ປະຊາຊົນອັດຕະປືໄດ້ປິ່ນປົວພະຍາດບໍ່ເສຍຄ່າ

  ເພື່ອຮັບປະກັນໃຫ້ປະຊາຊົນໄດ້ສຳພັດກັບການບໍລິການສາທາລະນະສຸກທີ່ມີຄຸນນະພາບດ້ານມະນຸດສະທຳວັນທີ 19 ສິງຫາ 2019 ທີ່ຜ່ານມາມູນລະນິທິຊາວພຸດໄຕ້ຫວັນຊີຈື ສປ ຈີນ ໄດ້ສົມທົບກັບອຳນາດການປົກຄອງແຂວງຮ່ວມຈັດກິດຈະກໍາກວດປິ່ນປົວພະຍາດ, ສະໜອງຢາ ແລະໃຫ້ຄຳປຶກສາໂດຍບໍ່ເສຍຄ່າໃຫ້ແກ່ປະຊາຊົນຊາວແຂວງອັດຕະປື.

  ກິດຈະກຳດັ່ງກ່າວເເມ່ນໄດ້ມີຂຶ້ນທີ່ໂຮງໝໍແຂວງໂດຍມີປະຊາຊົນທົ່ວແຂວງອັດຕະປື ໄດ້ຮັບການກວດສຸຂະພາບ ແລະແຈກຢາປິ່ນປົວຖືກກັບພະຍາດທີ່ກວດພົບພາຍຫຼັງການກວດສຸຂະພາບທັງໝົດ 1.510 ຄົນ ໃນນັ້ນມີຜູ້ບໍລິການກວດທົ່ວໄປຈຳນວນ 920 ຄົນ, ຝັງເຂັມຈຳນວນ 284 ຄົນ, ແຂ້ວ 266 ຄົນ ແລະ ຜ່າຕັດນອ້ຍ 40 ຄົນ ຜ່ານການກວດພົບວ່າມີ ຫຼາຍຄົນມີພະຍາດໜັກທີ່ສາມາດປິ່ນປົວໄດ້ ແລະໄດ້ຮັບການແນະນຳໃຫ້ຄຳປຶກສາມີບາງຈຳນວນກໍ່ນຳສົ່ງຂຶ້ນໂຮງໝໍແຂວງເພື່ອສືບຕໍ່ຮັກສາ ໂດຍໃຫ້ຖືກຕ້ອງຕາມຫຼັກການຂອງແພດໃນຂັ້ນຕອນຕໍ່ໄປ

ທ່ານ ອຸ່ນຫຼ້າ ໄຊຍະສິດ ຮອງເຈົ້າແຂວງໆອັດຕະປື ໄດ້ຍົກໃຫ້ເຫັນວ່າ: ນີ້ແມ່ນດ້ວຍຄວາມເອົາໃຈໃສ່ດ້ານມະນຸດສະທຳທີ່ຫາໄດ້ຍາກໃຫ້ແກ່ພໍ່ແມ່ປະຊາຊົນຜູ້ທີ່ມີບັນຫາດ້ານສຸຂະພາບ ແລະຖືເປັນສິດທິພິເສດເພື່ອແນໃສ່ສົ່ງເສີມຕໍ່ການຮັກສາສຸຂະພາບ ແລະຈິດໃຈໃນເບື້ອງຕົ້ນຂອງພໍ່ແມ່ປະຊາຊົນຊາວແຂວງອັດຕະປືໄດ້ກວດ ແລະປິ່ນປົວພະຍາດຕາມເປົ້າໝາຍ ການຊ່ວຍເຫຼືອດ້ານມະນຸດສະທຳນີ້ ປະກອບສ່ວນ ແລະຊຸກຍູ້ການຮັກສາສຸຂະພາບພໍ່ແມ່ປະຊາຊົນໃຫ້ມີຊີວິດດີຂຶ້ນສືບຕໍ່ປະກອບສ່ວນພັດທະນາເສດຖະກິດຄອບຄົວ ພ້ອມນີ້ຍັງເປັນການສືບສານສາຍພົວພັນມິດຕະພາບໃຫ້ມີການພັດທະນາເຂົ້າສູ່ລວງເລິກ ແລະປະຕິບັດວຽກງານບໍ່ວ່າໃນເທື່ອ ນີ້ກໍຄືອະນາຄົດໃຫ້ໄດ້ຮັບຜົນສໍາເລັດເປັນຢ່າງສູງ.

---------

ຂຽນໂດຍ: ມາລາທິບ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

แชร์