ນາຍົກຢ້ຽມຢາມໂຄງການພິກປີ້ນຊີວິດຄົນຂໍທານ 2 ບ້ານກາຍເປັນຜູ້ຮູ້ສ້າງຢູ່ທຳກິນ

  ພາຍຫຼັງສຳເລັດຢ້ຽມຢາມ ແລະເຮັດວຽກທີ່ແຂວງສາລະວັນ ໃນວັນທີ 14 ສິງຫາ 2019 ທ່ານ ທອງລຸນ ສີສຸລິດ ນາຍົກລັດຖະມົນຕີພ້ອມດ້ວຍຄະນະກໍໄດ້ສືບຕໍ່ທີ່ແຂວງສະຫວັນນະເຂດໜຶ່ງໃນນັ້ນໄດ້ລົງຢ້ຽມຢາມບ້ານຄຳປ່າແໜ ແລະ ບ້ານປ່າກ້ວຍທີ່ນອນໃນໂຄງການມີສ່ວນຮ່ວມຂອງໂຮງງານຜະລິດນໍ້າດື່ມ ແລະ ນໍ້າກ້ອນໂລມາຄຳເພື່ອລຶບລ້າງຄວາມທຸກຍາກຂອງປະຊາຊົນ( ຄົນຂໍທານ ) ທີ່ເມືອງຈຳພອນ ຊຶ່ງໃຫ້ການຕ້ອນຮັບ ແລະນຳພາລົງຢ້ຽມຢາມຂອງທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ ໂດຍມີພໍ່ແມ່ປະຊາຊົນໃນ 2 ບ້ານໃຫ້ການຕ້ອນຮັບຢ່າງອົບອຸ່ນ.

  ໃນໂອກາດດັ່ງກ່າວທ່ານ ເກຍ ອູ໊ສິດ ທິເດດ ເຈົ້າຂອງໂຮງງານຜະລິດນໍ້າດື່ມ ແລະ ນໍ້າກ້ອນໂລມາຄຳຜູ້ມີສ່ວນຮ່ວມພ້ອມເຮັດໂຄງການຕົວຈິງໄດ້ລາຍງານຕໍ່ທ່ານນາ ຍົກຊາບວ່າ: ເນື່ອງເຫັນໄດ້ຈາກຕາມໜັງສືປຸກລະດົມທຶນທົ່ວສັງຄົມພາຍໃນແຂວງຂອງອົງການປົກຄອງເມືອງຈຳພອນໃນທ້າຍປີ 2015 ແລະຫຼັງຈາກໄດ້ໄປເບິ່ງສະ ພາບແວດລ້ອມລວມທັງການດຳລົງຊີວິດຕົວຈິງຕົນຈຶ່ງຂໍສະໝັກໃຈໃຊ້ທຶນສ່ວນຕົວເຂົ້າມີສ່ວນຮ່ວມແກ້ໄຂຄວາມທຸກຍາກຂອງປະຊາຊົນ 2  ບ້ານດັ່ງກ່າວນັບແຕ່ປີ 2016 ຫາປີ 2018 ໃນເປົ້າໝາຍທັງໝົດ 77 ຄອບຄົວ ແລະ ນອກເປົ້າໝາຍອີກລວມເປັນ 111 ຄອບຄົວ.

  ວິທີເຮັດແມ່ນເອົາຮູບແບບການດຳເນີນທຸລະກິດມາປະຕິບັດເຮັດຫຼາຍວຽກໄປພ້ອມໆກັນຮ່ວມເປັນເຈົ້າການໃນແຕ່ລະມື້ກັບປະຊາຊົນເພື່ອຊອກຮູ້ ແລະແກ້ໄຂບັນຫາຮ່ວມກັນດ້ວຍຄວາມພໍໃຈໂດຍຕະຫຼອດ 3 ປີທ່ານ ເກຍ ອູ໊ສິດທິເດດ ກ່າວວ່າ: ໄດ້ເບີກຈ່າຍເຂົ້າກິນ,ອາການການກິນ,ເຄື່ອງນຸ່ງຫົ່ມ,ເຄື່ອງຮັບໃຊ້ໃນຄົວເຮືອນ, ເຄື່ອງ ມື ແລະ ກົນຈັກຮັບໃຊ້ການຜະລິດ, ຈັດສັນເນື້ອທີ່ປຸກສ້າງຈຳນວນ 40 ຕອນຕອນລະ 1-2 ພັນຕາແມັດ, ເຈາະນໍ້າບາດານ 141 ບໍ່, ຈັດສັນທີ່ດິນປູກຜັກ 108 ຕອນ,

ຊອກດິນບຸກ ເບີກນາໃໝ່ໄດ້ 2 ຮ້ອຍກວ່າເຮັກຕາ ແລະປັບດິນນາເກົ່າ 24,2 ເຮັກຕາ ພ້ອມ ຂົນດິນດຳເຂົ້າໃສ່ນາ, ເຈາະໜອງສະໃຫຍ ່ໄດ້117 ໜອງໃນເນື້ອທີ່ 21 ພັນກວ່າເຮັກຕາໃນນັ້ນ 113 ໜອງປະກອບໃຫ້ 85 ຄອບຄົວ ແລະ 4 ໜອງເປັນຂອງລວມບ້ານ, ໜອງນ້ອຍ 94 ໜອງໃຫ້ 47 ຄອບຄົວ, ສ້ອມແປງຕໍ່ເຕີມເຮືອນ 82 ຫຼັງ ແລະ ແນວພັນພືດສັດພ້ອມສ້າງສູນຮຽນຮູ້ການປູກ-ການລ້ຽງຕະຫຼອດຮອດການບົວລະບັດຮັກສາໃຫ້ຖືກຫຼັກວິຊາການ.

