ມອບ-ຮັບຫົວໜ້າຄັງເງິນປະຈຳແຂວງຫຼວງນໍ້າທາ

  ວັນທີ 16 ສີງຫາ 2019 ແຂວງຫຼວງນໍ້າທາໄດ້ປະກາດການແຕ່ງຕັ້ງຫົວໜ້າຄັງເງິນແຫ່ງຊາດປະຈໍາແຂວງລະຫວ່າງຜູ້ເກົ່າ ແລະຜູ້ໃໝ່ຢູ່ທີ່ຫ້ອງປະຊຸມພະ ແນກແຜນການ ແລະການລົງທຶນແຂວງໂດຍການເຂົ້າຮ່ວມຂອງທ່ານ ບຸນຍີ ແກ້ວຄູນເມືອງ ຮອງເຈົ້າແຂວງໆ ຫຼວງນໍ້າທາ, ທ່ານ ອ່ອນຈັນຄຳ ພາວົງ ຫົວໜ້າພະແນກການເງິນແຂວງ, ມີຄະນະກຳມະການພັກແຂວງ, ຮອງຫົວໜ້າຄັງເງິນແຫ່ງຊາດ, ຫົວໜ້າກົມຈັດຕັ້ງພະນັກງານ, ຄະນະຈັດຕັ້ງແຂວງ, ຫົວໜ້າ-ຮອງຫົວໜ້າພະແນກການກ່ຽວຂ້ອງຂອງແຂວງເຂົ້າຮ່ວມ.

  ທ່ານ ບຸນທະວີ ແກ່ນປະເສີດ ຫົວໜ້າກົມຈັດຕັ້ງພະນັກງານຜ່ານຂໍ້ຕົກລົງວ່າດ້ວຍການອະນຸມັດໃຫ້ພະນັກງານ-ລັດຖະກອນຮັບອຸດໜູນບໍານານ, ລັດຖະມົນຕີກະ ຊວງການເງິນເຫັນດີອະນຸມັດໃຫ້ທ່ານ ສົມຮັກ ວົງສະຫວັນ ຫົວໜ້າຄັງເງິນແຫ່ງຊາດປະຈຳແຂວງພັກການຮັບອຸດໜູນບໍານານ, ພ້ອມດຽວກັນນັ້ນທ່ານຍັງໄດ້ຜ່ານຂໍ້ຕົກລົງວ່າດ້ວຍການແຕ່ງຕັງຫົວໜ້າຄັ້ງເງິນແຫ່ງຊາດປະຈຳແຂວງຫຼວງນໍ້າທາ, ໂດຍໄດ້ຕົກລົງແຕ່ງຕັ້ງທ່ານ ບຸນໂຮມ ແອງດາວັນ ຮອງຫົວໜ້າຄັງເງິນແຫ່ງຊາດ ປະຈຳແຂວງເປັນຫົວໜ້າຄັງເງິນແຫ່ງຊາດປະຈຳແຂວງຜູ້ໃໝ່, ຈາກນັ້ນທ່ານ ສົມຮັກ ວົງສະຫວັນ ແລະ ທ່ານ ບຸນໂຮມ ແອງດາວັນ ໄດ້ຂຶ້ນເຊັນບົດບັນທຶກມອບ-ຮັບໜ້າທີ່ຢ່າງເປັນທາງການຮ່ວມກັນ.

  ໂອກາດດັ່ງກ່າວ ທ່ານ ບຸນຍີ ແກ້ວຄູນເມືອງຮອງເຈົ້າແຂວງຫຼວງນໍ້າທາ ໄດ້ໃຫ້ກຽດໂອ້ລົມຊຶ່ງໄດ້ສະແດງຄວາມຍ້ອງຍໍຊົມເຊີຍຜົນງານຕະຫຼອດໄລຍະຜ່ານມາຕໍ່ກັບພະນັກງານບໍານານເຂົ້າຮັບອຸດໜູນ ແລະ ເນັ້ນໜັກໃຫ້ຫົວໜ້າຄັງເງິນແຫ່ງຊາດປະຈຳແຂວງຜູ້ໃໝ່ຈົ່ງເອົາໃຈໃສ່ຊີ້ນຳໆພາຕາມພະລະບົດບາດສິດ ແລະ ໜ້າທີ່ຂອງຕົນຕໍ່ກັບວຽກງານໃຫ້ມີບາດກ້າວຂະຫຍາຍຕົວ, ມີຄວາມໂປ່ງໃສ, ທັນສະໄໝ ແລະວ່ອງໄວຂຶ້ນໄປເລື້ອຍໆ.

-----------

ຂຽນໂດຍ: ມຸນຕີ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

• 23/08/2019