ລາວ ແລະຫວຽດນາມ ແລກປ່ຽນບົດຮຽນວຽກງານກວດກາ

  ໃນລະຫວ່າງວັນທີ 15-18 ສິງຫາ 2019 ຄະນະຜູ້ແທນຂັ້ນສູງຄະນະກວດກາສູນກາງພັກປະຊາຊົນປະຕິວັດລາວ, ນໍາໂດຍສະຫາຍ ບຸນທອງ ຈິດມະນີ ກໍາມະການກົມການເມືອງສູນກາງພັກ, ເລຂາທິການສູນກາງພັກ, ຮອງນາຍົກລັດຖະມົນຕີ, ປະທານຄະນະກວດກາສູນກາງພັກປະຊາຊົນປະຕິວັດລາວ, ປະທານອົງການກວດກາລັດຖະບານ ສປປ ລາວ,ຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງພ້ອມຄະນະທັງໝົດ 8 ສະຫາຍ,ໄດ້ເດີນທາງໄປຢ້ຽມຢາມ,ແລກປ່ຽນບົດຮຽນກ່ຽວກັບຄະນະກໍາມະການກວດກາສູນກາງພັກກອມມູນິດຫວຽດນາມ ຊຶ່ງນໍາໂດຍສະຫາຍ ເຈີນເກີ້ມຕູ໋ ເລຂາທິການສູນກາງພັກ, ປະທານຄະນະກໍາມະການກວດກາສູນກາງພັກກອມມູນິດຫວຽດນາມພ້ອມດ້ວຍຄະນະ, ທີ່ແຂວງຮ່າຕິ່ງ, ສສຫວຽດນາມ.

 ໂອກາດດັ່ງກ່າວ, ສະຫາຍ ເຈີນເກີ້ມ ຕູ໋ ແລະ ສະຫາຍ ເລ ມິ່ງ ຄາຍ ກຳມະການສູນກາງພັກ, ປະທານອົງການກວດກາລັດຖະບານ ສສ ຫວຽດນາມ ພ້ອມຄະນະ ໄດ້ຕ້ອນຮັບຄະນະຜູ້ແທນຂັ້ນສູງຄະນະກວດກາສູນກາງພັກ-ອົງການກວດກາລັດຖະບານ ສປປ ລາວ ພ້ອມທັງຕີລາຄາສູງຕໍ່ການມາຢ້ຽມຢາມ, ແລກປ່ຽນບົດຮຽນເຮັດວຽກຂອງຄະນະຜູ້ແທນໃນຄັ້ງນີ້ແມ່ນມີຄວາມໝາຍສໍາຄັນເປັນຢ່າງຍິ່ງເປັນການປະກອບສ່ວນອັນສໍາຄັນເຂົ້າໃນການເພີ່ມພູນຄູນສ້າງສາຍພົວພັນມິດຕະພາບ, ຄວາມສາມັກຄີພິເສດ ແລະການຮ່ວມມືຮອບດ້ານລະຫວ່າງສອງພັກ, ສອງລັດກໍຄືປະຊາຊົນສອງຊາດຫວຽດນາມ-ລາວ ໃຫ້ຈະເລີນງອກງາມຍິ່ງໆຂຶ້ນ, ເວົ້າສະເພາະການພົວພັນຮ່ວມມືຊ່ວຍເຫຼືອເຊິ່ງກັນ ແລະ ກັນລະຫວ່າງຄະນະກວດກາສູນກາງພັກປະຊາຊົນປະຕິວັດລາວກັບຄະນະກໍາມະການກວດກາສູນກາງພັກກອມມູນິດ ຫວຽດນາມໃຫ້ໝັ້ນຄົງຖະນົງແກ່ນຕະຫຼອດໄປ.

  ການພົບປະແລກປ່ຽນບົດຮຽນຄັ້ງນີ້, ທັງສອງຝ່າຍໄດ້ຜັດປ່ຽນກັນແຈ້ງສະພາບວຽກງານການນຳພາຂອງພັກ, ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະການຈັດຕັ້ງປະຕິບັດໜ້າທີ່ວຽກງານກວດກາພັກ, ກວດກາລັດ ແລະວຽກງານຕ້ານການສໍ້ລາດບັງຫຼວງໃນ 1 ປີຜ່ານມາພ້ອມທັງແລກປ່ຽນຄໍາຄິດເຫັນກ່ຽວກັບບັນຫາທີ່ຕ່າງຝ່າຍໃຫ້ຄວາມສົນໃຈ. ຊຶ່ງທັງສອງຝ່າຍເຫັນກົງກັນວ່າວຽກງານກວດກາພັກ-ກວດກາລັດ ແລະຕ້ານການ ສໍ້ລາດບັງຫຼວງເປັນວຽກງານໜຶ່ງທີ່ສໍາຄັນ ແລະຈໍາເປັນແມ່ນພາລະບົດບາດໜຶ່ງຂອງພັກ-ລັດໃນການຊີ້ນໍາ-ນໍາພາ, ເພື່ອປະກອບສ່ວນໃນການພັດທະນາເສດຖະກິດ-ສັງຄົມ, ສັງຄົມມີຄວາມສະຫງົບ ແລະ ຄວາມຢູ່ເຢັນເປັນສຸກຂອງປະຊາຊົນບັນດາເຜົ່າ.

 ໃນໂອກາດໄປຢ້ຽມຢາມແລກປ່ຽນບົດຮຽນຢູ່ ສສ ຫວຽດນາມໃນຄັ້ງນີ້, ຄະນະຜູ້ແທນຂັ້ນສູງຄະນະກວດກາສູນກາງພັກປະຊາຊົນປະຕິວັດລາວຍັງໄດ້ເຂົ້າຢ້ຽມຂໍານັບ ສະຫາຍ ຫງວຽນ ຊວນ ຟຸກ ນາຍົກລັດຖະມົນຕີ ສສ ຫວຽດນາມ ແລະສະຫາຍ ເຈີນ ກັວກ ເຫວື່ອງ ຜູ້ປະຈໍາການຄະນະເລຂາທິການສູນກາງພັກກອມມູນິດຫວ ຽດນາມທີ່ນະຄອນຫຼວງຮ່າໂນ້ຍແລະໄດ້ໄປຢ້ຽມຊົມສະຖານທີ່ສໍາຄັນຂອງແຂວງຮ່າຕິ່ງເປັນຕົ້ນແມ່ນສະຖານທີ່ລະນຶກຂອງນັກກະວີຊື່ດັງ ຫວຽນຊູ ແລະສະຖານທີ່ສັກກະລະບູຊາ ດົ້ງລົກ ຕື່ມອີກ.  

----------

ພາບ  ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์