ນາຍົກສຳເລັດຢ້ຽມຢາມ ແລະເຮັດວຽກຢູ່ສາລະວັນ

 ວັນທີ 13 ສິງຫາ 2019 ທ່ານ ທອງລຸນ ສີສຸລິດ ນາຍົກລັດຖະມົນຕີພ້ອມດ້ວຍຄະນະໄດ້ສຳເລັດການຢ້ຽມຢາມ ແລະເຮັດວຽກຢູ່ແຂວງສາລະວັນ,ໂດຍມີທ່ານ ສີສຸວັນ ວົງຈອມສີ ເຈົ້າແຂວງໆສາລະວັນ, ພ້ອມດ້ວຍຄະນະ ແລະປະຊາຊົນໃຫ້ການຕ້ອນຮັບຢ່າງອົບອຸ່ນ.

 ໃນໂອກາດທີ່ທ່ານນາຍົກລົງມາຢ້ຽມຢາມເຮັດວຽກຄັ້ງນີ້ກໍ່ໄດ້ເດີນທາງໄປເບິ່ງຂະບວນການຜະລິດປູກພືດສາລີ,ມັນຕົ້ນຂອງພໍ່ແມ່ປະຊາຊົນຢູ່ບ້ານແສນວັງໃຫຍ່ເມືອງສາລະວັນ ແລະບ້ານພໍ່ນວນ, ບ້ານເຕເມສັງທອງ ເມືອງເລົ່າງາມ ແຂວງສາລະວັນ, ຈາກນັ້ນກໍ່ໄປໄດ້ເດີນທາງໄປຢ້ຽມຢາມພໍ່ແມ່ປະຊາຊົນຢູ່ບ້ານຕຸກລຸກເມືອງຕຸ້ມ ລານ ໂດຍເປັນຕ້ອນຮັບຂອງ ທ່ານ ຈັນສະໝອນ ພົມມະແສງ ເຈົ້າເມືອງໆ ຕຸ້ມລານ, ພ້ອມດ້ວຍຄະນະນຳຂອງ ເມືອງຂັ້ນເມືອງ ແລະພໍ່ແມ່ປະຊາຊົນບ້ານຕຸກລຸກ.

ທ່ານ ເຈົ້າເມືອງຕຸ້ມລານກໍ່ໄດ້ລາຍງານໂດຍຫຍໍ້ກ່ຽວກັບສະພາບຂອງເມືອງ, ເມືອງຕຸ້ມລານກໍ່ແມ່ນເມືອງໜຶ່ງທີ່ນອນໃນ 8 ເມືອງຂອງແຂວງສາລະວັນ,ມີຊາຍແດນຕິດຈອດກັບ 3 ເມືອງ ແລະເປັນເມືອງທີ່ນອນໃນ 47 ເມືອງທຸກຍາກຂອງທົ່ວປະເທດ, ເມືອງຕຸ້ມລານປະກອບມີ37 ບ້ານ, ມີພົນລະເມືອງ 28 ພັນກວ່າຄົນ, ຍິງ 14 ພັນກວ່າຄົນ, ມີ 3 ພັນກວ່າຫຼັງຄາເຮືອນ, ມີ 5 ພັນກວ່າຄອບຄົວ, ປະກອບມີ 3 ຊົນເຜົ່າ,ເຜົ່າກະຕ່າງ 87%, ເຜົ່າຕະໂອ້ຍ 7% ແລະເຜົ່າລາວລຸ່ມ 5%, ປະຊາຊົນສ່ວນໃຫຍ່ແມ່ເຮັດນາປູກເຂົ້າ, ລ້ຽງສັດ ແລະ ຕໍ່າແຜ່ນແພ່ເປັນອາຊີບສຳຮອງ.

