ນວ ສົ່ງເສີມພັດທະນາການມີວຽກເຮັດງານທຳ

 ພະແນກແຮງງານ ແລະສະຫວັດດີການສັງຄົມ ນະຄອນຫຼວງວຽງຈັນ (ນວ) ຈັດສຳມະນາ ພາຍໃຕ້ຫົວຂໍ້ສົ່ງເສີມການມີວຽກເຮັດງານທຳແບບມີຄຸນຄ່າເພື່ອສ້າງການຮ່ວມມືພັດທະນາແຮງງານ ແລະຈັດຫາງານລະຫວ່າງຂະແໜງການຂອງລັດ, ເອກະຊົນ, ຫົວໜ່ວຍແຮງງານ ແລະ ຄວາມສອດຄ່ອງລະຫວ່າງການສ້າງຕຳແໜ່ງໃຫ້ເປັນລະບົບ.

  ກອງປະຊຸມດັ່ງກ່າວໄດ້ຈັດຂຶ້ນວັນທີ 19 ສິງຫາ 2019 ທີ່ນະຄອນຫຼວງວຽງຈັນ ພາຍໃຕ້ເປັນປະທານຂອງ ທ່ານ ສີຫຸນ ສິດທິລືໄຊ ຮອງເຈົ້າຄອງນະຄອນຫຼວງວຽງຈັນ, ທ່ານ ນາງ ລຳພອຍ ສີອັກຄະຈັນ ຫົວໜ້າພະແນກແຮງງານ ແລະສະຫວັດດີການສັງຄົມ ນະຄອນຫຼວງວຽງຈັນ ບັນດາທ່ານຕາງໜ້າຈາກຂະແໜງການກ່ຽວຂ້ອງ, ຮອງເຈົ້າເມືອງ 9 ເມືອງ ແລະຫົວໜ່ວຍກຸ່ມບ້ານທົ່ວນະຄອນວຽງຈັນເຂົ້າຮ່ວມ.

  ທ່ານ ນາງ ລຳພອຍ ສີອັກຄະຈັນ ໄດ້ຜ່ານບົດສະຫຼຸບໂດຍຫຍໍ້ການຈັດຕັ້ງປະຕິບັດໜ່ວຍງານພັດທະນາສີມືແຮງງານບັນດາໂຮງຮຽນ,ສູນຝຶກອົບຮົມວິຊາຊີບທາງພາກ ລັດ ແລະເອກະຊົນໄດ້ຈຳນວນ  10 ພັນກວ່າຄົນ ຍິງ 6 ພັນກວ່າຄົນ ເທົ່າກັບ 401,68% ລື່ນຄາດໝາຍ ຂອງແຜນການ 5 ປີ 301,68% ໃນຈໍານວນ 2,5 ພັນຄົນ ແລະໄດ້ ຈັດຝຶກອົບຮົມເຄື່ອນທີ່ໃຫ້ຊາວ ໜຸ່ມຜູ້ດ້ອຍໂອກາດບໍ່ມີເງື່ອນໄຂ ເຂົ້າຮຽນຢູ່ສະຖາບັນການສຶກສາ ຕ່າງໆທີ່ຢູ່ຫ່າງໄກສອກຫຼີກໄດ້ ຈຳນວນ 454 ຄົນ ເທົ່າກັບ 90,8% ຂອງແຜນການ 5 ປີ ໃນຈໍານວນ 500 ຄົນ ນອກນັ້ນຍັງໄດ້ສ້າງມາດຖານສີມືແຮງງານ ໂດຍການທົດສອບ ແລະອອກໃບຢັ້ງຢືນຕາມມາດຖານສີມືແຮງງານ ແລະປະສານສົມທົບກັບບໍລິສັດຈັດຫາງານ ແລະຫົວໜ່ວຍທຸລະກິດໃນການສະໜອງແຮງງານເຂົ້າສູ່ຕະຫຼາດແຮງງານໄດ້ 5,7 ພັນກວ່າຄົນ ຍິງ 1,7 ພັນ ກວ່າຄົນ.

  ທ່ານ ສີຫຸນ ສິດທິລືໄຊ ໄດ້ສະເໜີໃຫ້ຄະນະແຕ່ລະຂັ້ນເອົາໃຈໃສ່ຂະແໜງການແຮງງານ ແລະ ສະຫວັດດີການສັງຄົມເອົາໃຈໃສ່ແນວຄິດການເມືອງຍົກລະດັບຄວາມຮູ້ວິຊາສະເພາະຕໍ່ພະນັກງານ-ລັດຖະກອນ, ສືບຕໍ່ກົນໄກບໍລິຫານງານໃຫ້ສອດຄ່ອງກັບກົດໝາຍພ້ອມທັງໄດ້ແກ້ໄຂບັນຫາວຽກເຮັດງານທຳໃຫ້ດີຂຶ້ນ, ພັດທະນາໃຫ້ເປັນທັງປະລິມານຄຸນນະພາບ, ປັບປຸງໂຄງລ່າງພື້ນຖານໃຫ້ມີສ່ວນຮ່ວມລະຫວ່າງພາກລັກ, ເອກະຊົນ ແລະ ຫົວໜ່ວຍແຮງງານສ້າງຂໍ້ມູນຂ່າວສານໃຫ້ເປັນຈຸດຂະຫຍາຍບໍລິການຈັດຫາງານ, ປົກປ້ອງສິດລະຫວ່າງຜູ້ໃຊ້ແຮງງານ ແລະຜູ້ອອກແຮງງານໃຫ້ເປັນລະບົບ.

--------

ຂຽນໂດຍ: ແພງຕາ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

แชร์