ປກສ ຫຼວງນໍ້າທາ ເຜີຍແຜ່ວຽກງານຕ້ານການຄ້າມະນຸດ

  ວັນທີ 8 ສິງຫາ 2019 ນີ້, ພະແນກຕ້ານການຄ້າມະນຸດ ປກສ ແຂວງຫຼວງນໍ້າທາ ສົມທົບກັບ ປກສ ເມືອງນາແລ ນຳພາໂດຍ ທ່ານ ຮອ ສົມເພັດ ສິດທິພົງ ຮອງ ພະແນກຕ້ານການຄ້າມະນຸດ ປກສ ແຂວງ, ພັຕ ສົມສະນິດ ກຸນຕິລາດ ຫົວໜ້າພະແນກຕຳຫຼວດ ປກສ ເມືອງນາແລ, ເຂົ້າຮ່ວມມີອົງການການຈັດຕັ້ງບ້ານຜາວີ ຕະຫຼອດຮອດປະຊາຊົນເຂົ້າຮ່ວມ.

 ທ່ານ ວທ ສອນເພັດ ບຸນສະມິດ ພະນັກງານວິຊາການພະແນກຕ້ານການຄ້າມະນຸດ ປກສ ແຂວງໄດ້ອະທິບາຍ ແລະຍົກໃຫ້ເຫັນເຖິງຜົນຮ້າຍຂອງການຕົກເປັນເຫຍື່ອຂອງ ການຄ້າມະນຸດ ແລະຮູບແບບການຕົວະຍົວະຫຼອກລວງຂອງກຸ່ມຄົນບໍ່ດີທີ່ເຄື່ອນໄຫວຕົວະຍົວະເອົາຍິງສາວລາວໄປອອກແຮງງານຢູ່ຕ່າງປະເທດໂດຍການເປັນແມ່ ບ້ານ, ເປັນສາວບໍລິການຢູ່ຮ້ານອາຫານ ຫຼື ແອບແຝງດ້ວຍການແຕ່ງງານທີ່ບໍ່ຖືກຕ້ອງຕາມກົດໝາຍຜົນສຸດທ້າຍກໍ່ຕົວະເອົາໄປຄ້າປະເວນີ ແລະຂູດຮີດນຳໃຊ້ແຮງງານເກີນ 8 ຊົ່ວໂມງທີ່ກົດໝາຍໄດ້ກຳນົດໄວ້.

 ໂອກາດດັ່ງກ່າວ ທ່ານ ໜານ ທອງ ນໍລະສິງ ນາຍບ້ານໆຜາວີໄດ້ ຕາງໜ້າໃຫ້ອົງການຈັດຕັ້ງບ້ານ, ປະຊາຊົນໄດ້ສະແດງຄວາມຂອບໃຈຕໍ່ທີມງານພະແນກຕ້ານການ ຄ້າມະນຸດ ປກສ ແຂວງ ແລະ ປກສ ເມືອງທີ່ເປັນຫ່ວງເປັນໄຍນຳເອົາເອກະສານມາເຜີຍແຜ່ໃຫ້ປະຊາຊົນໄດ້ຮັບຮູ້ເຊື່ອມຊຶມ ແລະເຂົ້າໃຈຕໍ່ກົນອຸບາຍທີ່ເປັນອັນຕະລາຍ, ຢ່າ ໄດ້ຫຼົງເຊື່ອຢ່າງເດັດຂາດ ແລະມີສະຕິລະວັງຕົວຢູ່ສະເໝີ.

----------------

ຂຽນໂດຍ: ສົມພອນ

• 14/08/2019