ທ່າຝຣັ່ງ ວັງນໍ້າສີຂຽວມໍລະກົດ ແຫ່ງເມືອງທ່າແຂກ

   ເມືອງທ່າແຂກ ແຂວງຄຳມ່ວນ ທີ່ຕັ້ງຢູ່ທາງພາກກາງຂອງ ສປປ ລາວ ເປັນແຂວງທີ່ມີແຫຼ່ງ ທ່ອງທ່ຽວທາງທຳມະຊາດຫຼາຍແຫ່ງທີ່ສວຍງາມ.ທ່າຝຣັ່ງເປັນ ຈຸດທ່ອງທ່ຽວໜຶ່ງທີ່ສາມາດດຶງ ດູດນັກທ່ອງທ່ຽວທັງພາຍໃນ ແລະ ຕ່າງປະເທດເຂົ້າມາທ່ຽວຊົມເປັນຈຳນວນຫຼວງຫຼາຍ ຊຶ່ງຫ່າງຈາກ ຕົວເມືອງທ່າແຂກປະມານ 10 ກິໂລແມັດໄປຕາມເສັ້ນທາງລາວ-ຫວຽດນາມ.

ທ່າຝຣັ່ງ ເປັນແຫຼ່ງທ່ອງທ່ຽວທາງທຳມະຊາດ ດ້ວຍສາຍນໍ້າທີ່ມີສີຂຽວມໍລະກົດ ບວກກັບຄວາມເປັນທຳມະຊາດທີ່ສວຍງາມສະດຸດຕາຂອງພູຜາປ່າໄມ້ຫີນປູນຈຶ່ງເຮັດໃຫ້ທ່າຝຣັ່ງແຫ່ງນີ້ເປັນຈຸດທີ່ນັກທ່ອງທ່ຽວທັງພາຍໃນ ແລະຕ່າງປະເທດນິຍົມເຂົ້າມານັ່ງຫຼິ້ນ ພັກຜ່ອນສ້າງສັນກັນໃນວັນພັກ ເປັນຈຳນວຫຼວງຫຼາຍ. ເມື່ອເຂົ້າມາພາຍໃນທ່າຝຣັ່ງແຫ່ງນີ້ຈະມີອາຫານ, ເຄື່ອງດື່ມຫຼາກຫຼາຍຢ່າງ ໄວ້ໃຫ້ບໍລິການ ແລະມີຕູບນ້ອຍລອຍແພລຽບຕາມແຄມນໍ້າທັງສອງຝັ່ງ ພ້ອມກັບມີຂົວຂ້າມໄປ ມາຫາສູ່ກັນໄດ້ຢ່າງສະດວກສະບາຍນອກນັ້ນຍັງມີບໍລິການເຊົ່າ ເສື້ອຊູຊີບເພື່ອລອຍຫຼິ້ນນໍ້າ ແລະ ພາຍເຮືອລ່ອງແພຕາມສາຍນໍ້າທີ່ມີສີຂຽວມໍລະກົດ ຊົມຄວາມເປັນ ທຳມະຊາດພູຜາ

ປ່າໄມ້ຫີນປູນ.ເມື່ອມາເຖິງສະຖານທີ່ແຫ່ງນີ້ຫຼາຍໆ ຄົນມັກຈະເວົ້າວ່າທ່າຝຣັ່ງແຕ່ພໍມາແລ້ວກັບບໍ່ເຫັນຄົນຝຣັ່ງ (ຄົນຕ່າງປະເທດ). ຄວາມເປັນມາຂອງທ່າຝຣັ່ງແຫ່ງນີ້ທີ່ຜູ້ເຖົ້າຊາວບ້ານແຖວນັ້ນໃຫ້ຮູ້ວ່າ: ເມື່ອກ່ອນທ່າແຂກເປັນຫົວເມືອງຂຶ້ນຂອງພວກຕ່າງຊາດທີ່ເຂົ້າມາຍຶດອຳນາດ ແລະປົກຄອງຈຸດວັງນໍ້າສີຂຽວມໍລະກົດແຫ່ງນີ້ເລີຍເປັນຈຸດທີ່ພວກຝຣັ່ງຕ່າງຊາດມັກຈະໃຊ້ແມ່ນໍ້າແຫ່ງນີ້ເປັນຈຸດຊຳລະລ້າງຮ່າງກາຍເມື່ອປະຊາຊົນແຖວນັ້ນໄປມາເຫັນຈຶ່ງໄດ້ເອີ້ນທ່ານໍ້າແຫ່ງນີ້ວ່າທ່າຝຣັ່ງຈົນເຖິງປະຈຸ ບັນນີ້ນັ້ນເອງ.

  ຢ່າງໃດກໍ່ຕາມຖ້ານັກທ່ອງທ່ຽວທ່ານໃດມີຄວາມສົນໃຈກໍ່ສາມາດໄປທ່ຽວຊົມສຳພັດຕົວຈິງກັບຄວາມເປັນທຳມະຊາດແມ່ນໍ້າສີຂຽວມໍລະກົດ ແລະພູຜາຫີນປູນທີ່ສູງຊັນ. ເອົາເປັນວ່າຖ້າມີໂອກາດມາ ທ່າແຂກ ແຂວງຄຳມ່ວນ ກໍ່ຢ່າລືມ ແວະໄປທ່ຽວຊົມສະຖານທີ່ແຫ່ງນີ້ເຊື່ອວ່າທ່ານຈະບໍ່ຜິດຫວັງແນ່ນອນ.

-------------

ຂຽນໂດຍ: ສອນມະນີ ໄຊສະຫວັດ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

• 22/08/2019