 ຢ່າງໃດກໍຕາມມາໃນວັນທີ 5 ມິຖຸນາ 2019 ໄດ້ຮັບຂໍ້ມູນລາຍງານຈາກບ້ານສາມັກຄີໄຊ, ດິນດາກ, ໂພນງາມ, ແກ້ງຮັງ, ຫ້ວຍຫວ້າ, ນາຮ່ອງໃຫຍ່ ແລະບ້ານນາລະຈາງວ່າມີໜູຕາຍເປັນຈຳນວນ ຫຼວງຫຼາຍໃນ 7 ບ້ານນີ້, ມີພົນລະເມືອງ 1 ພັນກວ່າຄົນ ແລະມີ 272 ຄອບຄົວ, ມີໝູທັງໝົດ 2 ພັນກວ່າໂຕ, ໃນນັ້ນໝູນ້ອຍ 1 ພັນກວ່າໂຕ, ໝູກາງ 4 ຮ້ອຍກວ່າໂຕ ແລະໝູໃຫຍ່ 5 ກວ່າໂຕ, ໂດຍສັງລວມແລ້ວການຂ້າ ແລະ ທຳລາຍໝູທີ່ຕິດເຊື້ອ ພະຍາດອະຫິວາໝູອາຟຣິກາ, ມີໝູທີ່ຕາຍເອງ 1,1 ພັນໂຕ ແລະ ໝູທີ່ຂ້າທຳລາຍມີ 1,4 ພັນໂຕ ແລະ ມາຮອດວັນທີ 12 ມິຖຸນາໄດ້ກວດເພີ່ມອີກ 5 ບ້ານຄື: ບ້ານວັງໂກ, ບ້ານຕຸລຸກ, ບ້ານຕຸ້ມລານ, ບ້ານກົກມ່ວງ ແລະບ້ານດອນບຸງ, ນອກຈາກພະຍາດລະບາດໝູແລ້ວທາງເມືອງກໍ່ຍັງໄດ້ເອົາໃຈໃສ່ກ່ຽວກັບການຕ້ານສະກັດກັ້ນພະຍາດໄຂ້ຍຸງລາຍ ແລະ ສັກຢາກັນພະຍາດໄອໄກ່ຕື່ມອີກ, ຊຶ່ງມາຮອດປະຈຸບັນນີ້ຂະບວນການສັກຢາປ້ອງກັນພະຍາດປະຕິບັດໄດ້ 58%.

ຈາກນັ້ນ ທ່ານ ທອງລຸນ ສີສຸລິດ ກໍ່ໄດ້ສະແດງຄວາມຍ້ອງຍໍຊົມເຊີຍຕໍ່ພໍ່ແມ່ພີ່ນ້ອງປະຊາຊົນທີ່ໄດ້ມີຄວາມຕັດສິນໃຈສູງໃນການທຳລາຍໝູຂອງຕົນເອງເພື່ອປ້ອງກັນບໍ່ໃຫ້ພະຍາດດັ່ງກ່າວແຜ່ລາມອອກໄປຫຼາຍ, ພ້ອມນັ້ນກໍ່ໄດ້ແນະນຳໃຫ້ພໍ່ແມ່ປະຊາຊົນເອົາໃຈໃສ່ໃນການຕ້ານ ແລະສະກັດກັ້ນພະຍາດໄຂ້ຍຸງລາຍ, ດ້ວຍການປະຕິບັດ 5 ປໍ, ເຮັດເປັນປະຈໍາ ແລະພ້ອມທັງເອົາໃຈໃສ່ໃນການສັກຢາປ້ອງກັນພະຍາດຕ່າງໆໂດຍສະເພາະກໍ່ແມ່ພະຍາດໄອໄກ່ຊຶ່ງປະຈຸບັນນີ້ຢູ່ເມືອງທ່າປາງທອງ ແຂວງສະ ຫວັນນາເຂດ ທີ່ຕິດຈອດກັບເມືອງຕຸ້ມລານພວກເຮົານີ້ກໍາລັງເກີດຂຶ້ນພະຍາດດັ່ງກ່າວ, ສະນັ້ນທຸກພາກສ່ວນພ້ອມດ້ວຍພໍ່ ແມ່ປະຊາຊົນຈົ່ງພ້ອມກັນເປັນເຈົ້າການ ນຳກັນໃນການປົກປ້ອງພະຍາດບໍ່ໃຫ້ມັນເກີດຂຶ້ນໂດຍສະເພາະກໍ່ແມ່ນສາທາພວກເຮົາຈົ່ງໄດ້ເອົາໃຈໃສ່ຢ່າງທົ່ວເຖິງຕໍ່ພໍ່ແມ່ປະຊາຊົນເຮັດແນວໃດບໍ່ໃຫ້ມັນເກີດຂຶ້ນພາຍ ໃນເມືອງຂອງພວກເຮົາ.

  ໃນໂອກາດທີ່ທ່ານນາຍົກມາຢ້ຽມຢາມຄັ້ງນີ້ກໍ່ໄດ້ມອບເງິນຈຳນວນໜຶ່ງເພື່ອເປັນການແກ້ໄຂວຽກງານທີ່ຈຳເປັນຈຳນວນໜຶ່ງ, ໂດຍຕາງໜ້າຮັບຂອງທ່ານເຈົ້າເມືອງໆຕຸ້ມລານ.

------------

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

แชร์