ເປີດໃຊ້ສູນບໍລິການປະກັນສັງຄົມ ແຂວງໄຊຍະ ຫຼັງໃໝ່

  ພິທີມອບ-ຮັບໂຄງການກໍ່ສ້າງສູນບໍລິການປະກັນສັງຄົມແຂວງໄຊຍະບູລີ ລະຫວ່າງກະຊວງແຮງງານ ແລະສະຫວັດດີການສັງຄົມ (ຮສສ) ໃນນາມເຈົ້າຂອງໂຄງ ການ ແລະບໍລິສັດລາວພີພີ ອຸດສາຫະກຳຖ່ານຂາວ ແລະກໍ່ສ້າງຈຳກັດຜູ້ຮັບເໝົາກໍ່ສ້າງໄດ້ຈັດຂຶ້ນໃນວັນທີ 27 ສິງຫາ ເຂົ້າຮ່ວມມີ ທ່ານ ຄໍາແພງ ໄຊສົມ ແພງລັດຖະ ມົນຕີກະຊວງ ຮສສ, ທ່ານ ນາງ ບຸນພັກ ອິນທະປັນຍາ ຮອງເຈົ້າແຂວງໄຊຍະບູລີ, ມີຫົວໜ້າກົມ, ຮອງກົມ, ຫົວໜ້າ, ຮອງຫົວໜ້າພະແນກການພ້ອມດ້ວຍພະນັກ ງານວິຊາການເຂົ້າຮ່ວມ.

  ທ່ານ ວຽງຄອນ ວັນເທວາ ຫົວໜ້າວິສະວະກອນທີ່ປຶກສາປະຈໍາໂຄງການກ່າວວ່າ: ການກໍ່ສ້າງສູນບໍລິການປະກັນສັງຄົມແຂວງໄຊຍະບູລີ ແມ່ນໄດ້ເລີ່ມລົງມືກໍ່ສ້າງແຕ່ຕົ້ນປີ 2018 ມາຮອດກາງເດືອນສິງຫາ 2019 ແມ່ນສໍາເລັດ 100% ໃນມູນຄ່າທັງໝົດ 6,4 ຕື້ກີບ, ໂດຍແມ່ນງົບຂອງລັດກໍ່ຄືກະຊວງ ຮສສ.

 ສູນແຫ່ງນີ້ຕັ້ງຢູ່ບ້ານນາໄຮ ເມືອງ ແລະແຂວງໄຊຍະບູລີ, ເປັນອາຄານ 3 ຊັ້ັນ, ເສົາອາຄານເຮັດດ້ວຍເບຕົງເສີມເຫຼັກ, ຝາກໍ່ດ້ວຍດິນຈີ່, ປະຕູ, ປ່ອງຢ້ຽມເຮັດດ້ວຍໄມ້ເນື້ອແຂງ ແລະໂລມິນຽມ, ມຸງດ້ວຍຊີແພກປະກອບມີ 15 ຫ້ອງໃນນີ້ມີຫ້ອງເຮັດວຽກ10 ຫ້ອງ, ຫ້ອງປະຊຸມ 1 ຫ້ອງ, ຫ້ອງນໍ້າຍິງ-ຊາຍທັງ 3 ຊັ້ນ, ມີທາງຂຶ້ນ 2 ເບື້ອງ ເບື້ອງໜ້າ ແລະເບື້ອງຫຼັງໄວ້ໃຫ້ຄົນພິການຂຶ້ນໃນອາຄານປະກອບມີນໍ້າປະປາ, ໄຟຟ້າ; ນອກນີ້ຍັງກໍ່ກໍາແພງອ້ອມສູນບໍລິການປະກັນສັງຄົມຕື່ມອີກ.

-------

ຂຽນໂດຍ: ບຸນທີ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์