ປູກຜັກອິນຊີເປັນອາຊີບເສີມສ້າງລາຍຮັບ 50 ລ້ານກີບຕໍ່ປີ

 ປະຈຸບັນຄົນສ່ວນຫຼາຍຫັນມາເອົາໃຈໃສ່ໃນການຮັກສາສຸຂະພາບ, ການບໍລິໂພກພືດຜັກ ແລະໝາກໄມ້ທີ່ເປັນຜົນປະໂຫຍດສະອາດແລະປອດສານພິດເຂົ້າສູ່ຮ່າງກາຍ ພ້ອມທັງເປັນມິດຕໍ່ສິ່ງແວດລ້ອມເຮັດໃຫ້ຮ່າງກາຍແຂງແຮງທັງຜູ້ຜະລິດ ແລະຜູ້ບໍລິໂພກ, ຍ້ອນເຫັນທ່າແຮງຂອງປະເທດເຮົາມີຄວາມອຸດົມສົມບູນມີພື້ນທີ່ເໝາະແກ່ການຜະລິດກະສິກໍາຊາວກະສິກອນຈິ່ຶງໄດ້ຫັນມາປູກພືດປອດສານພິດຫຼາຍຂຶ້ນ.

  ທ່ານ ສຸພາກອນ ທຳມະວົງ ອາຍຸ 38 ປີ ປະຈຸບັນຢູ່ບ້ານນາສະກາງ ເມືອງຊໍາເໜືອ ແຂວງຫົວພັນ ອາຊີບພະນັກງານສັງກັດຢູ່ພະແນກກວດກາພັກ-ລັດ ແຂວງຫົວພັນມີສະມາຊິກໃນຄອບຄົວ 5 ຄົນແຮງງານຕົ້ນຕໍ 2 ຄົນ, ຊຶ່ງເປັນຜູ້ໜຶ່ງທີ່ຖືເອົາອາຊີບປູກຜັກອິນຊີຂາຍເປັນສິນຄ້າເປັນອາຊີບສໍາຮອງເລົ່າສູ່ຟັງວ່າ: ໃນເບື້ອງ ຕົ້ນຕົນເອງໄດ້ໄປທັດສະນະສວນກະສິກໍາອິນຊີ ຂອງປະເທດ ສສ ຫວຽດນາມ ເຫັນ ວ່າມີຜົນໄດ້ຮັບດີຕໍ່ຊາວກະສິກອນ ແລະມີຄຸນປະໂຫຍດຕໍ່ຮ່າງກາຍຫຼາຍດັ່ງນັ້ນ, ຈຶ່ງຫັນເອົາບົດຮຽນດັ່ງກ່າວມານໍາໃຊ້ເຂົ້າໃນການຜະລິດກະສິກໍາອິນຊີຢູ່ຂົງເຂດບ້ານເຮົາ ແລະ ມີໝູ່ເພື່ອນທີ່ເປັນຄົນຫວຽດນາມຈໍານວນໜຶ່ງໄດ້ສະໜອງແນວພັນ ແລະ ເຕັກນິກໃນການປູກໃຫ້ຊຶ່ງເລີ່ມຈັດຕັ້ງປະຕິບັດມາແຕ່ມີ 2017 ສໍາລັບແຫຼ່ງທຶນແມ່ນນຳໃຊ້ທຶນຕົວເອງໂດຍຫັກຈາກເງິນເດືອນຈໍານວນໜຶ່ງໄວ້ໝູນເຮັດສວນຜັກ, ທຶນທີ່ໃຊ້ໃນການປູກຜັກຄັ້ງທຳອິດປະມານ 20-30 ລ້ານກີບ ໄດ້ຊື້ອຸປະກອນຈຳນວນໜຶ່ງມາເຮັດເຮືອນຮົ່ມ, ເນື້ອທີ່ທໍາການຜະລິດ, ແນວພັນທີ່ນໍາປູກແມ່ນຊື້ຢູ່ນະຄອນຫຼວງວຽງຈັນ ແລະປະເທດເພື່ອນບ້ານປະຈຸບັນໄດ້ສ້າງເຮືອນຮົ່ມຈໍານວນໜຶ່ງເພື່ອປູກຜັກໃຫ້ໄດ້ຕະຫຼອດປີ.

