ໄຊຍະບູລີ ສະຫຼຸບຄຸ້ມຄອງສໍາມະໂນຄົວ ແລະກໍ່ສ້າງຮາກຖານ

  ກາງເດືອນສິງຫາ 2019, ຫ້ອງຄຸ້ມຄອງສໍາມະໂນຄົວ ແລະກໍ່ສ້າງຮາກຖານກອງບັນຊາການ ປກສ ແຂວງໄຊຍະບູລີ ໄດ້ຈັດກອງປະຊຸມສະຫຼຸບວຽກງານ 6 ເດືອນຕົ້ນປີ ແລະ ທິດທາງແຜນການ 6 ເດືອນ ທ້າຍປີ 2019 ຂຶ້ນທີ່ສະໂມສອນກອງບັນຊາການ ປກສ ແຂວງພາຍໃຕ້ການເປັນປະທານຂອງ ພັທ ພອນສະຫວັດ ພະໄຊສົມບັດ ຫົວໜ້າຫ້ອງຄຸ້ມຄອງສໍາມະໂນຄົວ ແລະກໍ່ສ້າງຮາກຖານ, ມີຄະນະຫ້ອງ, ພ້ອມດ້ວຍພະນັກງານ-ນັກຮົບພາຍໃນຫ້ອງເຂົ້າຮ່ວມ.

  ກອງປະຊຸມໄດ້ພ້ອມກັນຄົ້ນຄວ້າ, ປະກອບຄໍາຄິດຄໍາເຫັນຕີລາຄາດ້ານດີຜົນງານ ແລະດ້ານອ່ອນຂໍ້ຄົງຄ້າງໃນການປະຕິບັດໜ້າທີ່ວິຊາສະເພາະ 6 ເດືອນຕົ້ນ ປີ ແລະຮັບຮອງເອົາທິດທາງແຜນການ 6 ເດືອນທ້າຍປີຊຶ່ງຜ່ານມາຄະນະພັກ, ຄະນະບັນຊາພາຍໃນຫ້ອງ ໄດ້ເອົາໃຈໃສ່ຊີ້ນໍາ-ນໍາພານາຍ ແລະ ພົນຕໍາຫຼວດທີ່ປະຈໍາຢູ່ບັນດາຮາກຖານ ກໍ່ຄື 2 ຈຸດສຸມ ແລະກອງຮ້ອຍປະຈໍາໂຄງການເອົາໃຈໃສ່ປະຕິບັດໜ້າທີ່ດ້ວຍຄວາມຮັບຜິດຊອບສູງ; ພ້ອມທັງເປັນເຈົ້າການຕິດຕາມ, ກວດກາ, ຊຸກຍູ້ ແລະຊີ້ນໍາບັນດາເມືອງຈັດຕັ້ງ ປະຕິບັດບົດແນະນໍາເລກທີ 4164 ລົງວັນທີ 8 ສິງຫາ 2018 ຂອງກົມຄຸ້ມຄອງສໍາມະໂນຄົວ ແລະກໍ່ສ້າງຮາກຖານວ່າດ້ວຍການນໍາພາປັບປຸງ ປກສ ບ້ານມາຮອດປະຈຸບັນໄດ້ປະຕິບັດສໍາເລັດແລ້ວ 72 ກຸ່ມ ບ້ານໃນທົ່ວແຂວງ, ມີຫ້ອງການຖາວອນ 35 ຫຼັງ, ບໍ່ທັນຖາວອນ 37 ຫ້ອງການ,ມີ ປກສ ອາຊີບປະຈໍາຢູ່ 400 ກວ່າສະຫາຍ, ຍິງ 21 ສະຫາຍ, ມີ ປກສ ບ້ານທັງໝົດ 3.500 ກວ່າສະຫາຍ, ຍິງ 12 ສະຫາຍ, ມີບ້ານທັງໝົດ 433 ບ້ານ, ສາມາດສ້າງບ້ານປ້ອງ

