ລັດວິສາຫະກິດຫວຍພັດທະນາ ປະຕິບັດພັນທະເຂົ້າງົບປະມານ 14,4 ຕື້ກີບ

  ບໍລິສັດລັດວິສາຫະກິດຫວຍພັດທະນາ (LAO LOT TERY) ເປັນຫົວໜ່ວຍທຸລະກິດຂອງລັດທີ່ຂຶ້ນກັບການຊີ້ນຳຄຸ້ມຄອງໂດຍກົງຂອງກະຊວງການເງິນ; ຊຶ່ງອີງຕາມການລາຍງານຂອງ ທ່ານ ອັກຄະວອນ ຫຼວງສຸວັນນະວົງ ຜູ້ອໍານວຍການບໍລິສັດລັດວິສາຫະກິດຫວຍພັດທະນາ, ຕໍ່ທ່ານ ສົມດີ ດວງດີ ຮອງນາຍົກລັດຖະມົນຕີລັດຖະມົນຕີກະຊວງການເງິນພ້ອມດ້ວຍຄະນະທີ່ໄດ້ໄປເຄື່ອນໄຫວຊຸກຍູ້ວຽກງານຢູ່ບໍລິສັດລັດວິສາຫະກິດຫວຍພັດທະນາ, ໃນວັນທີ 9 ສິງຫາຜ່ານມາໂດຍ ການຕ້ອນຮັບຂອງຄະນະອຳນວຍການ, ຄະນະພະແນກ, ພ້ອມດ້ວຍພະນັກງານວິຊາການບໍລິສັດລັດວິສາຫະກິດຫວຍພັດທະນາເຂົ້າຮ່ວມ.

  ຊຶ່ງໃນ 6 ເດືອນຕົ້ນປີ 2019 ການດຳເນີນທຸລະກິດຂອງຫວຍພັດທະນາມີທັງຂໍ້ສະດວກ, ຂໍ້ຫຍຸ້ງຍາກ ແລະສິ່ງທ້າທ້າຍຫຼາຍຢ່າງທີ່ຈະຕ້ອງເອົາໃຈໃສ່ເປັນຕົ້ນ: ບັນຫາຫວຍເຖື່ອນ, ແຕ່ອັນທີ່ພົ້ນເດັ່ນລັດວິສາຫະກິດຫວຍພັດທະນາສາມາດມອບພັນທະເຂົ້າງົບປະມານແຫ່ງລັດໄດ້ 14,4 ຕື້ກີບ ເທົ່າກັບ 114,17% ຂອງແຜນການ, ລື່ນແຜນການ 14,17% ໃນນັ້ນ, ອາກອນມູນຄ່າເພີ່ມ 2 ຕື້ກີບ, ອາກອນລາຍໄດ້ 696 ລ້ານກີບ, ອາກອນກໍາໄລລ່ວງໜ້າ 24% ຈໍານວນ 4 ຕື້ກວ່າກີບ, ເງິນເປັນຜົນກຳໄລລ່ວງໜ້າ 60% ຈໍານວນ 7,7 ຕື້ກີບ.

ບໍລິສັດລັດວິສາຫະກິດຫວຍ ພັດທະນາໄດ້ຖືກອະນຸມັດສ້າງຕັ້ງ ຂຶ້ນໃນວັນທີ 14 ທັນວາ 1982 ຕາມມະຕິຕົກລົງຂອງສະພາລັດຖະ ມົນຕີສະບັບເລກທີ 347/ປສລ, ນັບແຕ່ມື້ສ້າງຕັ້ງມາຮອດປະຈຸບັນ ຄົບຮອບ 37 ປີ ການລົງທຶນສ້າງ ຕັ້ງມີມູນຄ່າພຽງ 500.000 ກີບ ແຕ່ມາຮອດປະຈຸບັນລັດວິສາຫະ ກິດຫວຍພັດທະນາມີທັງໝົດ 195 ຕື້ກວ່າກີບ.