  ສຳລັບຂັ້ນຕອນໃນການປູກທໍາອິດແມ່ນໄດ້ກະກຽມພື້ນທີ່,ໄຖ່ດິນຕາກແດດໄວ້ແລ້ວເອົາປູນຂາວໂຮຍໃສ່ເພື່ອຂ້າເຊື້ອຕາກແດດໄວ້ປະມານ15 ວັນ, ຫຼັງຈາກນັ້ນ, ກໍຕີແປງເປັນໜານແລ້ວກໍເອົາຝຸ່ນຄອກມາໃສ່ຮອງພື້ນ ແລະນໍາເອົາແນວພັນຫວ່ານໄດ້, ສໍາລັບການບົວລະບັດຮັກສາແມ່ນຫົດນໍ້າເຊົ້າ-ແລງ, ຈະເນັ້ນໃສ່ຝຸ່ນຄອກ, ນໍ້າສະກັດຊີວະພາບ ແລະໄດ້ຜະລິດຈຸລິນຊີສັງເຄາະແສງຊົມໃຊ້ຖືວ່າໄດ້ຮັບຜົນພໍສົມຄວນ, ຖ້າວ່າມີພະຍາດເກີດຂຶ້ນນໍາຜັກແມ່ນຈະໃຊ້ນໍ້າໝັກສະໝຸນໄພທີ່ເຮັດເອງ 7 ມື້ຈະສີດເທື່ອໜຶ່ງເພື່ອປ້ອງກັນພະຍາດແມງໄມ້, ພືດຜັກທີ່ນໍາມາປູກອັນຫຼັກໆມີ 4 ຊະນິດຄື: ຜັກກາດ, ຜັກຫົມ, ຜັກບົ່ວ ແລະຜັກບົ້ງ, ນອກຈາກນີ້ຍັງມີຜັກສະ ຫຼັດ, ຜັກຫອມລາບປູກໝູນວຽນປະສົມປະສານກັນ, ໃຊ້ເວລາປູກປະມານໜຶ່ງເດືອນໂດຍສະເພາະຫອມບົ່ວແມ່ນ 1 ເດືອນກວ່າກໍສາມາດຈຳໜ່າຍໄດ້, ສຳລັບການຂາຍລາຄາຜັກແຕ່ລະຊະນິດຈະແຕກຕ່າງກັນເຊັ່ນ:  ຜັກບົ້ງ, ຜັກບົ່ວຈະໄດ້ລາຄາສູງ 25.000 ກີບຕໍ່ກິໂລສ່ວນຜັກກາດ, ຜັກຫົມລາຄາ 10 ພັນກີບຕໍ່ກິໂລໂດຍມີແມ່ຄ້າຈຳນວນໜຶ່ງມາຮັບຊື້ຢູ່ສວນ ແລະບາງເທື່ອກໍໄປຈໍາໜ່າຍເອງຢູ່ຕະຫຼາດເມືອງຊຳເໜືອ, ສະເລ່ຍລວມແລ້ວລາຍຮັບຈາກການຂາຍພືດ ຜັກໄດ້ 50 ລ້ານກີບຕໍ່ປີ.

  ນັບແຕ່ໄດ້ຫັນມາປູກຜັກອິນຊີເປັນອາຊີບເສີມເຮັດໃຫ້ມີລາຍຮັບເຂົ້າຄອບຄົວ ແລະກໍມີຄວາມພາກພູມໃຈຫຼາຍທີ່ໄດ້ເຮັດກິດຈະກໍາໂຕນີ້ເພາະວ່າພືດຜັກຕ່າງໆແມ່ນ ຂາດບໍ່ໄດ້ແຕ່ລະຄາບເຂົ້າ ແລະ ຜັກທີ່ຂ້າພະເຈົ້າປູກກໍແມ່ນຜັກທີ່ສະອາດປອດສານຜິດ 100% ບໍ່ໄດ້ນໍາໃຊ້ສານເຄມີເຂົ້າໃນການຜະລິດ, ພືດຜັກປອດສານຜິດພວມ ເປັນທີ່ນິຍົມຂອງທ້ອງຕະຫຼາດປອດໄພທັງຜູ້ຜະລິດ ແລະຜູ້ບໍລິໂພກຊຶ່ງລາຍຮັບຈາກການຂາຍຜັກສາມາດປຸກເຮືອນຮົ່ມ ແລະໃຊ້ສອຍໃນຊີວິດປະຈໍາວັນ. ຖ້າຫາກວ່າຜູ້ໃດມີຄວາມສົນໃຈທີ່ຈະເຮັດອາຊີບເສີມ ຫຼື ອາຊີບຫຼັກສຳລັບການປູກພືດເປັນສິນຄ້າກໍສາມາດເຮັດໄດ້ໂດຍສະເພາະປູກຜັກປອດສານຜິດເຫັນວ່າສັງຄົມມີຄວາມຕ້ອງ ການສູງເພື່ອຮັກສາສຸຂະພາບ.

  ແຜນໃນຕໍ່ໜ້າຈະຂະຫຍາຍເຮືອນຮົ່ມເພີ່ມຂຶ້ນອີກເພື່ອໃຫ້ສາມາດປູກຜັກໄດ້ທຸກລະດູການຮັກສາກໍງ່າຍ ແລະຈະຊອກແຮງງານຊ່ວຍໃນການຜະລິດເພື່ອຈະຂະຫຍ າຍຜົນຜະລິດພືດຜັກປອດສານຜິດຫຼາຍສາມາດຕອບສະໜອງໃຫ້ທົ່ວຕະຫຼາດເທສະບານເມືອງຊໍາເໜືອ.

ທ່ານ ວອນເພັດ ພົມມະສອນ ຮອງນາຍບ້ານໆນາສະກາງ ເມືອງຊໍາເໜືອ ແຂວງຫົວພັນ ໄດ້ຢັ້ງຢືນວ່າ: ຄອບຄົວສະຫາຍ ສຸພາກອນ ເປັນພະນັກງານລັດທີ່ມີຄວາມເອົາໃຈໃສ່ໃນການທໍາມາຫາກິນໃຊ້ເວລາຫວ່າງເຮັດອາຊີບເສີມເພື່ອສ້າງເສດຖະກິດຄອບຄົວໃນການປູກຜັກປອດສານຜິດຂາຍເປັນສິນຄ້າສົ່ງໃຫ້ຕະຫຼາດຊໍາເໜືອ ແລະເປັນແບບຢ່າງໃຫ້ແກ່ຄອບຄົວພະນັກງານລັດພ້ອມທັງພໍ່ແມ່ປະຊາຊົນອື່ນໆພາຍໃນບ້ານສາມາດນໍາເອົາບົດຮຽນຂອງເພິ່ນໄປເສີມຂະຫຍາຍຈັດຕັ້ງປະຕິບັດໃຫ້ປາກົດຜົນເປັນຈິງ.

-----------

ຂຽນໂດຍ: ຈິງອັ່ງ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์