ແສງອາລຸນກຽມພ້ອມເປີດສົກຮຽນໃໝ່

 ໂຮງຮຽນອະນຸບານ-ປະຖົມແສງອາລຸນມີຄວາມກຽມພ້ອມຮອບດ້ານໃນການເປີດສົກຮຽນໃໝ່ເພື່ອຮັບເອົານ້ອງນັກຮຽນເຂົ້າບັນຈຸໃນສົກປີ 2019-2020 ຈໍານວນ 600-700 ຄົນ,ຂະນະທີ່ໂຮງຮຽນເນັ້ນຄູສິດສອນຖ່າຍທອດຄວາມຮູ້ສູ່ນັກຮຽນຢ່າງມີປະສິດທິພາບສູງຂຶ້ນພ້ອມຮຽກຮ້ອງຜູ້ປົກຄອງມີສ່ວນຮ່ວມຕໍ່ການຮໍ່າຮຽນຂອງລູກຫຼານ.

  ທ່ານ ໄຊປັນຍາ ທອງມະນີລາ ຮອງຜູ້ອໍານວຍການໂຮງຮຽນອະນຸບານ-ປະຖົມແສງອາລຸນບ້ານໂນນດູ່ ນະຄອນປາກເຊ ແຂວງຈໍາປາສັກ,ໄດ້ໃຫ້ສໍາພາດຕໍ່ນັກຂ່າວໜັງສື ພິມເສດຖະກິດ-ສັງຄົມເມື່ອບໍ່ດົນມານີ້ວ່າ: ປະຈຸບັນທາງໂຮງຮຽນແມ່ນໄດ້ມີຄວາມກຽມພ້ອມຮອບດ້ານໃນການກຽມເປີດສົກຮຽນໃໝ່ບໍ່ວ່າດ້ານພື້ນຖານໂຄງ ລ່າງ, ອາຄານສະຖານທີ່ໂຕະ, ຕັ່ງ ນອກຈາກນີ້ແມ່ນໄດ້ກະກຽມການສິດສອນຂອງຄູ,ກະກຽມບົດສອນຕ່າງໆ, ກະກຽມອຸປະກອນການຮຽນ-ການສອນພ້ອມທັງໄດ້ສົ່ງຄູເຂົ້າຮ່ວມຍົກລະດັບການຮຽນ-ການສອນ ໃນໄລຍະພັກ ຮຽນຢູ່ຂັ້ນແຂວງ ແລະກະຊວງເພື່ອໃຫ້ ແທດເໝາະກັບການຮໍ່າຮຽນຂອງລູກຫຼານໃນປະຈຸບັນ ແລະໃຫ້ສາມາດສົ່ງຄວາມຮູ້ສູ່ນັກຮຽນໄດ້ຢ່າງເຕັມມິດເຕັມໜ່ວຍ, ທັງເປັນການເຮັດໃຫ້ຄູສາມາດພັດທະນາຕົນເອງ, ໃນການສິດສອນຊຶ່ງມາຮອດປະຈຸບັນແມ່ນມີຄວາມກຽມ ພ້ອມ100% ແລະຄາດວ່າຈະຮັບນັກຮຽນທັງອະນຸບານ ແລະປະຖົມທັງໝົດປະມານ 600-700 ຄົນ.

  ທ່ານຮອງຜູ້ອໍານວຍໃຫ້ຮູ້ຕື່ມວ່າ: ປີນີ້ທາງໂຮງຮຽນແມ່ນຈະເນັ້ນການຮຽນ-ການສອນພາກປະຕິບັດຕົວຈິງຫຼາຍຂຶ້ນເພື່ອເຮັດໃຫ້ເດັກນ້ອຍໄດ້ສໍາຜັດ ແລະມີຄວາມຮັບຮູ້ໄວກັບບົດຮຽນທີ່ຄູສອນໃຫ້ເຊັ່ນ: ການຮຽນພາກວິທະຍາສາດແມ່ນຈະພານັກຮຽນໄປເບິ່ງຕົວຈິງ, ພາໄປທັດສະນະສຶກສາ, ການເຮັດບົດສອນຕ້ອງມີອຸປະກອນການສອນທີ່ແທດເໝາະກັບສະພາບຕົວຈິງນອກຈາກນີ້ຄູແມ່ນຈະໄດ້ຕິດຕາມການຮຽນຂອງນັກຮຽນຢ່າງເປັນປະຈໍາ, ມີການປະສານສົມທົບກັບຜູ້ປົກຄອງນັກຮຽນ, ການເຮັດວຽກບ້ານອື່ນໆກໍຕ້ອງມີສ່ວນຮ່ວມນຳ.

 ຢ່າງໃດກໍ່ຕາມຮອງຜູ້ອໍານວຍການຍັງໄດ້ຮຽກຮ້ອງເຖິງພໍ່ແມ່ຜູ້ປົກຄອງ ແລະສັງຄົມຊຶ່ງເປັນພາກສ່ວນໜຶ່ງສຳຄັນໃນການສົ່ງເສີມການສຶກສາກໍຄວນໃຫ້ຄວາມເອົາໃຈໃສ່ຕໍ່ການຮໍ່າຮຽນຂອງລູກຫຼານຫຼາຍຂຶ້ນໂດຍສະເພາະແມ່ນຜູ້ເປັນພໍ່ແມ່ຕ້ອງໄດ້ຕິດຕາມເອົາໃຈໃສ່ໃຫ້ຄວາມອົບອຸ່ນຕໍ່ລູກຂອງຕົນ, ເອົາໃຈໃສ່ໃນການມາໂຮງຮຽນ, ການເຮັດວຽກ ບ້ານ, ການມາໂຮງຮຽນແມ່ນບໍ່ໃຫ້ຂາດ ຖ້າບໍ່ຈໍາເປັນ.

-------

ຂຽນໂດຍ: ໂພທິຣາຊ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์