 ຄວາມສະຫງົບດີມີ 420 ບ້ານ, ຄອບຄົວເຮັດວຽກງານປ້ອງກັນຄວາມສະຫງົບດີມີ 54.200 ກວ່າ ຄອບຄົວ, ບ້ານປ້ອມໝັ້ນສູ້ຮົບຕິດລຽນມີ 100 ກວ່າ ບ້ານ, ບ້ານປອດຄະດີ 400 ກວ່າບ້ານ, ບ້ານປອດຢາ ເສບຕິດມີ 245 ບ້ານ, ບ້ານວັດທະນະທໍາມີ 363 ບ້ານ, ບ້ານສາທາລະນະສຸກມີ 357 ບ້ານ; ຂຶ້ນສໍາມະໂນຄົວແລ້ວ 78.900 ກວ່າຄອບຄົວ, ຍັງບໍ່ທັນຂຶ້ນສໍາມະໂນຄົວ 14 ຄອບຄົວ, ຕິດປ້າຍເຮືອນແລ້ວ 66.100 ກວ່າຫຼັງຄາເຮືອນ,ຍັງບໍ່ທັນຕິດ 16.400 ກວ່າຫຼັງຄາເຮືອນ, ໄດ້ຊຸກຍູ້ບັນດາເມືອງປ້ອມຂໍ້ມູນສໍາມະໂນຄົວເຂົ້າລະບົບທັນສະໄໝໄດ້ 244 ຄອບຄົວ, ມີ 1.200 ກວ່າຄົນ, ຍິງ 600 ກວ່າຄົນ; ພົນລະເມືອງທີ່ໄດ້ອອກບັດປະຈໍາຕົວແລ້ວ 172,400 ກວ່າຄົນ, ຍິງ 82.900 ກວ່າຄົນ.

  ສໍາລັບທິດທາງແຜນການ 6 ເດືອນທ້າຍປີ 2019 ນີ້ຈະສືບຕໍ່ປະສານສົມທົບກັບພະແນກທີ່ກ່ຽວຂ້ອງ, ບັນດາເມືອງ, 2 ຈຸມສຸມ, 2 ໂຄງການເຂື່ອນໄຟຟ້າເຄື່ອນໄຫ ວວຽກງານວິຊາສະເພາະ, ສືບຕໍ່ກະກຽມປະເມີນຜົນການລົງກໍ່ສ້າງຮາກຖານຢູ່ຈຸດສຸມ, ພ້ອມທັງລົງກວດກາແລະປະເມີນບ້ານທີ່ມີຄວາມຫຍຸ້ງຍາກສັບສົນຢູ່ 4 ເມືອງຄື: ເມືອງຄອບ, ເມືອງເງິນ, ເມືອງພຽງ ແລະເມືອງບໍ່ແຕນ, ສືບຕໍ່ຊຸກຍູ້ບັນດາເມືອງ, ເກັບກໍາຂໍ້ມູນເຂົ້າຮ່າງແບບຟອມ, ປຶ້ມສໍາມະໂນຄົວ ແລະ ປ້າຍເຮືອນ, ພ້ອມທັງລົງກວດກາ, ເກັບກໍາການເໜັງຕີງຂອງພົນລະເມືອງ, ຜະລິດບັດປະຈໍາຕົວ, ຂຶ້ນທະບຽບຕາປະທັບ ແລະອອກໃບອານຸຍາດນໍາໃຊ້ໃຫ້ເປັນປົກກະຕິ.

  ພັທ ພອນສະຫວັດ ພະໄຊສົມບັດ ໄດ້ຮຽກຮ້ອງໃຫ້ຄະນະພັກ-ຄະນະບັນຊາ ແລະພະນັກງານ-ນັກ ຮົບພາຍໃນຫ້ອງຈົ່ງເພີ່ມທະວີຄວາມຮັບຜິດຊອບ, ສຸມທຸກສະຕິປັນຍາບຸກບືນເຮັດໜ້າທີ່ຂອງຕົນໃຫ້ໄດ້ຮັບຜົນສໍາເລັດໃຫຍ່ຫຼວງກວ່າເກົ່າ, ຮັບປະກັນໃຫ້ທົ່ວແຂວງມີຄວາມສະຫງົບທາງດ້ານການເມືອງມີຄວາມເປັນລະບຽບຮຽບຮ້ອຍໃນສັງຄົມເທື່ອລະກ້າວ.

-----------

ຂຽນໂດຍ: ມຸນຕີ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์