ລູກຄ້າ 10 ທະນາຄານສາມາດໃຊ້ຕູ້ ATM ທະນາຄານເອຊີລີດາລາວ ຈຳກັດ

 ຜະລິດຕະພັນ Fintech ແລະດິຈິຕອລໄດ້ກາຍເປັນທີ່ນິຍົມຫຼາຍຂຶ້ນໃນຂະແໜງການທະນາຄານໃນລາວ, ທະນາຄານເອຊີລີດາລາວຈຳກັດ, ປະຊາທະນາຄານທີ່ທ່ານໄວ້ວາງໃຈ ແລະມີວິໄສທັດໃນການເປັນຜູ້ນຳໃນດ້ານທະນາຄານເພື່ອທຸລະກິດຂະໜາດນ້ອຍ ແລະ ຂະໜາດກາງໃນລາວມີຄວາມຍິນດີຕ້ອນຮັບ ແລະ ກຽມພ້ອມໂດຍອະ ນຸຍາດໃຫ້ບັນດາທ່ານທີ່ໃຊ້ບັດເອທີເອັມຂອງ 10 ທະນາຄານນຳໃຊ້ຕູ້ເອທີເອັມ 56 ໜ່ວຍຂອງທະນາຄານດ້ວຍຄວາມສະດວກວ່ອງໄວ ແລະມີປະສິດທິພາບ.

  ທະນາຄານ ເອຊີລີດາ ລາວ ຈຳກັດກໍ່ ໄດ້ເປັນໜຶ່ງໃນສະມາຊິກຂອງໂຄງການລະບົບບັດທະນາຄານຮ່ວມກັນ (LAPS) ຊຶ່ງເປັນລະບົບການເຊື່ອມໂຍງລະບົບເອທີເອັມຂອງແຕ່ລະທະນາຄານທີ່ເຂົ້າຮ່ວມເພື່ອໃຫ້ລູກຄ້າສາມາດເຮັດທຸລະກຳຜ່ານເອທີເອັມລະຫວ່າງທະນາຄານໄດ້.

  ຫຼັງຈາກສຳເລັດການພັດທະນາລະບົບການເຊື່ອມໂຍງລະບົບເອທີເອັມລະຫວ່າງທະນາຄານ ເອຊີລີດາ ລາວ ຈຳ ກັດ ແລະ 10 ທະນາຄານທີ່ເຂົ້າຮ່ວມໂຄງການນີ້, ທະນາຄານ ເອຊີລີດາ ລາວ ມີຄວາມຍິນດີຕ້ອນຮັບ ແລະອະນຸຍາດໃຫ້ຜູ້ຖືບັດຂອງທະນາຄານດັ່ງກ່າວຖອນເງິນສົດ ແລະກວດຍອດເງິນ ຫຼື ຂໍ້ມູນບັນຊີຜ່ານຕູ້ເອທີເອັມຂອງທະນາຄານເອຊີລີດາໄດ້ນັບແຕ່ວັນທີ 18 ສິງຫາ 2019 ເປັນຕົ້ນໄປ.

  ດັ່ງນັ້ນ, ລູກຄ້າທີ່ຖືບັດເອທີເອັມຂອງ 10 ທະນາຄານເຊັ່ນ: ທະນາຄານການຄ້າຕ່າງປະເທດລາວມະຫາຊົນ, ທະນາຄານພັດທະນາລາວ, ທະນາຄານສົ່ງເສີມ ກະສິ ກຳ, ທະນາຄານລາວ-ຫວຽດ, ທະນາຄານຮ່ວມພັດທະນາ, ທະນາຄານຫວຽດຕິນ, ທະນາຄານອິນໂດຈີນ, ທະນາຄານມາຣູຮານ ເຈແປນ ລາວ, ທະນາຄານ ອຸດສາ ຫະກຳ ແລະ ການຄ້າຈີນ ຈຳກັດ, ທະນາຄານແຫ່ງປະເທດຈີນຈຳກັດ ໂດຍສາມາດຖອນເງິນສົດ ແລະ ກວດຍອດເງິນຜ່ານຕູ້ເອທີເອັມຂອງທະນາຄານເອຊີລີດາ ລາວ ຈຳກັດ ໄດ້ຕະຫຼອດ 24 ຊົ່ວໂມງ.

  ຂະນະທີ່ປະຈຸບັນທະນາຄານເອຊີລີດາ ລາວ ຈຳກັດ ກຳລັງພັດທະນາລະບົບອື່ນໆອີກສຳລັບໂຄງການບັດທະນາຄານຮ່ວມກັນ ແລະ ຄາດວ່າຈະເປີດໃຫ້ນຳໃຊ້ໃນໄວໆນີ້ ນອກຈາກນີ້ທະນາຄານຍັງມີຫຼາກຫຼາຍຜະລິດຕະພັນໄວ້ຄອຍບໍລິການລູກຄ້າເຊັ່ນ: Mobile App” ເອຊີລີດາ ທັນໃຈ”, ເງິນຝາກສ່ວນບຸກຄົນ ແລະບໍລິສັດ, ສິນເຊື່ອເງິນດ່ວນສຳລັບທຸລະກິດຂະໜາດນ້ອຍ ແລະຂະໜາດກາງ,ສິນເຊື່ອສຳລັບທຸລະກິດຂະໜາດໃຫຍ່ທີ່ມີວົງເງິນກູ້ສູງເຖິງ 17 ຕື້ກີບ (ປະມານ 2 ລ້ານໂດລາ), ບໍລິການເບີກຈ່າຍເງິນເດືອນ, ບໍລິຫານເງິນສົດ, ໂອນເງິນພາຍໃນ ແລະຕ່າງປະເທດ.

  ທະນາຄານ ເອຊີລີດາ ລາວ ຈຳກັດ ດຳເນີນທຸລະກິດໃນ ສປປ ລາວ ມາໄດ້ 11 ປີ ໄດ້ຖືກຍອມຮັບໃນການເປັນທະນາຄານອັນດັບທີ 1 ໃນການສ້າງວຽກເຮັດງານທຳ ໃຫ້ແກ່ປະຊາຊົນລາວໃນຂະແໜງການດັ່ງກ່າວ.

--------

ຂຽນໂດຍ: ນໍ້າໜຶ່ງ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์