ຍີ່ປຸ່ນ ຂາດດຸນການຄ້າ 2,34 ຕື້ໂດລາ

  ກະຊວງການເງິນຍີ່ປຸ່ນເປີດ ເຜີຍໃນລາຍງານເບື້ອງຕົ້ນລະບຸວ່າ ຍີ່ປຸ່ນມີຍອດຂາດດຸນການຄ້າ ເດືອນ ກໍລະກົດຢູ່ທີ່ 2,49 ຮ້ອຍຕື້ເຢນ (2,34 ຕື້ໂດລາສະຫະລັດ) ໂດຍ ໄດ້ຮັບແຮງກົດດັນຈາກຍອດສົ່ງອອກໄປຍັງ ສປ ຈີນ ທີ່ປັບຕົວຫຼຸດ ລົງທ່າມກາງສົງຄາມການຄ້າຈີນ ແລະອາເມລິກາທີ່ຍັງດຳເນີນຢູ່.

ຕາມຂ່າວຕ່າງປະເທດລາຍ ງານວ່າກະຊວງການເງິນຂອງຍີ່ ປຸ່ນລະບຸໃນວັນທີ 19 ສິງຫາທີ່ຜ່ານມາວ່າຍີ່ປຸ່ນມີຍອດຂາດດຸນການຄ້າດັ່ງກ່າວໃນເດືອນກໍລະກົດ ຫຼັງຈາກທີ່ເກີນດຸນການຄ້າມູນຄ່າ 5,89 ຮ້ອຍຕື້ເຢນ ໃນເດືອນມິຖຸນາ ທີ່ຜ່ານມາ,ສ່ວນຍອດສົ່ງອອກ ໃນເດືອນກໍລະກົດຫຼຸດລົງ 1,6% ເມື່ອທຽບເປັນລາຍປີສູ່ລະດັບ 6,64 ພັນຕື້ເຢນ ສ້າງສະຖິຕິຫຼຸດ ລົງຕິດຕໍ່ກັນເປັນເດືອນທີ 3 ຂະນະ ທີ່ຍອດນໍາເຂົ້າເດືອນກໍລະກົດຫຼຸດ ລົງ 1,2% ສູ່ລະດັບ 6,89 ພັນຕື້ ເຢນ ຊຶ່ງຫຼຸດລົງຕິດຕໍ່ກັນເປັນເດືອນ ທີ 3, ຊຶ່ງຍີ່ປຸ່ນມີຍອດນໍາເຂົ້າຈາກຈີນເພີ່ມຂຶ້ນ 2,8% ໃນເດືອນກໍລະກົດເມື່ອທຽບເປັນລາຍປີແຕ່ ຍອດສົ່ງອອກຊຶ່ງລວມທັງອາໄຫຼ່ລົດ ແລະອຸປະກອນສຳລັບຜະລິດ ເຊມິຄອນດັກເຕີຫຼຸດລົງ 9,3% ສົ່ງຜົນເຮັດໃຫ້ຍີ່ປຸ່ນມີຍອດຂາດ ດຸນການຄ້າກັບຈີນຢູ່ທີ່ 3,83 ຮ້ອຍຕື້ເຢນ.ຂະນະດຽວກັນຍີ່ປຸ່ນ ມີຍອດເກີນດຸນກັບປະເທດອາຊີ ຊຶ່ງລວມທັງຈີນຫຼຸດລົງ 64,6% ຈຸລະດັບ 1,88 ຮ້ອຍຕື້ເຢນ ເນື່ອງ ຈາກຍອດສົ່ງອອກໄປຍັງພາກພື້ນດັ່ງກ່າວຫຼຸດລົງ 8,3%.

ສ່ວນການຄ້າກັບອາເມລິການັ້ນ ຍີ່ປຸ່ນມີຍອດເກີນດຸນການຄ້າກັບອາເມລິກາເພີ່ມຂຶ້ນ 15,6% ໃນເດືອນກໍລະກົດເມື່ອທຽບເປັນລາຍປີຈຸລະດັບ 5,79 ຮ້ອຍຕື້ເຢນສ້າງສະຖິຕິເກີນດຸນຕິດຕໍ່ກັນເປັນ ເດືອນທີ 5.

ພາບ ແລະຂາ່ວຂາກ: ໜັງສືພິມເສດຖະກິດ-ສັງຄົມ

แชร์