ແຂວງວຽງຈັນຍົກລະດັບຄຸ້ມຄອງນຳໃຊ້ສະຖານີຈັກສູບນໍ້າ ແລະລະບົບຊົນນະປະທານ

ກົມຊົນລະປະທານ, ກະຊວງກະສິກຳ ແລະປ່າໄມ້ ໄດ້ສົມທົບກັບພະແນກກະສິກຳ ແລະປ່າໄມ້ ແຂວງວຽງຈັນ, ຫ້ອງການກະສິກຳ ແລະປ່າໄມ້ເມືອງ, ໄດ້ເປີດຊຸດຝຶກອົບຮົມການຄຸ້ມຄອງນຳໃຊ້ສະຖານີຈັກສູບນໍ້າ ແລະລະບົບຊົນລະປະທານໃຫ້ວິຊາການຂະແໜງຊົນລະປະທານຂັ້ນແຂວງ,ຂັ້ນເມືອງ ແລະກຸ່ມນໍາໃຊ້ນໍ້າຂອງໂຄງການກໍ່ສ້າງອ່າງເກັບນໍ້າ ແລະ ພັດທະນາລະບົບຊົນລະປະທານ (ອົງປະກອບທີ 1: ຕິດຕັ້ງ ແລະ ປ່ຽນຖ່າຍຈັກສູບນໍ້າ ທີ່ນໍາໃຊ້ທຶນກູ້ຢືມຈາກປະເທດອິນເດຍ) ຈໍານວນ 17 ສະຖານີຂຶ້ນໃນລະຫວ່າງວັນທີ 12-14 ສິງຫາ ທີ່ແຂວງວຽງຈັນ, ໂດຍການເປັນປະທານຮ່ວມຂອງ ທ່ານ ພູວົງ ບຸນຊູ ຫົວໜ້າພະແນກກະສິກຳ ແລະປ່າໄມ້ ແຂວງວຽງຈັນ ແລະທ່ານ ວິລະກອນ ວໍລະສານ ຮອງຫົວໜ້າກົມຊົນລະປະທານ.

  ທ່ານ ພູວົງ ບຸນຊູ ຫົວໜ້າພະແນກກະສິກຳ ແລະປ່າໄມ້ ແຂວງວຽງຈັນ ໄດ້ກ່າວຈຸດປະສົງຂອງການຈັດຊຸດຝຶກອົບຮົມໃນຄັ້ງນີ້ເພື່ອແນໃສ່ການສ້າງຄວາມເຂັ້ມແຂງທາງດ້ານວຽກງານຄຸ້ມຄອງ ແລະ ນຳໃຊ້ລະບົບຊົນລະປະທານໂດຍສະເພາະການຄຸ້ມຄອງສະຖານີຈັກສູບນໍ້າເທິງແພທີ່ໄດ້ຕິດຕັ້ງສໍາເລັດໂດຍບໍລິສັດຫຸ້ນສ່ວນລັກກີ-WPIL JV ໃຫ້ກັບວິຊາການຊົນລະປະທານຂັ້ນແຂວງ, ຂັ້ນເມືອງ ແລະກຸ່ມນໍາໃຊ້ນໍ້າໄດ້ຮຽນຮູ້ວິທີການເປີດ-ປິດ ແລະການນໍາໃຊ້ລະບົບຈັກສູບນໍ້າຂອງແຕ່ລະພາກ ສ່ວນທີ່ກ່ຽວຂ້ອງເຊັ່ນ: ພາກສ່ວນໄຟຟ້າຈັກສູບ, ພາກສ່ວນກົນຈັກ, ພາກສ່ວນກໍ່ສ້າງຂອງສະຖານີຈັກສູບນໍ້າ ແລະການຄຸ້ມຄອງນໍາໃຊ້ລະບົບຄອງເໝືອງຈໍານວນໜຶ່ງ.

  ດ້ານທ່ານ ວັນໄຊ ໄຊຍະສຸກ ຫົວໜ້າປະສານງານໂຄງການຮ່ວມມືລາວ-ອິນເດຍ ຂັ້ນສູນກາງກ່າວວ່າ: ການຈັດຝຶກ ອົບຮົມຄັ້ງນີ້ຈຸດປະສົງແມ່ນເພື່ອເປັນພື້ນຖານໃຫ້ແກ່ການມອບ-ຮັບການນໍາໃຊ້ໂຄງການຈັກສູບນໍ້າ 17 ສະຖານີໃຫ້ກັບທ້ອງຖິ່ນເປັນຜູ້ຄຸ້ມຄອງ ແລະນໍາໃຊ້ເຂົ້າໃນວຽກງານການສະໜອງນໍ້າເພື່ອການຜະລິດກະສິ ກຳຕາມເປົ້າໝາຍຂອງໂຄງການ.

-------------

ພາບ ແລະຂ່າວຈາກ:  ໜັງສືພິມເສດຖະກິດ-ສັງຄົມ

• 15/08/2019