ຮຸ່ງອາລຸນ ທຸລະກິດຮັບ-ສົ່ງສິນຄ້າ

 ບໍລິສັດ ຮຸ່ງອາລຸນຂົນ ສົ່ງດ່ວນເປັນທຸລະກິດຂົນສົ່ງແບບໃໝ່ທີ່ໃຫ້ບໍລິການຄວບຄຸມທຸກກຸ່ມລູກຄ້ານັບຕັ້ງແຕ່ຂະໜາດນ້ອຍ ແລະ ໃຫຍ່ຊຶ່ງເປັນການກະຈາຍຜະລິດຕະ ພັນຂອງຊາວກະສິກໍາ, ຫັດຖະກໍາໃຫ້ເຂົ້າເຖິງຕະຫຼາດໃນພື້ນທີ່ຕ່າງໆ ດ້ວຍຮູບແບບບໍລິການທີ່ປອດໄພ, ວ່ອງໄວ ແລະຍຸຕິທໍາ, ຊຶ່ງເມື່ອບໍ່ດົນຜ່ານມານີ້ບໍລິສັດຮຸ່ງອາ ລຸນຂົນສົ່ງດ່ວນກໍຮັບລາງວັນນັກທຸລະກິດໜຸ່ມດີເດັ່ນຈາກສູນກາງຊາວໜຸ່ມປະຊາຊົນປະຕິວັດລາວ ແລະສະພາການຄ້າ ແລະອຸດສາຫະກໍາແຫ່ງຊາດລາວ.  

  ທ່ານ ສີສະຫວັນ ມ່າຢົງເຊີນ ຜູ້ບໍລິຫານບໍລິສັດ ຮຸ່ງອາລຸນຂົນສົ່ງດ່ວນ ຫຼື ບໍລິສັດ ຮຸ່ງອາລຸນການຄ້າຂາອອກ-ຂາເຂົ້າ ແລະຂົນສົ່ງທາງບົກຈໍາກັດຜູ້ດຽວໄດ້ຖະແຫຼງ ຂ່າວຕໍ່ສື່ມວນຊົນເມື່ອວັນທີ 9 ສິງຫາ ໃຫ້ຮູ້ວ່າ: ຮຸ່ງອາລຸນຂົນສົ່ງດ່ວນເປັນບໍລິສັດຮັບບໍລິການຂົນສົ່ງສິນຄ້າຂະໜາດນ້ອຍ ແລະ ຂະໜາດໃຫຍ່ທັງພາຍໃນນະຄອນ ຫຼວງວຽງຈັນ ແລະຕ່າງແຂວງ, ໂດຍໃນໄລຍະ 6 ເດືອນທີ່ກໍ່ຕັ້ງບໍລິສັດໄດ້ການຕອບຮັບຈາກລູກຄ້າຢ່າງກວ້າງຂວາງປະຈຸບັນການບໍລິການຂົນສົ່ງດ່ວນໄດ້ກວມເອົາທົ່ວປະເທດ, ສະເພາະນະຄອນຫຼວງວຽງຈັນມີແລ້ວ 8 ສາຂາ ແລະ ມີພະນັກງານປະຈໍາຢູ່ແຕ່ລະສາຂາແຕ່ລະແຂວງ ເພື່ອຈັດສົ່ງສິນຄ້າດ້ວຍຮູບແບບບໍລິການທີ່ປອດໄພວ່ອງໄວ ແລະ ຍຸຕິທໍາໂດຍມີພະນັກງານທັງໝົດ 128 ຄົນ.

  ການບໍລິການລາຄາເລີ່ມຕົ້ນແມ່ນ 12 ພັນກີບຕໍ່ຫີບຫໍ່, ຖ້າສິນຄ້າຈໍານວນຫຼາຍແມ່ນຈະຄິດໄລ່ເປັນກິໂລລະ 1.800-2.200 ກີບ, ຊຶ່ງການບັນຈຸຫີບຫໍ່ແມ່ນບໍ່ໃຫ້ກາຍ 50 ກິໂລ ທີ່ສໍາຄັນແມ່ນຈ່າຍເງິນຕົ້ນທາງເພື່ອຫຼີກເວັ້ນການສວຍໃຊ້ໂອກາດໄລ່ຄ່າເພີ່ມຂອງພະນັກງານນໍາສົ່ງທັງນີ້ກໍເພື່ອຄວາມເປັນທໍາແກ່ທຸກຝ່າຍ.

  ສ່ວນທິດທາງແຜນການໃນຕໍ່ໜ້າຜູ້ບໍລິຫານບໍລິສັດ ຮຸ່ງອາລຸນຂົນສົ່ງດ່ວນໃຫ້ຮູ້ຕື່ມວ່າ: ຈະຂະຫຍາຍສາຂາໃນນະຄອນຫຼວງວຽງຈັນໃຫ້ໄດ້ຕື່ມອີກ 7 ສາຂາລວມ ເປັນ 15 ສາຂາ, ສ່ວນຕ່າງແຂວງແມ່ນຈະຂະຫຍາຍຢູ່ແຂວງຜົ້ງສາລີ ແລະໄຊສົມບູນເພື່ອຕອບສະໜອງການບໍລິການລູກຄ້າໃຫ້ສະດວກ ແລະວ່ອງໄວຂຶ້ນເລື້ອຍໆ.

ນອກຈາກນີ້ ບໍລິສັດ ຮຸ່ງອາລຸນຂົນສົ່ງ ດ່ວນຍັງມີແຜນເປີດຮັບຊາວໜຸ່ມນັກສຶກສາເຂົ້າມາຝຶກງານເພື່ອຊ່ວຍສ້າງປະສົບການດ້ານທຸລະກິດຂົນສົ່ງດ່ວນເພື່ອສ້າງຄວາມເຂັ້ມແຂງ ແລະຄວາມພ້ອມໃນການປະກອບອາຊີບ.

----------------

ຂຽນໂດຍ: ແປ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์