ຜູ້ບໍລິຫານໃຫຍ່ບໍລິສັດຊ້າງລາວຮັບລາງວັນນັກທຸລະກິດໜຸ່ມດີເດັ່ນ

ບໍລິສັດ ຊ້າງລາວ ທີ່ປືກສາວິສະວະກຳ ແລະກໍ່ສ້າງພາຍຫຼັງທີ່ໄດ້ດຳເນີນທຸລະກິດມາຮອດປະຈຸບັນເຫັນວ່າທຸລະກິດມີການພັດທະນາ ແລະເຕີບໃຫຍ່ຂະຫຍາຍຕົວຢ່າງຕໍ່ເນື່ອງ, ລູກຄ້ານັບມື້ນັບຫຼາຍຂຶ້ນ, ສັງຄົມໃຫ້ການຍອມຮັບ ແລະ ເຊື່ອໝັ້ນໄວ້ວາງໃຈຕໍ່ການບໍລິການຂອງບໍລິສັດສິ່ງດັ່ງກ່າວເຮັດໃຫ້ເປັນໜຶ່ງໃນຜູ້ປະກອບການທີ່ໄດ້ຮັບລາງວັນນັກທຸລະກິດໜຸ່ມດີເດັ່ນ2019 (Outstsand ing Young Entrepreneur Award 2019) ຈາກສະມາຄົມນັກທຸລະກິດໜຸ່ມແຫ່ງຊາດລາວຊຶ່ງພິທີມອບຮັບໄດ້ມິຂຶ້ນໃນເດືອນຜ່ານມາທີ່ນະຄອນຫຼວງວຽງຈັນໃນກອງປະຊຸມວັນຊາວໜຸ່ມອາຊຽນ (ASEAN Youth Day Meeting) ຄັ້ງທີ 23 ທີ່ ສປປ ລາວ ເປັນເຈົ້າພາບ.

  ທ່ານ ວິບູນ ສິດທິມໍລະດາ ຜູ້ຮ່ວມກໍ່ຕັ້ງ ແລະຜູ້ບໍລິຫານໃຫຍ່ (CEO) ບໍລິສັດຊ້າງລາວທີ່ປຶກສາວິສະວະກຳ ແລະກໍ່ສ້າງໃຫ້ສຳພາດວ່າ: ການທີ່ໄດ້ຮັບລາງວັນນັກທຸລະກິດໜຸ່ມດີເດັ່ນ 2019 ຈາກສະມາຄົມນັກທຸລະກິດໜຸ່ມແຫ່ງຊາດລາວແມ່ນເປັນຄັ້ງທຳອິດ ແລະເປັນອີກໜຶ່ງຄວາມພາກພູມໃຈຂອງບໍລິສັດທີ່ທາງພັກ-ລັດໄດ້ຊີ້ ນຳ ແລະເຫັນເຖິງຄວາມຕັ້ງໃຈພະຍາຍາມບຸກບືນຂອງຊາວໜຸ່ມລາວກໍຄືຜູ້ປະກອບການລາວທີ່ມີຫົວຄິດປະດິດສ້າງພັດທະນາ, ສ້າງຫົວໜ່ວຍທຸລະກິດຂະໜາດນ້ອຍ ແລະກາງໃຫ້ເຕີບໃຫຍ່ຂະຫຍາຍຕົວ, ໃນນາມທີ່ໄດ້ຮັບລາງວັນດັ່ງກ່າວຂໍສະແດງຄວາມຮູ້ບຸນຄຸນຢ່າງລົ້ນເຫຼືອມາຍັງພັກ-ລັດທີ່ໃຫ້ທິດທາງ, ສົ່ງເສີມ ແລະສະໜັບສະ ໜູນສ້າງເງື່ອນໄຂອຳນວຍຄວາມດວກໃຫ້ແກ່ການດຳເນີນງານຂອງບໍລິສັດຕະຫຼອດມາໂດຍສະເພາະແມ່ນສະມາຄົມນັກທຸລະກິດໜຸ່ມ,ສູນກາງຊາວໜຸ່ມປະຊາຊົນປະ ຕິວັດລາວ ແລະບັນດາລູກຄ້າທີ່ໃຫ້ການສະໜັບສະໜູນໄວ້ວາງໃຈເຊື່ອໝັ້ນຕໍ່ບໍລິສັດຊ້າງລາວເຮັດໃຫ້ທຸລະກິດພັດທະນາຢ່າງຕໍ່ເນື່ອງ.

