ອັດຕະປື ເກັບລາຍຮັບຄ່າທໍານຽມທາງໄດ້ 500 ລ້ານກວ່າກີບ

 ໂດຍປະຕິບັດຕາມລັດຖະບັນຍັດຂອງປະທານປະເທດສະບັບເລກທີ 001/ປປທ, ລົງວັນທີ 20 ກັນຍາ 2017 ວ່າດ້ວຍຄ່າທຳນຽມທາງ ແລະບັນດານິຕິກຳຕ່າງໆ, ຊຶ່ງການເສຍຄ່າທຳນຽມທາງຜ່ານລະບົບທະນາຄານແມ່ນໄດ້ເລີ່ມປະຕິບັດແຕ່ປີ 2017 ເປັນຕົ້ນມາ.

 ວັນທີ 21 ສິງຫາຜ່ານມາສ່ວຍສາອາກອນປະຈຳແຂວງອັດຕະປື ຮ່ວມກັບກອງບັນຊາການ ປກສ ແຂວງ ແລະທະນາຄານການຄ້າຕ່າງປະເທດລາວມະຫາຊົນສາຂາແຂວງອັດຕະປື ໄດ້ເປີດຂະບວນການຊຸກຍູ້ເສຍຄ່າທໍານຽມທາງຜ່ານລະບົບທະນາຄານຂຶ້ນທີ່ປ້ອມຕຳຫຼວດຈະລາຈອນ (ນາພອກ), ເສັ້ນທາງຫຼວງແຫ່ງຊາດ 18B. ໂດຍການນໍາພາຂອງ ທ່ານ ສຸດໃໜ ສຸດບຸນລົ້ນ ຮອງຫົວໜ້າສ່ວຍສາອາກອນປະຈຳແຂວງອັດຕະປື, ທັງເປັນຫົວໜ້າຄະນະສ້າງຂະບວນການຊຸກຍູ້ເສຍຄ່າທຳນຽມທາງ, ມີເຈົ້າໜ້າທີ່ຕໍາຫຼວດຈະລາຈອນແຂວງພ້ອມດ້ວຍຜູ້ຕາງໜ້າທັງສາມພາກສ່ວນທີ່ກ່ຽວຂ້ອງເຂົ້າຮ່ວມ.

   ທ່ານ ສຸດໃໜ ສຸດບຸນລົ້ນ ໃຫ້ຮູ້ວ່າ: ເພື່ອສືບຕໍ່ຈັດຕັ້ງປະຕິບັດແຜນການພັດທະນາເສດຖະກິດ-ສັງຄົມ 5 ປີ ຄັ້ງທີ VIII ກໍ່ຄືແຜນງົບປະມານແຫ່ງລັດປະຈໍາປີ 2019 ໂດຍສະເພາະແຜນການຈັດເກັບລາຍຮັບເຂົ້າງົບປະມານໃຫ້ບັນລຸຕາມແຜນການທີ່ວາງໄວ້ ແລະການປະຕິບັດພັນທະງົບປະມານແຫ່ງລັດກໍ່ແມ່ນໜ້າທີ່ຂອງ ພົນລະເມືອງລາວທຸກໆຄົນຕ້ອງມີສ່ວນຮ່ວມໃນການສ້າງຂະບວນການເສຍຄ່າທໍານຽມທາງກັບທີ່ຜ່ານລະບົບທະນາຄານຢູ່ແຂວງອັດຕະປືກໍ່ເປັນປີທຳອິດ, ທັງນີ້ກໍ່ເພື່ອເປັນການປຸກລະດົມ, ກະຕຸກຊຸກຍູ້ ແລະອໍານວຍຄວາມສະດວກໃຫ້ແກ່ອົງການຈັດຕັ້ງພັກ-ລັດ, ບັນດາຫົວໜ່ວຍທຸລະກິດ ແລະປະຊາຊົນບັນດາເຜົ່າໄດ້ມາເສຍຄ່າທໍານຽມທາງຜ່ານລະບົບທະນາຄານຢ່າງເປັນຂະບວນຟົດຟື້ນ;ອັນສໍາຄັນກໍ່ແມ່ນເປັນແບບຢ່າງນໍາໜ້າສະແດງເຖິງສະຕິຕື່ນຕົວ, ຄວາມສະໝັກໃຈທີ່ປະກອບສ່ວນເຂົ້າໃນການສ້າງສາພັດທະນາປະເທດຊາດ.

