ຊົນນະບູລີ ຈັບຢາບ້າຄາເຮືອນ 1.022 ເມັດ

 ເວລາປະມານ 8:30 ໂມງ ຂອງວັນທີ 23 ສິງຫາ 2019 ເຈົ້າໜ້າທີ່ ປກສ ເມືອງຊົນນະບູລີ ແຂວງສະຫວັນນະເຂດ ໄດ້ຮັບແຈ້ງຈາກພົນລະເມືອງດີວ່າ: ມີການຄ້າຂາຍຢາເສບຕິດຢູ່ບ້ານເຊວັນ ຈາກນັ້ນທາງເຈົ້າໜ້າທີ່ໜ່ວຍງານສະກັດກັ້ນ ແລະ ຕ້ານຢາເສບຕິດ ປກສ ເມືອງ ຈຶ່ງໄດ້ສົມທົບກັບພາກສ່ວນທີ່ກ່ຽວຂ້ອງລົງວາງກໍາລັງເຂົ້າກວດກາ ແລະຕິດຕາມເປົ້າໝາຍ, ມາຮອດເວລາ ປະມານ 14:30 ໂມງ ສາມາດຈັບ ຕົວຜູ້ຖືກຫາໄດ້ 1 ຄົນ, ຊື່ທ້າວ ໂຢນາ ອາຍຸ 33 ປີ ປະຊາຊົນບ້ານເຊວັນ ພ້ອມຂອງກາງຢາບ້າ 5 ຖົງກັບ 67 ເມັດ, ເທົ່າກັບ 1.022 ເມັດ, ຢູ່ໃນເຮືອນຂອງຜູ້ກ່ຽວເອງພ້ອມນໍາຕົວ ທ້າວ ໂຢນາ ມາສອບສວນ.

 ຜ່ານການສອບສວນເບື້ອງຕົ້ນຜູ້ກ່ຽວຮັບສາລະພາບວ່າ: ຢາບ້າຈໍານວນດັ່ງກ່າວແມ່ນຂອງຕົນແທ້ ແລະໄດ້ສາລະພາບຕື່ມວ່າຢາບ້າແມ່ນໄດ້ຊື້ມາຈາກຜູ້ຮ່ວມຂະບວນ ການຊຶ່ງຕິດຕໍ່ຊື້ຂາຍທາງໂທລະສັບເມື່ອໄດ້ຢາບ້າມາແລ້ວກໍ່ນໍາມາຈໍາໜ່າຍໃຫ້ກັບໄວໜຸ່ມພາຍໃນບ້ານໂດຍໄດ້ເຄື່ອນໄຫວຄ້າຢາເສບຕິດມາແຕ່ປີ 2017 ຈົນຮອດປະຈຸ ບັນ, ໃນຂະນະທີ່ຜູ້ກ່ຽວກໍາລັງເຄື່ອນໄຫວຄ້າຂາຍຢາເສບຕິດຢູ່ນັ້ນຈຶ່ງໄດ້ຖືກເຈົ້າໜ້າທີ່ຈັບຕົວພ້ອມຂອງກາງຢາບ້າ 1.022 ເມັດ.

  ຄະດີດັ່ງກ່າວຍັງຢູ່ໃນຂັ້ນຕອນການສອບສວນຂະຫຍາຍຜົນຫາຜູ້ຮ່ວມຂະບວນການເພື່ອນໍາຕົວມາດໍາເນີນຄະດີຕາມລະບຽບກົດໝາຍບ້ານເມືອງ.

------

ຂຽນໂດຍ: ແຂວງສະຫວັນນະເຂດ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์