ດ່ານພາສີສາກົນນໍ້າພາວລາຍຮັບບໍ່ໄປຕາມແຜນ 8 ເດືອນເກັບໄດ້ 58,67% ຍ້ອນສິນຄ້າຕົ້ນຕໍຫຼຸດລົງ

  ນັບແຕ່ວັນທີ 1 ມັງກອນ ຫາວັນທີ 25 ສິງຫາ 2019 ດ່ານພາສີສາ ກົນນໍ້າພາວສາມາດຈັດເກັບລາຍຮັບເຂົ້າງົບປະມານໄດ້ 211 ຕື້ກວ່າກີບ ເທົ່າກັບ 58,67% ຂອງແຜນການປີ, ຊຶ່ງບໍ່ໄປຕາມແຜນການ, ສາເຫດຍ້ອນສິນຄ້າ ທີ່ເປັນລາຍຮັບຕົ້ນຕໍມີລັກສະນະຫຼຸດລົງເປັນຕົ້ນ: ການນຳເຂົ້້ານໍ້າມັນເຊຶ້ອໄຟຫຼຸດລົງ15 ລ້ານກວ່າລິດຄິດໄລ່ເປັນຄ່າພາສີ-ອາກອນ 36 ຕື້ກວ່າກີບ ແລະສິນຄ້າສ່ວນໃຫຍ່ໃນຮູບແບບສົ່ງເສີມການລົງທຶນ.

  ທ່ານ ແກ້ວວິລາ ທິບດາລາ ຮອງຫົວໜ້າດ່ານພາສີສາກົນນໍ້າພາວແຂວງບໍລິຄຳໄຊ ເປີດເຜີຍໃຫ້ຮູ້ວ່າ: ດ່ານພາສີສາກົນນໍ້າພາວປະກອບມີຫ້ອງການເຮັດວຽກ 2 ຈຸດຄື: ຈຸດຊາຍແດນ (505) ແລະຈຸດຫຼັກຊາວ (515)ປະ ກອບມີ 3 ໜ່ວຍງານ, 2 ດ່ານປະເພນີ  ແລະ ໜ່ວຍງານຄຸ້ມຄອງການແຈ້ງ, ໜ່ວຍງານກວດກາສິນຄ້າ-ເຄື່ອງຂອງ, ໜ່ວຍງານກວດກາພາຫະນະ ແລະຜູ້ໂດຍສານ.

  ປີ 2019 ດ່ານພາສີສາກົນນໍ້າພາວໄດ້ແຜນການຈັດເກັບລາຍຮັບເຂົ້າງົບປະມານ 360 ຕື້ກີບ, ແຕ່ຜ່ານການຈັດເກັບລາຍຮັບໃນ 8 ເດືອນປີ2019 ສາມາດປະຕິບັດໄດ້ 211,2 ຕື້ກວ່າກີບເທົ່າກັບ 92,63% ຂອງແຜນການແຜນ 8 ເດືອນ ຫຼື ເທົ່າກັບ 58,67% ຂອງແຜນການປີ, ຖ້າທຽບໃສ່ໄລຍະດຽວ 8 ເດືອນຂອງປີກ່ອນເທົ່າກັບ 89,47% ຫຼຸດລົງ 10, 53% ເທົ່າກັບ 24,8 ຕື້ກວ່າກີບ.

ລາຍຮັບສ່ວນໃຫຍ່ໃນການຈັດເກັບແຍກຕາມໝວດສິນຄ້າຕົ້ນຕໍເຊັ່ນ: ຄ່າຊັກພິເສດ, ນໍ້າມັນເຊື້ອໄຟ, ປະເພດພາຫະນະ ແລະສິ້ນສ່ວນ, ເຄື່ອງກໍ່ສ້າງ, ເຄື່ອງໃຊ້ໄຟຟ້າ, ເຄື່ອງອຸປະໂພກ-ບໍລິ ໂພກ, ສິນຄ້າອາຊຽນ (FromD), ສິນຄ້າສັນຍາສອງຝ່າຍ (From S), ສິນຄ້າຕິດຕົວຜູ້ໂດຍສານ, ຄ່າທຳນຽມຕ່າງໆ, ຄ່າທຳນຽມຄັງແຮ, ສິນຄ້າຕາມ ນະໂຍບາຍສົ່ງເສີມການລົງທຶນ, ສິນ ຄ້ານໍາເຂົ້າເພື່ອສົ່ງອອກຕໍ່ ແລະຈາກ ການປັບໄໝ-ຂາຍເຄື່ອງຮິບ ແລະອື່ນໆ.

ທ່ານຮອງຫົວໜ້າດ່ານພາສີສາກົນນໍ້າພາວກ່າວອີກວ່າ: ໂດຍລວມແລ້ວການຈັດເກັບລາຍຮັບໃນ 8 ເດືອນ ທຽບໃສ່ແຜນການປີບໍ່ໄດ້ຕາມແຜນການເນື່ອງຈາກວ່າສິນຄ້າທີ່ເປັນລາຍຮັບຕົ້ນ ຕໍມີລັກສະນະຫຼຸດລົງເຊັ່ນ: ນໍ້າມັນເຊື້ອ ໄຟການນຳເຂົ້້າຫຼຸດລົງ  15 ລ້ານກວ່າ ລິດຄິດໄລ່ເປັນຄ່າພາສີ-ອາກອນ 36 ຕື້ ກວ່າກີບໃນນີ້: ນໍ້າມັນກາຊວນຫຼຸດລົງ 11 ລ້ານກວ່າລິດຄິດໄລ່ເປັນຄ່າພາສີ-ອາກອນ 23 ຕື້ກວ່າກີບ, ນໍ້າມັນແອັດຊັງຫຼຸດລົງ  3 ລ້ານກວ່າລິດຄິດໄລ່ເປັນ ຄ່າພາສີ-ອາກອນ 12 ຕື້ກວ່າກີບ, ການ ນຳເຂົ້າໃນຮູບແບບສົ່ງເສີມການລົງທຶນເສຍອາກອນມູນຄ່າເພີ່ມ(ອມພ) 10% ຂອງໂຮງງານຄຳຮຸ່ງຫຼຸດລົງ 6 ຕື້ກວ່າກີບ.

