ສາລະວັນ ພ້ອມອຳນວຍຄວາມສະດວກໃຫ້ນັກທຸລະກິດ ທີ່ສົນໃຈດຳເນີນກິດຈະການທ່ອງທ່ຽວ

   ເນື່ອງໃນໂອກາດທີ່ທ່ານ ສີສຸວັນ ວົງຈອມສີ ເຈົ້າແຂວງໆ ສາລະວັນ ໄດ້ຕ້ອນຮັບການມາ ຢ້ຽມຢາມ ແລະທ່ອງທ່ຽວຂອງຄະນະນຳແຂວງອຸບົນຣາຊະທານີ ປະເທດໄທ, ໃນວັນທີ 8 ສິງຫານີ້ຢູ່ແຫຼ່ງທ່ອງທ່ຽວຕາດເລາະພ້ອມດ້ວຍຄະນະທັງສອງຝ່າຍ,ໄດ້ຫາລື ໃນການສ້າງເງື່ອນໄຂຮ່ວມກັນ ກ່ຽວກັບວຽກງານການທ່ອງທ່ຽວ ແລະການສະໜອງຂໍ້ມູນດ້ານການ ທ່ອງທ່ຽວ, ທ່າແຮງ, ຈຸດພິເສດ ແລະເງື່ອນໄຂຕ່າງໆທີ່ຈະເຮັດໃຫ້ນັກທຸລະກິດ-ຜູ້ປະກອບການຂອງ ແຂວງອຸບົນຣາຊະທານີ ຫາກມີ ຄວາມສົນໃຈຢາກມາລົງທຶນ ແລະ ສຶກສາຄວາມເປັນໄປໄດ້ກ່ຽວກັບ ການດຳເນີນກິດຈະການທ່ອງທ່ຽວຢູ່ແຂວງສາລະວັນພ້ອມທີ່ຈະອຳ ນວຍຄວາມສະດວກ.

ທ່ານເຈົ້າແຂວງສາລະວັນ ກ່າວວ່າ: ແຂວງສາລະວັນ ເປັນ ແຂວງໜຶ່ງທີ່ນອນຢູ່ໃນ 4 ແຂວງພາກໃຕ້,ມີຊາຍແດນຕິດຈອດກັບຫຼາຍປະເທດເປັນຕົ້ນ: ທິດຕາເວັນ ອອກຕິດກັບບັນດາແຂວງ ສສ. ຫວຽດນາມຍາວ166  ກິໂລແມັດ, ທິດຕາເວັນຕົກຕິດກັບປະເທດໄທຍາວ 90 ກິໂລແມັດ, ທິດເໜືອຕິດ ກັບແຂວງສະຫວັນນະເຂດ ຍາວ 270 ກິໂລແມັດ ແລະທິດຕາເວັນຕົກສຽງໃຕ້ຕິດກັບແຂວງຈຳປາ ສັກ ແລະແຂວງເຊກອງ.ແຂວງ ສາລະວັນ ມີ 10 ຊົນເຜົ່າ ທີ່ມີວິຖີຊີວິດ, ຮີດຄອງປະເພນີ ແລະວັດທະນະທຳທີ່ຄ້າຍຄືກັນ ແລະແຕກ ຕ່າງກັນລ້ວນແລ້ວແຕ່ມີສະເໜ່, ສິ່ງດຶງດູດຈິດໃຈນັກທ່ອງທ່ຽວທັງພາຍໃນ ແລະຕ່າງປະເທດມີຄວາມສົນໃຈຢາກທ່ຽວຊົມ ແລະສຳພັດ ບັນຍາກາດກັບວັດທະນະທຳ,ວິຖີ ຊີວິດດັ່ງເດີມຂອງປະຊາຊົນເຊັ່ນ:ງານບຸນປະເພນີຕ່າງໆຂອງແຕ່ລະຊົນເຜົ່າ, ພາສາປາກເວົ້າ ແລະການນຸ່ງຖືທີ່ແຕກຕ່າງກັນທີ່ຊ້ອນດ້ວຍ ຄວາມສວຍງາມ, ຄວາມເປັນເອກະລັກວັດທະນະທຳຂອງເຂົາເຈົ້າໂດຍສະເພາະ (ສຽງແຄນສຽງລຳ ສາລະວັນ).

