3 ປີ ສະພາການຄ້າສາລະວັນມີຜົນສຳເລັດຫຼາຍດ້ານໃນການຊຸກຍູ້ຫົວໜ່ວຍທຸລະກິດ

 ກອງປະຊຸມໃຫຍ່ ຄັ້ງທີ IV ຂອງສະພາການຄ້າ ແຂວງສາລະວັນ ໄດ້ຈັດຂຶ້ນໃນຄັ້ງວັນທີ 13 ສິງຫາ 2019, ຢູ່ສະໂມສອນແຂວງ, ໂດຍການເປັນປະທານຂອງທ່ານ ວິຊຽນ ນະວິກຸນ ຮອງເຈົ້າ ແຂວງສາລະວັນ ຜູ້ຊີ້ນຳວຽກງານເສດຖະກິດ, ທ່ານ ຄຳຜ່ານ ສີລາວີ ຫົວໜ້າພະແນກອຸດສາຫະກຳ ແລະການຄ້າແຂວງພ້ອມດ້ວຍບັນດາທ່ານຮອງເຈົ້າເມືອງ 8 ຕົວເມືອງ, ພະແນກການອ້ອມຂ້າງແຂວງຕະຫຼອດຮອດບັນດາຫົວໜ່ວຍທຸລະກິດ, ຜູ້ປະກອບການ, ບໍລິສັດ ແລະ ພາກສ່ວນທີ່ກ່ຽວຂ້ອງເຂົ້າ ຮ່ວມ.

  ກອງປະຊຸມຄັ້ງນີ້ໄດ້ຕີລາຄາຄືນການເຄື່ອນໄຫວວຽກງານໃນໄລຍະ 3 ປີຜ່ານມາ (ແຕ່ປີ 2017-2019), ທັງດ້ານດີ, ຂໍ້ສະດວກ-ຂໍ້ຫຍຸ້ງຍາກແລະບັນດາຂໍ້ຄົງຄ້າງ ຕ່າງໆ ທີ່ເຮັດໃຫ້ການຊຸກຍູ້-ສົ່ງເສີມວຽກງານດັ່ງກ່າວບໍ່ທັນບັນລຸຕາມຄາດໝາຍທີ່ວາງໄວ້ໄລຍະຜ່ານມາສະພາການຄ້າ ແລະອຸດສາຫະກຳ ແຂວງສາລະວັນສຸມໃສ່ຊອກທຸກວິທີທາງທີ່ເຮັດໜ້າທີ່ໃນການປຸກລະດົມ, ຂົນຂວາຍ, ເຕົ້າໂຮມ ແລະຊ່ວຍເຫຼືອບັນດາທຸລະກິດ ຕ່າງໆພາຍໃນແຂວງສາລະວັນ ໄດ້ເຄື່ອນໄຫວຢ່າງຖືກຕ້ອງ ແລະ ມີຄວາມເຂັ້ມແຂງ, ພ້ອມທັງສາມາດສ້າງລາຍຮັບໃຫ້ຫົວໜ່ວຍທຸລະກິດ ແລະສືບຕໍ່ດຳເນີນກິດຈະການໄດ້ຈຳນວນໜຶ່ງ,ໄດ້ສ້າງເງື່ອນໄຂອໍານວຍຄວາມສະດວກໃຫ້ມີການສົ່ງອອກຜະລິດຕະພັນຕ່າງໆໄປຕ່າງປະເທດໃຫ້ໄດ້ຢ່າງຕໍ່ເນື່ອງໂດຍສ່ວນໃຫຍ່ແມ່ນສິນຄ້າຜົນຜະລິດກະສິກຳ, ອຸດສາຫະກຳປຸງແຕ່ງ ແລະ ອື່ນໆເຊັ່ນ: ສົ່ງອອກໝາກກ້ວຍ 1.600 ໂຕນ, ຂິງອົບແຫ້ງ 117 ໂຕນ, ຖ່ານຂາວ ໄມ້ 1.504 ໂຕນ, ໝາກພ້າວ, ໝາກກ້ຽງ, ເຂົ້າຈ້າວ, ຜະລິດຕະພັນໄມ້ ແລະອື່ນໆ, ສາມາດອອກໃບ ຢັ້ງຢືນແຫຼ່ງກຳເນີດສິນຄ້າ CO ຫຼື ສິນຄ້າສົ່ງອອກທັງໝົດປະຕິບັດໄດ້ 70 ຊຸດ ມູນຄ່າ 3 ລ້ານກວ່າໂດລາ, ໃນນັ້ນສົ່ງອອກປະເທດຍີ່ປຸ່ນ ມູນຄ່າ 2,7 ລ້ານກວ່າ ໂດ ລາ, ປະເທດຈີນປະຕິບັດໄດ້ 9 ແສນກວ່າໂດລາ ແລະສົ່ງອອກປະເທດ ສ.ເກົາຫຼີ ມູນຄ່າ 52 ພັນກວ່າໂດລາ.