  ລັດວິສາຫະກິດຫວຍພັດທະນາມີພາລະບົດບາດຄົ້ນຄວ້າຜະລິດຕະພັນໃບຫວຍພັດທະນາທຸກປະເພດນໍາສະເໜີສະພາບໍລິຫານ ແລະກະຊວງການເງິນພິຈາລະນາ, ຄົ້ນຄວ້າອອກນິຕິກຳ,ລະບຽບການຄຸ້ມຄອງໃບຫວຍທຸກປະເພດກ່ອນວາງຈໍາໜ່າຍ,ສົມທົບກັບພະແນກການເງິນຂອງແຂວງ, ນະຄອນຫຼວງ, ຄະນະກຳມະການຄຸ້ມ ຄອງຢູ່ທ້ອງຖິ່ນຊຸກຍູ້ຕິດຕາມ ແລະ ກວດກາການເຄື່ອນໄຫວຂອງຕົວແທນຈໍາໜ່າຍຫວຍພັດທະນາໃນຂອບເຂດທົ່ວປະເທດ, ເພື່ອເປັນການຜ່ອນຄາຍອາລົມຂອງຜູ້ມັກສ່ຽງໂຊກຊີງລາງວັນ; ສ້າງວຽກເຮັດງານທໍາ, ທັງສ້າງລາຍຮັບໃຫ້ແກ່ຜູ້ຂາຍໃບຫວຍ; ອັນເປັນການປະກອບສ່ວນສົມທົບທຶນຊ່ວຍພັດທະນາປະເທດຊາດ; ໄປຄຽງຄູ່ກັບການປະກອບສ່ວນຄືນຜົນປະໂຫຍດແກ່ສັງຄົມ, ພ້ອມທັງຮັບປະກັນຄວາມໂປ່ງໃສການອອກເລກລາງວັນແມ່ນລວມສູນຢູ່ບໍລິສັດບ່ອນດຽວ 1 ຄັ້ງຕໍ່ອາທິດໂດຍກຳນົດເອົາທຸກໆວັນພຸດເປັນມື້ອອກເລກລາງວັນ, ເລີ່ມແຕ່ເວລາ 20:00 ໂມງເປັນຕົ້ນໄປ ແລະມີຄະນະກຳມະການຄຸ້ມຄອງການອອກເລກລາງວັນຂັ້ນສູນກາງຈາກ 7 ພາກສ່ວນເຂົ້າຮ່ວມ, ໄດ້ມີການຖ່າຍທອດສົດທາງໂທລະພາບແຫ່ງຊາດ, ວິທະຍຸກະຈາຍສຽງແຫ່ງຊາດ ແລະສື່ສັງຄົມອອນລາຍ.

  ດ້ານການບໍລິການ-ການຈໍາໜ່າຍຫວຍທີ່ທັນສະໄໝປະຈຸບັນມີທັງໝົດ 44 ຕົວແທນຈໍາໜ່າຍໃນຂອບເຂດທົ່ວປະເທດ; ໂດຍມີຜູ້ຂາຍຫວຍແບບທັນສະໄໝທີ່ຂຶ້ນທະບຽນທັງໝົດ 37.980 ຄົນ, ດ້ານຜະລິດຕະພັນທີ່ໄດ້ຮັບອະນຸມັດເຄື່ອນໄຫວປະກອບມີປະເພດຫວຍທຳມະດາ: ມີຫວຍເລກ 2 ໂຕ, 3 ໂຕ, 4 ໂຕ, ເລກນາມສັດ 3/40 ຊື້-ຂາຍແບບທັນສະໄໝ ແລະປະເພດໃບຫວຍຂູດ. ນອກຈາກນີ້, ຍັງມີຜະລິດຕະພັນທີ່ໄດ້ຮັບອະນຸຍາດກຽມທົດລອງຈໍາໜ່າຍໃນໄວໆນີ້ແມ່ນຫວຍເລກ 6 ໂຕ, 5 ໂຕ, ເລກ 4 ໂຕ, ເລກ 3 ໂຕ, ເລກ 2 ໂຕ, ເລກ 3 ໂຕ, 2 ໂຕທ້າຍສະລັບກັນ, ເລກ 1 ໂຕໜ້າ ແລະເລກ 1 ໂຕທ້າຍຂອງລາງວັນທີ 1.

 ທ່ານຜູ້ອໍານວຍການບໍລິສັດລັດວິສາຫະກິດຫວຍພັດທະນາເນັ້ນຕື່ມອີກວ່າ: ການດຳເນີນທຸລະກິດຂອງຫວຍພັດທະນາໃນໄລຍະຜ່ານມາມີທັງຂໍ້ສະດວກ, ຂໍ້ຫຍຸ້ງ ຍາກ ແລະສິ່ງທ້າທ້າຍຫຼາຍຢ່າງທີ່ຈະຕ້ອງເອົາໃຈໃສ່ເປັນຕົ້ນ: ມາດຕະການສະກັດກັ້ນຫວຍເຖື່ອນ, ການປຸກລະດົມໂຄສະນາຕ່າງໆໃຫ້ປະຊາຊົນເຂົ້າໃຈກ່ຽວກັບການສ່ຽງໂຊກຊີງລາງວັນກັບກິດຈະການຫວຍພັດທະນາ, ສືບຕໍ່ການປັງປຸງໂຄງປະກອບການຈັດຕັ້ງ ແລະບຸກຄະລາກອນຂອງບໍລິສັດໃຫ້ກະທັດຮັດ ແລະຄວາມໂປ່ງໃສ.

  ເຖິງຢ່າງໃດກໍຕາມຄະນະອຳນວຍການ, ຄະນະພະແນກ, ພ້ອມດ້ວຍພະນັກງານໄດ້ພະຍາຍາມບຸກບືນໃນການດຳເນີນທຸລະກິດເຮັດໃຫ້ລວມຍອດລາຍຮັບບັນລຸໄດ້ 25,8 ຕື້ກີບ ເທົ່າກັບ 109,20% ຂອງແຜນການ, ລວມຍອດລາຍຈ່າຍ 8,9 ຕື້ກີບ ເທົ່າກັບ 34,68% ຂອງລາຍຮັບລວມ, ກຳໄລລວມ 16,6 ຕື້ກີບ ເທົ່າ 65,32% ຂອງລາຍຮັບລວມ, ປະຕິບັດພັນທະເຂົ້າງົບປະມານແຫ່ງລັດໄດ້ 14,4 ຕື້ກີບເທົ່າກັບ 114,17% ຂອງແຜນການລື່ນແຜນການ 14,17%. ໃນນັ້ນ, ອາກອນມູນຄ່າເພີ່ມ, ອາກອນລາຍໄດ້, ອາກອນກໍາໄລລ່ວງໜ້າ, ເງິນເປັນຜົນກຳໄລລ່ວງໜ້າ.