ສຳລັບແຫຼ່ງທ່ອງທ່ຽວແຂວງ ສາລະວັນ ແມ່ນມີຫຼາຍກວ່າ 90 ແຫ່ງ, ທາງດ້ານປະຫວັດສາດ, ວັດທະນະທຳ ແລະການທ່ອງທ່ຽວທຳມະຊາດເປັນຕົ້ນ:ຕາດເລາະຕາດ ຮັງ ທີ່ເປັນໜຶ່ງແຫຼ່ງທ່ອງທ່ຽວທີ່ ໄດ້ຮັບຄວາມນິຍົມ,ຫໍໄຕວັດກາງ,ແຫຼ່ງທ່ອງທ່ຽວອຸທິຍານພູຜາສຸກ ຄົ້ນພົບໃໝ່ ທີ່ກຳລັງພັດທະນາ ແລະ ອື່ນໆ, ຊຶ່ງຫຼາຍບ່ອນໄດ້ພັດທະນາ ແລະອີກຫຼາຍບ່ອນບໍ່ທັນໄດ້ຮັບການພັດທະນາແຕ່ກໍ່ສາມາດຮອງ ຮັບນັກທ່ອງທ່ຽວທີ່ມາທ່ຽວຊົມໄດ້ ແລະຖ້າຫາກໂຄງການກໍ່ສ້າງຂົວ ຂ້າມນໍ້າຂອງມິດຕະພາບລາວ-ໄທແຫ່ງທີ 6 ລະຫວ່າງແຂວງສາລະ ວັນ ແລະແຂວງອຸບົນຣາຊະທານີ ສຳເລັດຍິ່ງຈະເປັນການເພີ່ມທະວີ ການຮ່ວມມືໃນຫຼາຍຂົງເຂດ ໂດຍສະເພາະເສດຖະກິດແລວຕາເວັນຕົກ-ຕາເວັນອອກຍິ່ງຈະໄດ້ຮັບ ການພັດທະນາລະຫວ່າງລາວ-ຫວຽດນາມ ແລະລາວ-ໄທ ໃນທຸກໆຂົງເຂດເປັນຕົ້ນ: ແມ່ນວົງ ຈອນການທ່ອງທ່ຽວ, ການຄ້າ ແລະ ອື່ນໆ.ຊຶ່ງແຂວງສາລະວັນ ໄດ້ກະກຽມຄວາມພ້ອມໃນດ້ານການບໍລິການສະຖານທີ່ພັກແຮມ, ຮ້ານອາຫານ,ເຄື່ອງທີ່ລະນຶກຕ່າງໆ ແລະ ມີແຜນຮອງຮັບໄວ້.

ນອກຈາກນັ້ນ, ເພື່ອເພີ່ມທະ ວີມິດຕະພາບລາວ-ໄທ  ກໍ່ຄືແຂວງ ສາລະວັນ ກັບ ແຂວງອຸບົນຣາຊະ ທານີ ໃຫ້ແໜ້ນແຟ້ນ ແລະເປັນການຮ່ວມມືໃຫ້ຫຼາຍຂຶ້ນຍິ່ງຈະເຮັດ ໃຫ້ສອງແຂວງໄດ້ຮັບການພັດທະນາ, ແລກປ່ຽນສິນຄ້າ, ການທ່ອງ ທ່ຽວ  ແລະການບໍລິການຜະລິດຕະ ພັນດ້ານກະສິກຳໃຫ້ນັບມື້ນັບຫຼາຍ ຂຶ້ນ.

ຈາກນັ້ນທ່ານເຈົ້າແຂວງສາລະວັນຍັງໄດ້ເຊີນຊວນບັນດານັກທຸລະ ກິດ, ຜູ້ປະກອບການຈາກແຂວງອຸບົນຣາຊະທານີມາສຶກສາ, ສຳຫຼວດຄວາມເປັນໄປໄດ້ທີ່ຈະມາລົງ ທຶນໃນແຂວງສາລະວັນ ແລະພ້ອມທີ່ຈະອຳນວຍຄວາມສະດວກ,ສ້າງເງື່ອນໄຂຮ່ວມກັນໃນການພັດທະນາສອງແຂວງຄື:ສາລະວັນ ແລະ ອຸບົນຣາຊະທານີ.

------------------

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์