ບົວລະພາເອົາໃຈໃສ່ປ້ອງກັນ ແລະກຳຈັດພະຍາດໄຂ້ເລືອດອອກ

 ປະຊຸມຫ້ອງການສາທາລະນະສຸກ ເມືອງບົວລະພາ ໄດ້ຈັດກອງປະຊຸມການຄວບຄຸມການປ້ອງກັນ ແລະກໍາຈັດພະຍາດໄຂ້ເລືອດອອກພາຍໃນເມືອງຂຶ້ນໃນວັນທີ 8 ສິງຫາ 2019 ທີ່ຫ້ອງການດັ່ງກ່າວພາຍໃຕ້ການເປັນປະທານຂອງ ທ່ານ ຄໍາໄຊ ຕາງນະວົງ ຮອງເຈົ້າເມືອງໆບົວລະພາ, ທ່ານ ແສງອຸທິດ ມະໂນທຳລາດ ຫົວໜ້າໜ່ວຍ ງານຄວບຄຸມພະຍາດຕິດຕໍ່ແຂວງຄໍາມ່ວນ, ມີບັນດາຫົວໜ້າ, ຮອງຫົວໜ້າຫ້ອງການ, ພະນັກງານວິຊາການ, ຕະຫຼອດຮອດພໍ່ແມ່ປະຊາຊົນໃນເທສະບານເມືອງເຂົ້າ ຮ່ວມ.

 ທ່ານ ແສງອຸໄທ ທໍາມະໂນລາດຫົວໜ້າໜ່ວຍງານຄວບຄຸມພະຍາດຕິດຕໍ່ ແຂວງຄໍາມ່ວນໄດ້ສະເໜີການແຜ່ລະບາດຂອງພະຍາດໄຂ້ຍຸງລາຍກ່ຽວກັບຄວາມຮັບຜິດຊອບ ແລະການນຳພາຈັດຕັ້ງປະຕິບັດໂດຍສະເພາະວຽກງານການປ້ອງກັນ-ການຄວບຄຸມ ແລະການ ກໍາຈັດພະຍາດໄຂ້ຍຸງລາຍໃນທົ່ວເມືອງ, ທີ່ກໍາລັງແຜ່ລະບາດໃນປະຈຸບັນນີ້ ໃຫ້ບັນດາແຂກທີ່ເຂົ້າຮ່ວມ ກອງປະຊຸມໄດ້ຮັບຮູ້, ເຂົ້າໃຈ ແລະ ພ້ອມກັນຈັດຕັ້ງປະຕິບັດໃຫ້ໄດ້ 5 ປໍຄື: ປໍທີ 1 ປິດພາສະນະໄຫ, ອຸ, ແອງ, ຟຸຍ, ເພື່ອບໍ່ໃຫ້ຍຸງລາຍໄຂ່ ໃສ່; ປໍທີ 2 ປ່ຽນນໍ້າໃນພາສະນະ, ຕີນຕູ້ ໂຖດອກໄມ້; ປໍທີ 3 ປ່ອຍປາ ຫາງນົກຍູງ, ໃສ່ພະສະນະກັກນໍ້າ, ເພື່ອໃຫ້ປາກິນໜອນນໍ້າຍຸງລາຍ; ປໍທີ 4 ປັບປຸງອະນະໄມບໍລິເວນທີ່ຢູ່ອາໃສທາງໃນ ແລະນອກເຮືອນໃຫ້ສະອາດທຳລາຍແຫຼ່ງເພາະພັນ; ປໍທີ 5 ປະຕິບັດ 5 ປໍ ໃຫ້ເປັນນິໃສຖ້າມີໄຂ້ຄວນໄປພົບແພດ.

  ທ່ານ ຄຳໄຊ ຕາງນະວົງ ໄດ້ຮຽກຮ້ອງໃຫ້ບັນດາບ້ານເທສະບານເມືອງໃນການຄວບຄຸມປ້ອງກັນພະຍາດໄຂ້ຍຸງລາຍຄວນເອົາໃຈໃສ່ຢ່າງເຂັ້ມງວດຮັກສາຄວາມສະອາດຕາມເຮືອນຊານ ເປັນຕົ້ນ ແມ່ນພະສະນະທີ່ບໍ່ໃຊ້ເກັບກັກນໍ້າ ໄວ້ໃຫ້ຖອກນໍ້າຖິ້ມ ເພາະເປັນບ່ອນເພາະພັນຍຸງລາຍຈາກນັ້ນທ່ານ ຍັງຮຽກຮ້ອງໃຫ້ບັນດາພະນັກງານທີ່ຖືກປະຕິບັດໜ້າທີ່ລົງແນະນຳພໍ່ແມ່ປະຊາຊົນພາຍໃນເມືອງຕ້ອງໄດ້ແນະນຳພໍ່ແມ່ປະຊາຊົນໃຫ້ເຂົ້າໃຈໃນການໃຊ້ຢາຂ້າໜອນນໍ້າໃຫ້ຖືກຕາມວິທີເພື່ອສະກັດກັ້ນບໍ່ໃຫ້ຍຸງລາຍແຜ່ພັນໄດ້.

----------

ຂຽນໂດຍ: ບຸນປະພາດ

แชร์