ທ່ານ ທຣຳອອກກົດລະບຽບໃໝ່ ຄົນທຸກຍາກໝົດສິດເຂົ້າອາເມລິກາ

  ລັດຖະບານຂອງທ່ານ ໂດນັລ ທຣຳ ປະທານາທິບໍດີຂອງອາເມລິ ກາ ເປີດຕົວກົດລະບຽບໃໝ່ໃນວັນທີ 12 ສິງຫາທີ່ຜ່ານມາຄົນທຸກຍາກໝົດສິດເຂົ້າອາເມລິກາ, ປະຕິເສດທັງວີຊາຖາວອນ ແລະຊົ່ວຄາວ.

ຕາມຂ່າວຕ່າງປະເທດລາຍງານວ່າ ກົດລະບຽບໃໝ່ທີ່ຄາດໝາຍກັນມາດົນນານ ແລະຊຸກຍູ້ໂດຍທ່ານ ສະຕີເຟນ ມິລເລີ ຜູ້ຊ່ວຍຂອງທ່ານ ທຣຳ ຊຶ່ງມີຈຸດປະສົງຕໍ່ຕ້ານຄົນເຂົ້າເມືອງ ຈະມີຜົນບັງຄັບໃຊ້ຕັ້ງແຕ່ກາງ ເດືອນຕຸລາທີ່ຈະມາເຖິງນີ້ ແລະມັນຈະປະຕິເສດຜູ້ຍື່ນຂໍວິຊາທັງຊົ່ວຄາວ ແລະຖາວອນສຳລັບຜູ້ມີມາດຕະຖານລາຍໄດ້ບໍ່ເຂົ້າເກນ ຫຼື ສຳລັບຂໍຮັບ ຄວາມຊ່ວຍເຫຼືອສາທາລະນະຕ່າງໆບໍ່ວ່າຈະເປັນສະຫວັດດີການ, ຄູປອງ ອາຫານ, ເຄຫະ ແລະໂຄງການປະກັນສຸຂະພາບ ຊຶ່ງການປ່ຽນແປງຄັ້ງ ນີ້ ກໍເພື່ອເປັນການຮັບປະກັນວ່າ ຄົນເຂົ້າເມືອງຈະຕ້ອງເພິ່ງພາຕົນເອງ ບໍ່ເອົາແຕ່ເພິ່ງພາຊັບສິນຂອງລັດແຕ່ພຽງຢ່າງດຽວ, ຈາກກົດລະບຽບ ໃໝ່ໝາຍຄວາມວ່າ ເວລານີ້ຜູ້ຍື່ນຄວາມຈຳນົງຈຳເປັນຕ້ອງສະແດງລາຍ ໄດ້ລະດັບສູງຂຶ້ນ ເພື່ອໃຫ້ໄດ້ຮັບວີຊາອາເມລິກາ.

ຄວາມເຄື່ອນໄຫວຄັ້ງນີ້ໜ້າຈະເປັນກົດລະບຽບທີ່ເຂັ້ມງວດທີ່ສຸດໃນນະໂຍບາຍຕໍ່ຕ້ານຄົນເຂົ້າເມືອງທັງໝົດຂອງລັດຖະບານປະທານາທິບໍດີທຣຳໃນຂະນະທີ່ ທະນາຍຄວາມ ເພື່ອຄົນເຂົ້າເມືອງວິພາກວິຈານແຜນ ດັ່ງກ່າວວ່າ ເປັນຄວາມພະຍາຍາມປັບຫຼຸດຈຳນວນຄົນເຂົ້າເມືອງຖືກກົດໝາຍ ໂດຍຫຼີກເວັ້ນບໍ່ຜ່ານການແກ້ກົດໝາຍຊຶ່ງຈຳເປັນຕ້ອງຜ່ານຄວາມເຫັນດີຂອງສະພາຄອງເກຣສສາກ່ອນ. ຊຶ່ງກົດລະບຽບໃໝ່ນີ້ມີພື້ນຖານ ມາຈາກກົດໝາຍຄົນເຂົ້າເມືອງປີ 1882 ຊຶ່ງອະນຸຍາດໃຫ້ລັດຖະບານ ອາເມລິກາປະຕິເສດວີຊາໃຜກໍຕາມທີ່ອາດກາຍເປັນບຸກຄົນທີ່ຕ້ອງຂໍ ຄວາມຊ່ວຍເຫຼືອທາງການເງິນຈາກລັດ.

ພາບ ແລະຂາ່ວຈາກ: ໜັງສືພິມເສດຖະກິດ-ສັງຄົມ

• 14/08/2019