  ນອກຈາກນັ້ນໄດ້ເຄື່ອນໄຫວພົບປະນັກທຸລະກິດທັງພາຍໃນ ແລະ ຕ່າງປະເທດ, ເຂົ້າຮ່ວມງານວາງສະແດງສິນຄ້າທຸກຄັ້ງທີ່ມີງານພົບປະແລະງານອື່ນໆໄດ້ 35 ຄັ້ງ ຄຽງຄູ່ກັນນັ້ນໄດ້ມີເຈລະຈາ, ປົກປ້ອງສິດຜົນປະໂຫຍດອັນຊອບທໍາຂອງທຸລະກິດ. ສະພາການຄ້າ ແລະອຸດສາຫະກຳ ແຂວງສາລະວັນ ຊຸດທີ III ປະກອບມີຄະນະບໍລິ ຫານງານທັງໝົດ 17 ທ່ານ, ໃນນັ້ນປະທານ 1 ທ່ານ, ຮອງປະທານ 4 ທ່ານ ແລະຄະນະ 12 ທ່ານ ໄດ້ແບ່ງຄວາມຮັບຜິດຊອບເພື່ອຊຸກຍູ້, ຕິດຕາມຢ່າງເປັນລະບົບໃນທົ່ວແຂວງເວົ້າສະເພາະກໍ່ຄື 8 ຕົວເມືອງ.

 ໃນກອງປະຊຸມດັ່ງກ່າວໄດ້ມີການປ່ອນບັດຄັດເລືອກເອົາຄະນະບໍລິຫານງານ ຄັ້ງທີ IV ຊຸດໃໝ່, ຊຶ່ງມີຜູ້ສະໝັກທັງໝົດ 28 ທ່ານ ເພື່ອຄັດເລືອກເອົາປະທານ ແລະ ຮອງປະທານ, ຜ່ານການປ່ອນບັດ ແລະນັບຄະແນນສຽງເປັນເອກະ ພາບໄດ້ ທ່ານ ນາງ ອິນແປງ ຊາມຸນ ຕີບໍລິສັດປາກຊ່ອງພັດທະນາ (ສາຂາແຂວງສາລະວັນ) ເປັນ ປະທານ ແລະຮອງປະທານຈຳນວນ 4 ທ່ານມີຄື: ທ່ານ ບົວລາ ຈັນທະສອນ ອຳນວຍການພັດຕະຄານໂຮງແຮມສິນສະໄໝ, ທ່ານ ແກ້ວອຸດອນ ໜໍ່ນາທານ ປະທານ ສະມາຄົມໂຮງສີ ແລະເກັບຊື້ເຂົ້າ,ທ່ານ ພອນທະວີ ສີລາດວງໃຈ ອຳນວຍການບໍລິສັດພອນທະວີກໍ່ສ້າງ-ຊົນລະປະທານ ແລະ ທ່ານ ນາງ ວົງຈັນ ພັນທະວົງ ບໍລິສັດ ສຸກໃຈສາລະວັນ.

 ----------------

ໂດຍ: ວິໄລວອນ ສິດທິໄຊ

แชร์