 ແນວໃດກໍດີເພື່ອເຮັດໃຫ້ການຈັດເກັບລາຍຮັບເຂົ້າງົບປະມານແຫ່ງລັດທີ່ໄດ້ຮັບມອບໝາຍບັນລຸ 360 ຕື້ກີບ, ທ່ານ ແກ້ວວິລາ ທິບດາລາ ເນັ້ນຕື່ມວ່າ ຈະຕ້ອງໄດ້ເພີ່ມທະວີສຶກສາອົບຮົມການ ເມືອງ-ແນວຄິດໃຫ້ຖັນແຖວພະນັກງານ, ປັບປຸງແບບແຜນວິທີນໍາພາ, ວິທີເຮັດ ວຽກໃຫ້ມີຄວາມຖືກຕ້ອງ, ສອດຄ່ອງ ກັບລະບຽບກົດໝາຍ, ຕິດຕາມກວດກາການປະຕິບັດໜ້າທີ່, ກວດກາການເຄື່ອນໄຫວຂອງພະນັກງານ-ລັດຖະກອນຮັບປະກັນບໍ່ໃຫ້ເກີດມີປາກົດການຫຍໍ້ທໍ້, ເພີ່ມທະວີຄຸ້ມຄອງໃນການກວດກາສິນຄ້າ, ເຄື່ອງຂອງອອກ-ເຂົ້າຜ່ານດ່ານໃຫ້ມີຄວາມເຂັ້ມງວດ, ຮັບປະກັນຄວາມຖືກຕ້ອງ, ຄຸ້ມຄອງ, ຕິດຕາມກວດກາການຈັດຕັ້ງປະຕິບັດວຽກງານວິຊາສະ ເພາະຂອງພະນັກງານຢູ່ແຕ່ລະໜ່ວຍ ງານ, ດ່ານພາສີທ້ອງຖິ່ນ ແລະດ່ານພາ ສີປະເພນີ, ເພື່ອຮັບປະກັນການປະຕິບັດວຽກງານໃຫ້ມີຄວາມໂປ່ງໃສ, ບໍລິການວ່ອງໄວ, ເພີ່ມທະວີການຄຸ້ມຄອງຈັດ ເກັບລາຍຮັບຈາກການນຳເຂົ້າປະເພດສິນຄ້າ, ເຄື່ອງຂອງທີ່ລັດຄຸ້ມຄອງເປັນຕົ້ນເຊັ່ນ: ນໍ້າມັນເຊື້ອໄຟ, ເຫຼັກ, ສິນຄ້າ, ເຄື່ອງຂອງນຳເຂົ້າຮູບແບບສົ່ງເສີມການລົງທຶນໃຫ້ຖືກຕ້ອງຕາມລະບຽບການ ແລະ ນຳໃຊ້ໃຫ້ຖືກເປົ້າໝາຍໂດຍປະສານສົມທົບກັບປາຍທາງແຕ່ລະຄັ້ງເພື່ອຕິດຕາມ, ຄຸ້ມຄອງບໍ່ໃຫ້ເກີດມີການລະ ເມີດລະບຽບກົດໝາຍ, ສືບຕໍ່ເລັ່ງທວງບັນດາໂຄງການ,ກະຊວງ, ຫ້ອງການຂອງລັດ, ບໍລິສັດຕ່າງໆທີ່ຍັງຄ້າງຊຳລະຄໍ້າປະກັນ IM8 ໃຫ້ຮີບຮ້ອນປະກອບເອກະສານ, ມາຊໍາລະສະສາງໃຫ້ທັນຕາມເວລາ, ຕ້ານ ແລະສະກັດກັ້ນການລັກລອບສິນຄ້າໜີພາສີທຸກຮູບແບບ, ປະສານສົມທົບກັບອົງການການປົກຄອງທ້ອງຖິ່ນແຕ່ລະຂັ້ນ ແລະບັນດາຂະແໜງການທີ່ກ່ຽວຂ້ອງພາຍໃນດ່ານໃຫ້ກົມກ່ຽວພ້ອມທັງນຳໃຊ້ມາດຕະການຕໍ່ຜູ້ລະເມີດຢ່າງເຂັ້ມງວດ ແລະ ນຳໃຊ້ເຄື່ອງມືທີ່ທັນສະໄໝທີ່ມີເຂົ້າໃນວຽກງານພາສີໃຫ້ມີຄວາມສະດວກ, ວ່ອງໄວ, ໂປ່ງໃສ ແລະ ມີປະສິດທິຜົນສູງ.

--------

ຂຽນໂດຍ: ກະຊວງການເງິນ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์