  ທ່ານ ວິບູນສິດ ທິມໍລະດາ ກ່າວວ່າ: ບໍລິສັດ ຊ້າງລາວ ໄດ້ສ້າງຕັ້ງຂຶ້ນໃນປີ 2012 ປະກອບມີຂາຮຸ້ນຮ່ວມກັນ 4 ທ່ານ ທີ່ມີວິໃສທັດຄືກັນເພື່ອພັດທະນາບໍລິສັດວິສະ ວະກຳລາວຮຸ່ນໃໝ່ໃຫ້ເປັນລະດັບສາກົນໂດຍໃນໄລຍະເລີ່ມຕົ້ນແມ່ນເປັນທີ່ປຶກສາດ້ານວິສະວະກຳ ແລະຕໍ່ມາກໍໄດ້ຂະຫຍາຍຕົວມາເປັນອອກແບບ ແລະ ຮັບເໝົາກໍ່ສ້າງ ເປັນຕົ້ນການລົງເລີກດ້ານກໍ່ສ້າງໂຮງງານອຸດສາຫະກຳ ແລະ ສາງແວ່ເຮົ້າ (ເປັນຕົ້ນແມ່ນຢູ່ເຂດເສດທະກິດພິເສດ) ລວມທັງອາຄານພານິດ, ໂຮງແຮມ, ການປັບປຸງສ້ອມແປງຕຶກເກົ່າ ແລະອອກແບບຮັບເໝົາກໍ່ສ້າງໝູ່ບ້ານຈັດສັນຊຶ່ງຜ່ານມາບໍລິສັດຊ້າງລາວໄດ້ເຮັດສຳເລັດແລ້ວຫຼາຍໂຄງການຈົນເຮັດໃຫ້ທຸລະກິດຂະຫຍາຍຕົວເທື່ອລະກ້າວ ແລະໄດ້ກາຍເປັນທີ່ຮູ້ຈັກຂອງສັງຄົມທັງລູກຄ້າພາຍໃນ ແລະຕ່າງປະເທດແນວໃດກໍດີ ທ່ານ ວິບູນ ສິດທິມໍລະດາ ກ່າວຕື່ມວ່າ: ຊ້າງລາວຈະສືບຕໍ່ພັດທະນາ ແລະຂະຫຍາຍຕົວໄປເທື່ອລະກ້າວສອດຄ່ອງກັບວິໃສທັດຂອງບໍລິສັດນັ້ນກໍຄືການສ້າງບໍລິສັດວິສະວະກຳລາວຮຸ່ນໃໝ່ໃຫ້ເປັນລະດັບສາກົນ ແລະ ສົ່ງເສີມການພັດທະນາວິສະວະກຳທີ່ມີຄຸນນະພາບໃນລາວເພື່ອບັນລຸວິໃສທັດດັ່ງກ່າວຊ້າງລາວຈະສືບຕໍ່ສ້າງຜົນງານຂອງບໍລິສັດໃຫ້ມີຊື່ສຽງສາມາດໄວ້ວາງໃຈໄດ້ຄຽງຄູ່ກັບການພັດທະນາບຸກຄະລາກອນທີ່ມີຄຸນນະພາບ ແລະ ນຳໃຊ້ເຕັກໂນໂລຊີໃໝ່ໃນຍຸກເສດຖະກິດດີຈີຕອນທັງມີຍຸດທະສາດໃນການຮ່ວມມືກັບຄູ່ຮ່ວມທຸລະກິດທັງພາຍໃນ ແລະ ຕ່າງປະເທດເພື່ອພັດທະນາໂຄງການ, ຊ້າງລາວຍັງຕ້ອງສືບຕໍ່ປັບປຸງລະບົບທຸລະກິດພ້ອມທັງປັບປຸງຍຸດທະສາດທາງທຸລະກິດຢ່າງຕໍ່ເນື່ອງ.

  ທ່ານ ວິບູນ ສິດທິມໍລະດາ ຍັງເປັນຄະນະກຳມະການຂອງບໍລິສັດອໍຕາດສ໌ມາຍນີ້ງຢູ່ລາວ (Ortus Mining Laos) ຊຶ່ງເປັນບໍລິສັດຊ່ຽວຊານແລະມີປະສົບການໃນການພັດທະນາໂຄງການຂຸດຄົ້ນບໍ່ແຮ່.ທ່ານທັງມີຕຳແໜ່ງເປັນຄະນະສະພາບໍລິຫານສະພາການຄ້າອົດສະຕາລີຢູ່ລາວ (AustCham Laos) ທ່ານ ວິບູນ ເປັນຜູ້ບໍລິຫານທີ່ມີປະສົບການຢ່າງກວ້າງຂວາງໃນອຸດສາຫະກໍາ. ທ່ານມີປະສົບການໃນການບໍລິຫານທີມ ແລະຄຸ້ມຄອງໂຄງການຂະໜາດໃຫຍ່. ກ່ອນທີ່ຈະມາເປັນຜູ້ປະ ກອບການທຸລະກິດ,ທ່ານເຄີຍເປັນໝຶ່ງໃນຄະນະບໍລິຫານທີ່ບໍລິສັດ MMG LXML ບໍ່ຄຳ-ທອງເຊໂປນ ຊຶ່ງດໍາເນີນການຂຸດຄົ້ນແຮ່ທາດທີ່ໃຫຍ່ທີ່ສຸດໃນລາວ. ທ່ານ ວິບູນສຳເລັດການສຶກສາລະດັບປະລິນຍາໂທວິສະວະກໍາໄຟຟ້າພະລັງງານຈາກມະຫາວິທະຍາໄລ Il linois ຢູ່ສະຫະລັດອາເມລິກາ ແລະ ປະລິນຍາຕີດ້ານວິສະວະກໍາໄຟຟ້າ (ກຽດນິຍົມອັນດັບໜຶ່ງ) ຈາກມະຫາວິທະຍາໄລ RMIT ຢູ່ປະເທດອົດສະຕາລີ.

-----------

ຂຽນໂດຍ: ສ. ອາສາ

ພາບ ແລະຂ່າວຈາກໜັງສືພິມເສດຖະກິດ-ສັງຄົມ

แชร์