  ນອກຈາກນັ້ນແລ້ວຍັງໄດ້ສ້າງຫ້ອງການ ແລະສະໂມສອນບ້ານ,ສ້າງທາງດິນແດງ, ຕັ້ງໂຮງສີເຂົ້າລວມ, ສ້ອມແປງຕໍ່ເຕີມໂຮງຮຽນ ແລະມອບອຸປະກອນການຮຽນ, ຊຸກຍູ້ລູກຫຼານໃຫ້ຮຽນທັງໝົດ, ເຮັດສ້ວມຖ່າຍ, ປະກອບຕູ້ຢາປະຈຳສູນ, ເຮັດບັດປະກັນສັງຄົມຕັ້ງກອງທຶນສຸຂະພາບ ແລະສ້າງວັດວາອາຮາມເຮັດໃຫ້ປະຊາຊົນຫັນມານັບຖືສາດສະໜາພຸດທັງໝົດ.

 ທ່ານ ເກຍ ອູ໊ສິດທິເດດ ກ່າວຕື່ມວ່າ: ຜ່ານການເຮັດຫຼາຍສີ່ງຫຼາຍຢ່າງໃນຕະຫຼອດ 3 ປີໃນ 18 ໜ້າວຽກຫຼັກແຕ່ຕົວຈິງເຮັດໄດ້ 31 ໜ້າວຽກໃຫ້ກັບປະຊາຊົນໄດ້ໃຊ້ທຶນໄປທັງໝົດ 22 ຕື້ກີບ ໃນນີ້ 15 ຕື້ກວ່າກີບ ແມ່ນທຶນສ່ວນຕົວ ແລະ ອີກ 7 ຕື້ກີບແມ່ນຈາກພາກສ່ວນລັດ, ບໍລິສັດ ແລະ ຫ້າງຮ້ານ, ລວມທັງບຸກຄົນຕ່າງໆ ຈາກສິ່ງທີ່ປະຕິບັດມາທັງໝົດນັ້ນໄດ້ເຮັດໃຫ້ໃນ 2 ບ້ານເກີດມີພື້ນຖານການຜະລິດຫຼາຍສີ່ງຢ່າງປະກອບໃຫ້ 111 ຄອບຄົວມີຊັບສິນເປັນຂອງຕົນເອງທີ່ໃນເມື່ອກ່ອນບໍ່ເຄີຍມີພ້ອມມີບ່ອນທຳມາຫາກິນສະດວກຫຼາຍຂຶ້ນ, ມີບ່ອນທີ່ຢູ່ອາໄສ, ອອກແຮງງານກັບທີ່ເພື່ອໃຫ້ກຸ້ມຢູ່ກຸ້ມກິນ ແລະ ຍືນຍົງແຕ່ທີ່ສຳຄັນຄືສາມາດຫັນປ່ຽນການດຳລົງຊີວິດແບບເລື່ອນລອຍມາແຕ່ດົນນານໂດຍໂຄງການນີ້ໄດ້ມອບໃຫ້ອົງການປົກຄອງທ້ອງຖິ່ນສືບຕໍ່ໃນເດືອນເມສາ 2019.

  ຫຼັງຈາກຮັບຟັງລາຍງານທ່ານ ທອງ ລຸນ ສີສຸລິດ ກໍໄດ້ກ່າວຍ້ອງຍໍຊົມເຊີຍຕໍ່ໝາກຜົນສຳເລັດຂອງໂຄງການໂດຍສະເພາະແມ່ນ ທ່ານ ເກຍ ອູ໊ສິດທິເດດ ທີ່ເປັນນັກພັດທະນາດີເດັ່ນຊຶ່ງໄດ້ຍອມເສຍສະຫຼະທັງເຫື່ອແຮງ ແລະ ທຶນຮອນສ່ວນຕົວເພື່ອທຸ້ມເທເຂົ້າໃສ່ການຊ່ວຍເຫຼືອພັດທະນາຊີວິດການເປັນຢູ່ຂອງປະຊາຊົນທຸກຍາກຫາກິນແບບເລື່ອນລອຍໄດ້ຮູ້ສ້າງຢູ່ທຳມາຫາກິນ ແລະມີອາຊີບພ້ອມດຽວກັນນັ້ນອຳນາດການປົກບ້ານຕະຫຼອດຮອດພໍ່ແມ່ປະຊາຊົນພາຍໃນ 2 ບ້ານກໍໃຫ້ການຮ່ວມໃຫ້ມືໂຄງການ ຈົນສາມາດຫັນປ່ຽນຊີວິດຄອບຄົວມາສູ່ ແບບໃໝ່ມີຊື່ສຽງທາງບວກຫຼາຍຂຶ້ນ ແລະໄດ້ຮຽກຮ້ອງໃຫ້ປະຊາຊົນສືບຕໍ່ໃນການພັດທະນາຊີວິດຄອບຄົວດີຂຶ້ນກວ່າ ເກົ່າໄປເລື້ອຍໆຫຼັງຈາກນັ້ນທ່ານນາຍົກແລະຄະນະກໍໄດ້ເດີນຊົມການດຳລົງຊີວິດ ແລະບ້ານເຮືອນຂອງປະຊາຊົນ, ຕະຫຼອດຮອດພື້ນທີ່ທຳການຜະລິດກ່ອນຈະມີການປູກຕົ້ນໄມ້ໃນບ້ານດັ່ງກ່າວຕື່ມອີກ.

 

-----------

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์