ວັດຊຽງຄວນ ສະຖານທີ່ທ່ອງທ່ຽວ ທາງວັດທະນະທຳ

   ຖ້າເວົ້າເຖິງແຫຼ່ງທ່ອງທ່ຽວ ວັດທະນະທໍາທີ່ຢູ່ບໍ່ໃກ້ບໍ່ໄກຈາກຕົວ ເມືອງນະຄອນຫຼວງວຽງຈັນ ແລະເໝາະແກ່ການເດີນທາງໃນຍາມວັນພັກນັ້ນນັບວ່າມີຢ່າງຫຼວງ ຫຼາຍແຕ່ຖ້າຕ້ອງການຢາກຊຶມຊັບກັບ ບັນຍາກາດ, ຄວາມງົດງາມຂອງ ວັດທະນາທໍາ ແລະຄົງໄວ້ ຊຶ່ງຄວາມອຸດົມສົມບູນນັ້ນອາດແມ່ນ ແຫຼງທ່ອງທ່ຽວ “ວັດຊຽງຄວນ” ຕັ້ງຢູ່ແຄມແມ່ນໍ້າຂອງໃກ້ຂົວມິດຕະພາບລາວ-ໄທ 1 ເຂດບ້ານຊຽງຄວນ ເມືອງຫາດຊາຍຟອງ ນະຄອນຫຼວງວຽງຈັນ.

ວັດຊຽງຄວນ ເປັນສະຖານທີ່ທ່ອງທ່ຽວທາງວັດທະນະທຳທີ່ປະກອບໄປດ້ວຍຮູບປັ້ນຕ່າງໆ ບໍ່ວ່າຈະເປັນຮູບປັ້ນຕັ້ງແຕ່ນາຄາພິ ພົບ,ສະຫວັນທັງຫົກ,ພົມສິບຫົກ ແລະຮູບປັ້ນພະພຸດທະເຈົ້ານັບແຕ່ ປະສູດຈົນເຖິງປະລິນິພານ, ຊຶ່ງວ່າເປັນອີກແຫຼ່ງທ່ອງທ່ຽວໜຶ່ງທີ່ຮູ້ຈັກກັນແຜ່ຫຼາຍ ໂດຍແຕ່ລະມື້ມີນັກທ່ອງທ່ຽວເຂົ້າທ່ຽວຊົມບໍ່ຂາດສາຍ, ວັດຊຽງຄວນ ກໍ່ສ້າງຂຶ້ນ ເມື່ອປີ 1962 ແລະສຳເລັດການກໍ່ສ້າງເມື່ອປີ 1971 ໂດຍການນຳພາກໍ່ສ້າງອອກແບບ ແລະລະດົມ ສັດທາ ຈາກພໍ່ຂາວ ບຸນເຫຼືອສຸຣິຣັດ ຫຼື

ຫຼວງປູ່ ບຸນເຫຼືອ ສຸຣິຣັດ ດ້ວຍ ເປົ້າໝາຍເພື່ອເປັນອຸທະຍານທີ່ມີຮູບປັ້ນເທວະຮູບ ຢັງຢາຍໄຮ້ລະບຽບ 300 ອົງ ຊຶ່ງບັນດາຮູບປັ້ນ ທີ່ກໍ່ສ້າງຂຶ້ນລ້ວນແຕ່ປະສົມປະ ສານກັນຢ່າງລົງໂຕ ໂດຍສ່ອງແສງ ໃຫ້ເຫັນທັງສາສະໜາພຸດ, ຮິນດູ,ການປະສູດຕັດສະຮູ້ ແລະປະລິນິພານຂອງສົມເດັດພະສຳມາສຳພຸດທະເຈົ້າ, ຮູບປັ້ນທີ່ສ່ອງແສງໃຫ້ ເຫັນພົມ, ເທບ, ບາບບຸນຄຸນໂທດ, ການເກີດແກ່ເຈັບຕາຍຂອງມະນຸດ, ບາງນິທານຂອງລາວ ແລະອິນເດຍ.

ມາຮອດປະຈຸບັນ, ວັດຊຽງ ຄວນ ໄດ້ຮັບການປັບປຸງປົວແປງຄືນໃໝ່ ແລະໄດ້ສ້າງສິ່ງເອື້ອອໍານວຍເພື່ອຮອງຮັບນັກທ່ອງທ່ຽວ ເຂົ້າມາທ່ຽວຊົມບໍ່ວ່າຈະເປັນສະຖານທີ່ຊົມວິວສະຖານທີ່ທ່ຽວຊົມ, ຮ້ານອາຫານ-ກິນດື່ມ ແລະສິ່ງ ອຳນວຍຄວາມສະດວກອື່ນໆ ໄວ້ຄອຍບໍລິການຢ່າງສະດວກສະບາຍ.ຖ້າທ່ານໃດຫາກຮູ້ສຶກວ່າຕົນເອງຍັງບໍ່ທັນໄດ້ໄປທ່ຽວຊົມວັດ ຊຽງຄວນ ເທື່ອກໍຄວນໃຫ້ເວລາ ຕົນເອງພ້ອມຄອບຄົວ ຫຼື ຄົນຮັກເພື່ອໄດ້ໄປທ່ຽວຊົມ ແລະສໍາພັດກັບ ວັດທະນະທໍາທີ່ສວຍສົດງົດງາມຂອງສວນແຫ່ງນີ້ຈະຊ່ວຍໃຫ້ທ່ານ ມີຄວາມສຸກໄປກັບບັນຍາກາດອັນແສນສົດຊື່ນແຫ່ງນີ້.

----------------

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

แชร์