ຊຶ່ງການເສຍຄ່າທຳນຽມທາງຜ່ານລະບົບທະນາຄານແມ່ນສາມາດຊຳລະໄດ້ 5ຊ່ອງທາງຄື: ແອັບພຣີເຄເຊີນມືຖື (Mobile Application),ຕູ້ເອທີເອັມ(ATM), ເຄົາເຕີທະນາຄານ (Counter), ຈຸດໃຫ້ບໍລິການທີ່ໄດ້ຮັບອະນຸຍາດ(BCOME) ແລະ ຕູ້ອັດຕະໂນມັດ (Kiosk). ໃນນັ້ນຕາມແຜນການເຄື່ອນໄຫວສ້າງຂະ ບວນການຊຸກຍູ້ເສຍຄ່າທຳນຽມທົ່ວແຂວງທັງໝົດຈຳນວນ 8 ຈຸດ ໃນນັ້ນຂັ້ນແຂວງມີ 3 ຈຸດ ແລະ 5 ຈຸດ ຢູ່ບັນດາ 5 ຕົວເມືອງ.

  ໃນໄລຍະ 8 ເດືອນຂອງປີ 2019 ນີ້ການເກັບລາຍຮັບຄ່າທຳນຽມທາງປະຕິບັດໄດ້ 500 ລ້ານກວ່າກີບເທົ່າກັບ 70,71% ຂອງແຜນການປີເມື່ອທຽບໃສ່ຂໍ້ມູນພາ ຫະນະຕົວຈິງທີ່ພະແນກ ຍທຂ ສະໜອງໃຫ້ເຫັນວ່າຍັງຕໍ່າ, ຜ່ານການຈັດຕັ້ງເຄື່ອນໄຫວເປີດຂະບວນການຊຸກຍູ້ຜ່ານມາໃນໄລຍະ 1 ວັນທີ່ຜ່ານມາສາມາດຈັດເກັບ ລາຍຮັບໄດ້ 21,76 ລ້ານກີບ ແລະສັງເກດເຫັນໄດ້ວ່າບຸກຄົນ, ນິຕິບຸກຄົນ ແລະການຈັດຕັ້ງພາຍໃນແຂວງອັດຕະປືມີຄວາມຕື່ນຕົວໃນການແຈ້ງ ແລະ ຊຳລະຄ່າທຳ ນຽມທາງຫຼາຍຂຶ້ນ.

  ທ່ານ ສຸດໃໜ ສຸດບຸນລົ້ນ ຍັງໄດ້ຮຽກຮ້ອງມາຍັງບຸກຄົນ, ນິຕິບຸກຄົນ ແລະການຈັດຕັ້ງຕະຫຼອດຮອດປະຊາຊົນບັນດາເຜົ່າທີ່ນຳໃຊ້ຍານພາຫະນະພາຍໃນແຂວງອັດ ຕະປື ໃຫ້ຮີບຮ້ອນຕື່ນຕົວປະກອບສ່ວນພັນທະຂອງຕົນຢ່າງຕັ້ງໜ້າເວົ້າລວມ, ເວົ້າສະເພາະແມ່ນການເສຍຄ່າທຳນຽມທາງປະຈຳປີ, ຊຶ່ງປະຈຸບັນກໍ່ເຫັນວ່າໄດ້ກາຍກໍານົດເວລາເດືອນກວ່າແລ້ວແຕ່ເຖິງຢ່າງໃດກໍ່ດີກໍ່ໃຫ້ທຸກພາກສ່ວນຮີບຮ້ອນໄປແຈ້ງເສຍຄ່າທຳນຽມທາງຕາມຊ່ອງທາງ ແລະຈຸດຕ່າງໆ,ສິ່ງສຳຄັນກໍ່ແມ່ນອົງການຈັດຕັ້ງພາກລັດຂອງພວກເຮົາແຕ່ຂັ້ນແຂວງລົງຮອດຂັ້ນເມືອງຕ້ອງເປັນແບບຢ່າງໃນການຈັດຕັ້ງປະຕິບັດ ແລະໃຫ້ປະຊາຊົນເຂົ້າໃຈວ່າການປະກອບສ່ວນເສຍພັນທະອາກອນເປັນການສ້າງສາພັດທະນາປະເທດຊາດໃຫ້ຈະເລີນຮຸ່ງເຮືອງໃນແຕ່ລະໄລຍະ.

-----------

ຂຽນໂດຍ: ອັດຕະປື ຫຼວງອາໄພ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์