ອຸດົມໄຊ ຮັບລົດໂຄງການຄວບຄຸມໄພພິບັດທຳມະຊາດ

 ວັນທີ 20 ສິງຫາ 2019 ທີ່ແຂວງອຸດົມໄຊ ໄດ້ມີພິທີມອບ-ຮັບລົດໃຫຍ່ ແລະລົດຈັກຂຶ້ນລະຫວ່າງກົມອຸຕຸນິຍົມ ແລະອຸທົກກະສາດກະຊວງຊັບພະຍາກອນທຳມະຊາດ ແລະສິ່ງແວດລ້ອມກັບພະແນກຊັບພະຍາກອນທຳມະຊາດ ແລະສິ່ງແວດລ້ອມແຂວງອຸດົມໄຊ.

  ລົດທີ່ນໍາມາມອບໃນຄັ້ງນີ້ແມ່ນນອນໃນກິດຈະກໍາການຈັດຊື້ພາຫະນະ ແລະອຸປະກອນຕ່າງໆຂອງໂຄງການຄວບຄຸມໄພພິບັດທາງທໍາມະຊາດໃນຂອບເຂດອາຊີຕາເວັນອອກສ່ຽງໃຕ້ທີ່ທະນາຄານໂລກເປັນຜູ້ໃຫ້ທຶນຊຶ່ງກິດຈະກຳດັ່ງກ່າວກວມເອົາຈຳນວນ 3 ແຂວງພາກເໜືອ ຄື: ແຂວງຜົ້ງສາລີ, ຫຼວງພະບາງ ແລະແຂວງອຸດົມໄຊ.

  ດັ່ງນັ້ນລັດຖະມົນຕີກະຊວງຊັບພະຍາກອນທຳມະຊາດ ແລະສິ່ງແວດລ້ອມຈຶ່ງອອກຂໍ້ຕົກລົງວ່າດ້ວຍການມອບພາຫະນະລົດໃຫຍ່ຈຳນວນ 1 ຄັນ ເປັນປະເພດລົດກະ ບະຍີ່ຫໍ້ນິສສັນນາວາຣາ ມູນຄ່າ37,5 ພັນໂດລາ ແລະລົດຈັກຈໍານວນ 4 ຄັນ ຍີ່ຫໍ້ຢາມາຮາ ຄັນລະ 1,3 ພັນໂດລາ, ລວມມູນຄ່າທັງ ໝົດ 42,7 ພັນໂດລາ, ໃຫ້ກັບຂະແໜງຊັບພະຍາກອນທຳມະຊາດ ແລະສິ່ງແວດລ້ອມແຂວງອຸດົມໄຊ.

  ໃນນັ້ນລົດໃຫຍ່ແມ່ນມອບໃຫ້ກັບພະແນກຊັບພະຍາກອນທຳທະຊາດ ແລະສິ່ງແວດລ້ອມແຂວງເປັນຜູ້ຄຸ້ມຄອງ, ນໍາໃຊ້ສ່ວນລົດຈັກແມ່ນມອບໃຫ້ກັບຫ້ອງການຊັບພະ ຍາກອນທໍາມະຊາດ ແລະສິ່ງແວດລ້ອມ 4 ເມືອງຄື: ເມືອງປາກແບງ, ງາ, ຫຼາແລະເມືອງນາຫມໍ້ ເພື່ອນໍາໃຊ້ເຂົ້າໃນການເຄື່ອນໄຫວວຽກງານຄວບຄຸມຄວາມສ່ຽງໄພພິບັດ ໂດຍສະເພາະແມ່ນການຫັນລະບົບອຸຕຸນິຍົມ-ອຸທົກກະສາດ ແລະການແຈ້ງເຕືອນໄພລ່ວງໜ້າໃຫ້ເປັນທັນສະໄໝໃຫ້ມີຄວາມວ່ອງໄວ, ທັນກັບສະພາບການແລະໄດ້ຮັບຜົນສຳເລັດສູງ.

  ໃນພິທີດັ່ງກ່າວໂອກາດເຂົ້າຮ່ວມ ທ່ານ ຂັນມະນີ ຂຸນພົນ ຫົວໜ້າກົມອຸຕຸນິຍົມ-ອຸທົກກະສາດຕາງໜ້າກະຊວງຊັບພະຍາກອນທຳມະຊາດ ແລະສິ່ງແວດລ້ອມໄດ້ມີຄຳເຫັນໂດຍເນັ້ນໜັກໃຫ້ແຂວງນຳໃຊ້ລົດໃຫ້ຖືກເປົ້າໝາຍຂອງໜ້າວຽກ, ຕ້ອງຄຸ້ມຄອງ, ຮັກສາໃຫ້ນຳໃຊ້ໄດ້ຍາວນານ.

-----------

ຂຽນໂດຍ: ຄານມະນີ ຮຽນດໍຈັນ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ   

แชร์