າໄດ້ເຕົ້າໂຮມການນໍາພັກ-ລັດ ຊາວພຸດທະສາສະນິກະຊົນ, ແຂກທັງພາຍໃນ ແລະຕ່າງປະເທດ, ຕະຫຼອດຮອດປະຊາຊົນບັນດາເຜົ່າທຸກຖ້ວນໜ້າພ້ອມກັນໃສ່ບາດຢາດນໍ້າ ແລະປະກອບພິທີທາງສາສະໜາ, ຈາກນັ້ນໄດ້ມີການເຕົ້າໂຮມບັນດາເຮືອຊ່ວງທີ່ເຂົ້າແຂ່ງຂັນຢູ່ນໍ້າຄານເພື່ອດຳເນີນການແຂ່ງຂັນຢ່າງເປັນທາງການ.

ທ່ານ ຈັນສຸກ ພັນໂດລັກ ເຈົ້ານະຄອນຫຼວງພະບາງ ກ່າວເປີດພິທີຢ່າງເປັນທາງການວ່າ: ເປັນປະຈຳທຸກປີພໍຮອດມື້ແຮມ14 ຄໍ່າເດືອນ 9 ທີ່ຊາວຫຼວງພະບາງເມືອງມໍລະດົກໂລກໄດ້ຈັດໃຫ້ມີການຊ່ວງເຮືອປະເພນີເນື່ອງໃນໂອກາດບຸນຫໍ່ເຂົ້າປະດັບດິນ, ອັນເປັນປາງບຸນໜຶ່ງທີ່ໄດ້ສືບທອດກັນມາແຕ່ດືກດຳບັນ ແລະຍັງຄົງ ຮັກສາໄດ້ຮີດຄອງປະເພນີທີ່ເປັນເອກະລັກອັນດັ່ງເດີມພິເສດປີນີ້ໄດ້ຈັດໃຫ້ເປັນກິດຈະກຳສົ່ງເສີມການທ່ອງທ່ຽວລາວ-ຈີນ ເນື່ອງໃນໂອກາດປີທ່ອງທ່ຽວລາວ-ຈີນ 2019.

ບຸນຊ່ວງເຮືອປີນີ້ຄະນະພັກ-ອົງ ການປົກຄອງເມືອງໄດ້ມີການເສີມຂະຫຍາຍໃຫ້ກ້ວາງຂວາງໂດຍໄດ້ອະນຸຍາດໃຫ້ເຮືອຊ່ວງຈາກທ້ອງຖີ່ນອື່ນເຂົ້າຮ່ວມມາແຂ່ງຂັນ ແຕ່ຕ້ອງປະຕິບັດຕາມກົດລະບຽບການທີ່ຄະນະກຳມະການຈັດການແຂ່ງຂັນວາງໄວ້ໃນນັ້ນມີເຮືອຊ່ວງຈາກບັນດາບ້ານພາຍໃນນະຄອນຫຼວງພະບາງ, ຕາງໜ້າຈາກເມືອງອ້ອມຂ້າງ, ພິເສດແມ່ນມີເຮືອຊ່ວງຈາກນະຄອນຫຼວງວຽງຈັນ ແລະແຂວງໄຊຍະບູລີ ເຂົ້າຮ່ວມແຂ່ງຂັນທັງໝົດ 31 ລໍາ ໂດຍຈະແຂ່ງຂັນໃນຮູບແບບເສຍສອງຄັ້ງແລ້ວຄັດອອກພ້ອມທັງຈັດອັນດັບທີສ່ວນເຮືອທີ່ເສຍຄັ້ງໜຶ່ງແມ່ນສາມາດຊິງຂຶ້ນໄປເຖີງຮອບຊີງຊະນະເລີດ.

-----------

ຂຽນໂດຍ: ອາພຸດເດດ ບຸບຜາ  

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ 

• 30/08/2019