7 ເດືອນ ເມືອງປາກລາຍເກັບລາຍຮັບໄດ້ 63,92% ຂອງແຜນການປີ

 ການຈັດຕັ້ງປະຕິບັດຈັດເກັບລາຍຮັບເຂົ້າງົບປະມານໃນປີ 2019 ຂອງຫ້ອງການການເງິນ ເມືອງປາກລາຍ ແຂວງໄຊຍະບູລີ ໄດ້ຮັບຕົວເລກແຜນການ 12,61 ຕື້ກີບ,ຜ່ານການຈັດຕັ້ງປະຕິບັດຕົວຈິງໃນ 7 ເດືອນຜ່ານມາສາມາດປະຕິບັດລາຍຮັບໄດ້ 8 ຕື້ກວ່າກີບ ເທົ່າກັບ63,92% ຂອງແຜນການປີ, ຄາດຄະເນໝົດປີຈະບັນລຸໄດ້ແຜນການ 100%.

  ທ່ານ ບຸນໝັ້ນ ເສີມມາ ຫົວໜ້າຫ້ອງການ-ການເງິນ ເມືອງປາກລາຍ ໃຫ້ຮູ້ວ່າ: ຕະຫຼອດໄລຍະຜ່ານມາພະນັກງານຫ້ອງການການເງິນເມືອງປາກລາຍມີຄວາມເປັນເຈົ້າການໃນການປະຕິບັດໜ້າທີ່ທີ່ໄດ້ຮັບການມອບໝາຍ ແລະມີຜົນສໍາເລັດຫຼາຍດ້ານຊຶ່ງໃນໄລຍະ 5 ປີຜ່ານມາສາມາດເກັບລາຍຮັບເຂົ້າງົບປະມານໄດ້ທັງໝົດ 74,51 ຕື້ກີບ ເທົ່າກັບ 99,99% ຂອງແຜນການ, ໃນນີ້ສ່ວຍສາອາກອນປະຕິບັດໄດ້ 68,64 ຕື້ກີບ, ຊັບສິນ 2,82 ຕື້ກີບ ແລະພາສີປະຕິບັດໄດ້ 3,04 ຕື້ກີບ, ສ່ວນດ້ານລາຍຈ່າຍປະຕິບັດໄດ້ 135,75 ຕື້ກີບ ເທົ່າກັບ 90,69% ຂອງແຜນການ; ຂົງເຂດການເງິນຈຸລະພາກສາມາດປ່ອຍສິນເຊື່ອໃຫ້ລູກຄ້າໄດ້ທັງໝົດ 1,5 0 ຕື້ກີບ ເທົ່າກັບ 70% ຂອງແຜນການ.

  ສໍາລັບໃນປີ 2019 ນີ້ເມືອງປາກລາຍໄດ້ຮັບຕົວເລກແຜນການຈັດເກັບລາຍຮັບຈາກແຂວງໄຊຍະບູລີ ທັງໝົດ 12,61 ຕື້ກີບ. ຜ່ານການຈັດຕັ້ງປະຕິບັດຕົວຈິງໃນໄລຍະ 7 ເດືອນຜ່ານມາເຫັນວ່າຫ້ອງການ-ການເງິນ ເມືອງປາກລາຍ ສາມາດປະຕິບັດການຈັດເກັບລາຍຮັບເຂົ້າງົບປະມານຂອງລັດໄດ້ທັງໝົດ 8,06 ຕື້ກີບ ເທົ່າ ກັບ 63,92% ຂອງແຜນການປີໃນນັ້ນລາຍຮັບສ່ວຍສາອາກອນປະຕິບັດໄດ້ 7,93 ຕື້ກີບເທົ່າກັບ 65,39% ຂອງແຜນການປີ, ລາຍຮັບຊັບສິນຂອງລັດປະຕິບັດໄດ້ 126,73 ລ້ານກີບ ເທົ່າກັບ 26,54% ຂອງແຜນການປີ.

  ທ່ານ ບຸນໝັ້ນ ເສີມມາ ໃຫ້ຮູ້ຕື່ມວ່າ: ທິດທາງທ້າຍປີ 2019 ນີ້ຫ້ອງການ-ການເງິນເມືອງປາກລາຍຈະສຸມໃສ່ວຽກງານສຶກສາອົບຮົມແນວຄິດໃຫ້ພະນັກງານໃຫ້ເປັນປົກກະຕິ, ແບ່ງວຽກແບ່ງຄວາມຮັບຜິດຊອບໃນການຊີ້ນໍາຕິດຕາມກວດກາ ແລະ ປະຕິບັດຕົວຈິງຂອງວິຊາການພ້ອມປະເມີນຜົນ, ການຊຸກຍູ້ລາຍຮັບຕາມການແບ່ງຂັ້ນຄຸ້ມຄອງເປັນຕົ້ນແມ່ນລາຍຮັບທີ່ເມືອງຄຸ້ມຄອງຈັດເກັບ, ບ້ານ ແລະຫ້ອງການທີ່ມີລາຍຮັບ; ກວດຄືນບັນດາຫ້າງຮ້ານ, ຜູ້ປະກອບການທີ່ຍັງຄ້າງພັນທະອາ ກອນ ແລະພາສີທີ່ດິນຕ້ອງໄດ້ເສຍພັນທະຕາມລະບຽບການ, ມີມາດຕະການຕໍ່ຜູ້ລະເມີດ, ກວດກາຖານລາຍຮັບທີ່ມີ ແລະເກີດຂຶ້ນໃໝ່ພາຍໃນເມືອງວາງກົນໄກຄຸ້ມ ຄອງໃຫ້ຖືກຕ້ອງສອດຄ່ອງກັບລະບຽບກົດໝາຍ, ສູ້ຊົນປະຕິບັດລາຍຮັບ 5 ເດືອນທ້າຍປີໃຫ້ໄດ້ 4,55 ຕື້ກີບ ຄາດຄະເນໝົດປີໃຫ້ໄດ້ 12,61 ຕື້ກີບ ຫຼື ເທົ່າກັບ 100% ຂອງແຜນການປີ.

  ນອກຈາກນັ້ນຫົວໜ້າຫ້ອງການ-ການເງິນເມືອງປາກລາຍຍັງໄດ້ຮຽກຮ້ອງມາຍັງຄະນະພັກແຕ່ລະຂັ້ນ, ຂະແໜງການ ແລະອົງການປົກຄອງບ້ານຈົ່ງຊ່ວຍຊີ້ນຳ-ນຳພາຈັດຕັ້ງປະຕິບັດຄາດໝາຍຕາມແຜນການ, ລາຍຮັບ-ລາຍ ຈ່າຍທ້າຍປີ ແລະຄາດຄະເນໝົດປີບັນລຸຕາມແຜນການທີ່ວາງໄວ້.

---------

ຂຽນໂດຍ: ກິ່ງລັດຕະນະ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์