ການຄ້າເມືອງນອງ ເຜີຍແຜ່ກົດໝາຍວິສາຫະກິດໃຫ້ຫົວໜ່ວຍທຸລະກິດ

  ວັນທີ 16 ສິງຫາຜ່ານມາທີ່ຫ້ອງປະຊຸມຫ້ອງການອຸດສາຫະກຳ ແລະການຄ້າເມືອງນອງ ແຂວງສະຫວັນນະເຂດ ໄດ້ມີກອງປະຊຸມເຜີຍແຜ່ເອກະສານກົດໝາຍວ່າດ້ວຍວິສາຫະກິດໃຫ້ຜູ້ປະກອບການທຸລະກິດ,ໂດຍເປັນປະທານຂອງ ທ່ານ ຄຳບາງ ແກ້ວພຸດໂທ ຫົວໜ້າຫ້ອງການອຸດສາຫະກຳ ແລະ ການຄ້າເມືອງ, ທ່ານ ວົງສະຫງ່າ ພົມມະສອນ ຮອງຫົວໜ້າຫ້ອງການອຸດສາຫະກຳ ແລະການຄ້າ, ມີບັນດາຫົວໜ່ວຍທຸລະກິດ, ຜູ້ປະກອບການໃນທົ່ວເມືອງເຂົ້າຮ່ວມ.

  ຈຸດປະສົງຂອງກອງປະຊຸມຄັ້ງນີ້ກໍ່ເພື່ອເຜີຍແຜ່ກົດໝາຍວ່າດ້ວຍວິສາຫະກິດໃຫ້ບັນດານັກທຸລະກິດ, ຜູ້ປະກອບການເຂົ້າໃຈໃນການສ້າງຕັ້ງທຸລະກິດ ແລະ ແຈ້ງຂຶ້ນ ທະບຽນວິສາຫະກິດ, ເຜີຍແຜ່ ເອກະສານຂອງພະແນກອຸດສາ ຫະກຳ ແລະການຄ້າແຂວງ ວ່າດ້ວຍການຕິດສະຫຼາກລາຄາສິນຄ້າໃຫ້ເປັນພາສາລາວພ້ອມທັງຕິດປ້າຍລາຄາສິນຄ້າເປັນເງິນກີບ, ເຜີຍແຜ່ການກວດກາສິນຄ້າ ເຊື່ອມຄຸນ ແລະເສຍຄຸນ ຫຼືໝົດ ອາຍຸການນຳໃຊ້ໃຫ້ຫົວໜ່ວຍທຸ ລະກິດໄດ້ຮັບຮູ້ ແລະສາມາດກວດກາວັນ, ທີ, ເດືອນ, ປີການຜະລິດ ແລະ ໝົດອາຍຸຂອງສິນຄ້າທີ່ຈະນຳມາວາງຂາຍຍ່ອຍພາຍໃນເມືອງນອງໃຫ້ຮູ້ເຖິງສິນຄ້າເກືອດຫ້າມ, ສິນຄ້ານຳເຂົ້າບໍ່ຖືກຕ້ອງຕາມລະບຽບກົດ ໝາຍ, ສິນຄ້າປອມແປງລອກຮຽນແບບໂດຍນຳເອົາສິນຄ້າທີ່ຖືກລອກຮຽນແບບມາແນະນຳຕົວຈິງ.

 ໂອກາດນີ້ທ່ານປະທານກອງປະຊຸມກໍ່ໄດ້ເນັ້ນໜັກໃຫ້ບັນດາຜູ້ປະກອບການເອົາໃຈໃສ່ຈັດຕັ້ງປະຕິບັດຢ່າງເຂັ້ມງວດພ້ອມທັງເປັນຫູເປັນຕາຖ້າຫາກເຫັນຜູ້ປະກອບການໃດເຄື່ອນໄຫວທຸລະກິດບໍ່ຖືກຕ້ອງຕໍ່ລະບຽບກົດໝາຍແມ່ນໃຫ້ແຈ້ງມາຍັງຫ້ອງການອຸດສາຫະກຳ ແລະການຄ້າເມືອງທັນທີ.

  ຂ່າວແຈ້ງໃຫ້ຮູ້ຕື່ມວ່າໃນວັນທີ 15 ສິງຫາ ທີ່ຫ້ອງປະຊຸມຫ້ອງການອຸດສາຫະກຳ ແລະການຄ້າເມືອງນອງ ໄດ້ຈັດກອງປະຊຸມເຜີຍແຜ່ເອກະສານກົດໝາຍການຕ້ານ ການສໍ້ລາດບັງຫຼວງໂດຍການເປັນປະທານຂອງທ່ານ ນາງ ສັງທອງ ກຽດຕະວົງ ປະທານກວດກາກວດກາພັກ-ລັດເມືອງ ແລະມີພະນັກງານການນຳຫຼັກແຫຼ່ງພາຍໃນຫ້ອງການເຂົ້າຮ່ວມຮັບຟັງ.

  ໃນກອງປະຊຸມດັ່ງກ່າວຮັບຟັງການເຜີຍແຜ່ກົດໝາຍວ່າດ້ວຍການຕ້ານການສໍ້ລາດບັງຫຼວງ (ສະບັບປັບປຸງ) ໝວດທີ 1 ບົດບັນ ຍັດທົ່ວໄປ, ມາດຕາ2 ການສໍ້ລາດ ບັງຫຼວງ, ໝວດທີ 2 ພຶດຕິກຳເປັນ ການສໍ້ລາດບັງຫຼວງ, ມາດຕາທີ 11 ພຶດຕິກຳທີ່ເປັນການສໍ້ລາດບັງ ຫຼວງ, ມາດຕາ 12 ການຍັກຍອກ ຊັບສິນລັດ ຫຼື ລວມໝູ່, ໝວດທີ 3 ມາດຕາການສະກັດກັ້ນການສໍ້ລາດບັງຫຼວງ,ມາດຕາ 25 ຄວາມຮັບຜິດຊອບຂອງລັດ, ມາດຕາ 26 ຄວາມຮັບຜິດຊອບຂອງອົງການຈັດຕັ້ງຕ່າງໆ, ໝວດທີ 9 ນະໂຍບາຍຕໍ່ຜູ້ທີ່ມີຜົນງານ ແລະມາດຕາການຕໍ່ຜູ້ລະເມີດມາດຕາທີ 55 ມາດຕາການຕໍ່ຜູ້ລະເມີດ.

------------

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

แชร์