 ໂອກາດນີ້, ທ່ານ ສົມດີ ດວງດີ ຮອງນາຍົກລັດຖະມົນຕີລັດຖະມົນຕີກະຊວງການເງິນໄດ້ມີທິດຊີ້ນຳໃຫ້ຄະນະອຳນວຍການຫວຍພັດທະນາເອົາໃຈໃສ່ປັບປຸງຂອດການບໍລິການ, ການຍາດແຍ່ງສ່ວນແບ່ງຕະຫຼາດຂອງບັນດາຕົວແທນຈໍາໜ່າຍ, ການອອກຫວຍຕ້ອງຕອບສະໜອງໄດ້ກັບຄວາມຮຽກຮ້ອງຕ້ອງການຂອງຜູ້ສຽງໂຊກຊິງລາງວັນຢ່າງມີຄວາມໂປ່ງໃສ, ຫັນການຈໍາໜ່າຍຫວຍໃຫ້ມີຄວາມທັນສະໄໝສາມາດຄຸ້ມຄອງໄດ້ຢ່າງລວມສູນ, ຄົ້ນຄວ້າປັບປຸງນິຕິກຳຄຸ້ມຄອງການເຄື່ອນໄຫວຫວຍ ພັດທະນາໃຫ້ສອດຄ່ອງແຕ່ລະໄລຍະເປັນຕົ້ນແມ່ນ: ການຄົ້ນຄວ້າປຶກສາຫາລືກ່ຽວກັບຜະລິດຕະພັນທີ່ໄດ້ຮັບອະນຸຍາດກຽມທົດລອງຈໍາໜ່າຍເຊັ່ນ: ຫວຍເລກ 6 ໂຕ, 5 ໂຕ, ເລກ 4 ໂຕ, ເລກ 3 ໂຕ, ເລກ 2 ໂຕ, ເລກ 3 ໂຕ, 2 ໂຕທ້າຍສະຫຼັບກັນ, ເລກ 1 ໂຕໜ້າ ແລະ ເລກ 1 ໂຕທ້າຍຂອງລາງວັນທີ 1, ແຜນພັດທະ ນາ, ສ້າງແຜນແມ່ບົດ; ໃນການພັດທະນາລັດວິສາຫະກິດ ຫວຍພັດທະນາໃນສະເພາະໜ້າ ຍາວນານ, ແຜນພັດທະນາວຽກ ງານລັດວິສາຫະກິດຫວຍພັດທະນາໃນ 5 ປີຕໍ່ໜ້າ, ແຜນພັດທະນາຍາວນານ 10 ປີແຕ່ລະດ້ານ, ສືບຕໍ່ຊີ້ນຳ-ນຳພາການເມືອງແນວຄິດໃຫ້ແກ່ພະນັກງານຂອງລັດວິສາຫະກິດຫວຍພັດທະນາ,ບັນດາຕົວແທນຈໍາໜ່າຍ, ແຜນການເຄື່ອນໄຫວປະຈໍາປີໃຫ້ໄດ້ຕາມແຜນການລື່ນແຜນການ, ໂຄສະນາເຜີຍແຜ່ໃຫ້ສັງຄົມເຂົ້າໃຈຢ່າງຖືກຕ້ອງໃນການສ່ຽງໂຊກຊິງລາງວັນດ້ວຍຄວາມສະໝັກໃຈຂອງຜູ້ຫຼິ້ນ, ຊຸກຍູ້ເຈົ້າໜ້າທີ່ກ່ຽວຂ້ອງໃນການຕ້ານ ແລະ ສະກັດກັ້ນການແຜ່ລາມຫວຍເຖື່ອນ (ຫວຍຕ່າງປະເທດນອກລະບົບ), ສືບຕໍ່ປະຕິ ບັດພັນທະເຂົ້າງົບປະມານໃຫ້ໄດ້ຕາມແຜນການລື່ນແຜນການ ແລະອື່ນໆ.

  ນອກນີ້ ທ່ານ ສົມດີ ດວງດີ ຮອງນາຍົກລັດຖະມົນຕີລັດຖະມົນຕີກະຊວງການເງິນພ້ອມດ້ວຍຄະນະໄປຢ້ຽມຢາມເບິ່ງສະຖານທີ່ກະກຽມບໍລິການເບີກຈ່າຍເງິນລາງ ວັນ, ສູນເຊີເວີ້, ສະໂມສອນອອກເລກລາງວັນຫວຍພັດທະນານຳອີກດ້ວຍ.

------------

ຂຽນໂດຍ: ກະຊວງການເງິນ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์