ລັດຈະເພີ່ມອັດຕາລ້ຽງລູກດ້ວຍນົມແມ່ໃຫ້ໄດ້ 50% ໃນປີ 2025

ກຸ່ມອົງການຈັດຕັ້ງທາງສັງຄົມເພື່ອໂພສະນາການ (Sun CSA) ຮ່ວມກັບສາທາລະນະສຸກໄດ້ຈັດງານ “ຖະແຫຼງກ່ຽວກັບການລ້ຽງລູກດ້ວຍນົມແມ່” ໃນວັນທີ 12 ສິງຫາ 2019 ທີ່ນະຄອນຫຼວງວຽງຈັນ, ໂດຍມີທ່ານ ບຸນເພັງພິ ລາວົງ ຫົວໜ້າກົມອະນາໄມ ແລະສົ່ງເສີມສຸຂະພາບ, ທ່ານ ນາງ ຈັນສີ ພິມພະຈັນ ປະທານສະ ມາ ຄົມສົ່ງເສີມສຸຂະພາບຄອບຄົວ, ທ່ານ ນາງ ເຄລີ່ ຄຳພູໄຊ ຜູ້ຊ່ຽວ ຊານດ້ານສຸຂະພາບປະຈຳອົງການຊ່ວຍເຫຼືອເດັກ (ປະທານ Sun CSA) ແລະ ຄອບຄົວຕົວ ແບບໃນການລ້ຽງລູກດ້ວຍນົມແມ່ເຂົ້າຮ່ວມ.

 ທ່ານ ບຸນເພັງ ພິລາວົງ ກ່າວວ່າ: ອີງຕາມຜົນການສຳຫຼວດຕົວຊີ້ວັດດັດສະນີໝາຍແຫ່ງຊາດ (LSIS II) ເມື່ອປີ 2017, ອັດຕາການລ້ຽງລູກດ້ວຍນົມແມ່ໃນ ສປປ ລາວ ແມ່ນຍັງຕໍ່າ, ຢູ່ທ່ີ 45% ແລະ ມີພຽງ 50% ຂອງແມ່ໃນ ສປປ ລາວ ທີ່ເລີ່ມ ໃຫ້ລູກກີນນົມແມ່ທັນທີຫຼັງເກີດພາຍໃນໜຶ່ງຊົ່ວໂມງທຳອິດ, ນອກຈາກນີ້ຍັງມີພໍ່ແມ່ຫຼາຍຄົນຍັງບໍ່ຮູ້ວ່ານົມຜົງ ແລະນົມປຸງແຕ່ງຕ່າງໆສຳລັບເດັກແມ່ນບໍ່ມີຄຸນປະໂຫຍດຕໍ່ສຸຂະພາບຫຼາຍເທົ່ານົມແມ່ ແລະ ຍັງເພີ່ມຄວາມສ່ຽງໃຫ້ເດັກເຈັບປ່ວຍໄດ້ງ່າຍ.

ເພື່ອແກ້ໄຂບັນຫານີ້,ໃນຍຸດທະສາດແຫ່ງຊາດດ້ານໂພສະນາການ ແລະແຜນປະຕິບັດງານຂອງ ສປປ ລາວ ສະບັບໃໝ່,ລັດຖະບານລາວໄດ້ຕັ້ງເປົ້າໝາຍເພື່ອເພີ່ມທະວີການລ້ຽງລູກດ້ວຍນົມແມ່ໃຫ້ໄດ້ 50% ໃນປີ 2025 ນອກນັ້ນລັດຖະບານລາວໄດ້ສະໝັກເຂົ້າເປັນສະມາຊິກຂອງຂະບວນການສາກົນທີ່ເຄື່ອນໄຫວວຽກງານສົ່ງ ເສີມດ້ານໂພຊະນາການໃນປີ 2011, ເລັງໃສ່ປັບປຸງໂພຊະນາການຂອງຄອບຄົວໂດຍສະເພາະແມ່ນແມ່ຍິງ ແລະ ເດັກອ່ອນ, ອົງການຈັງຕັ້ງທາງສັງຄົມລາວ ແລະສາກົນໄດ້ສະໜັບສະໜູນວຽກງານນີ້ໂດຍການສ້າງກຸ່ມຂອງອົງການຈັດຕັ້ງທາງສັງຄົມເພື່ອຊ່ວຍລັດຖະບານລາວໃນຄວາມພະຍາຍາມຕໍ່ການປັບປຸງໂພຊະນາການ.

  ທ່ານ ດຣ ບຸນເພັງ ພິລາວົງ ກ່າວຕື່ມວ່າ: ເພື່ອໃຫ້ແມ່ສາມາດຜ່ານຜ່າຂໍ້ຫຍຸ້ງຍາກຕ່າງໆໃນການໃຫ້ລູກກິນນົມແມ່ພຽງແຕ່ຢ່າງດຽວຈົນຮອດອາຍຸ 6 ເດືອນໄດ້ ຄອບຄົວ, ຊຸມຊົນ, ອົງກອນ ແລະສະຖານທີ່ເຮັດວຽກຕ່າງໆ ໂດຍສະເພາະໂຮງງານຈະຕ້ອງໄດ້ເອົາໃຈໃສ່ສ້າງສະພາບແວດລ້ອມທີ່ເອື້ອອໍານວຍໃຫ້ແກ່ແມ່ດ້ວຍການມີເຮືອນຝາກເດັກຫຼື ຫ້ອງລ້ຽງເດັກໃນອົງກອນ ຫຼື ໂຮງງານເພື່ອໃຫ້ແມ່ສາມາດສືບຕໍ່ລ້ຽງລູກດ້ວຍນົມແມ່ຢ່າງດຽວໄດ້.

---------

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์