ໄຊຍະໄຂ້ຍຸງ 484 ຄົນ ເສຍຊີວິດ 1 ຄົນແລ້ວ

  ປີນີ້ການລະບາດຂອງໄຂ້ຍຸງລາຍໄດ້ເພີ່ມຫຼາຍຂຶ້ນໃນທົ່ວປະເທດເວົ້າສະເພາະແຂວງໄຊຍະບູລີແມ່ນພົບພະຍາດໄຂ້ຍຸງລາຍເປັນກໍລະນີທຳອິດ 1 ກໍລະ ນີຢູ່ບ້ານໂພນງາມ ເມືອງປາກລາຍໃນກາງເດືອນມີນາ 2019 ແຕ່ການລະບາດບໍ່ສາມາດສະກັດກັ້ນໄດ້ສະຫຼຸບຮອດເດືອນສິງຫາທົ່ວແຂວງມີການລະບາດກວມແລ້ວ 8 ເມືອງ 92 ບ້ານ 484 ຄົນ ແລະມີຜູ້ເສຍຊີວິດ 1 ຄົນ.

 ຕາມການໃຫ້ຂໍ້ມູນຈາກພະແນກສາທາລະນະສຸກ ແຂວງໄຊຍະບູລີ ໃນຕົ້ນເດືອນສິງຫານີ້ວ່າ: ໃນທັງໝົດນັ້ນການມີລະບາດຢູ່ເມືອງໄຊຍະບູລີ 37 ບ້ານ  252 ຄົນ ເສຍຊີວິດ 1 ຄົນ, ເມືອງປາກລາຍ 8 ບ້ານມີ 23 ຄົນ, ເມືອງພຽງ 26 ບ້ານ 123 ຄົນ, ເມືອງ ບໍ່ແຕນ 6 ບ້ານ50 ຄົນ, ເມືອງຫົງສາ 7 ບ້ານ 9 ຄົນ, ເມືອງແກ່ນທ້າວ 6 ບ້ານ 25 ຄົນ,ເມືອງຊຽງຮ່ອນ 1 ບ້ານ 1 ຄົນ ແລະ ເມືອງທົ່ງມີໄຊ 1 ບ້ານ 1 ກໍລະນີ ສ່ວນຫຼາຍແມ່ນນອນໃນກຸ່ມອາຍຸ 15-35 ປີ ກວມ 51,1 9%, ກຸ່ມອາຍຸ 35 ປີ ຂຶ້ນ ໄປກວມ 35,28% ແລະ13,53% ແມ່ນໃນກຸ່ມ ອາຍຸ 15 ປີລົງມາ.

 ຕໍ່ກັບສະພາບດັ່ງກ່າວເພື່ອເປັນການຕອບໂຕ້ການລະບາດ ແລະ ສະກັດກັ້ນການລະບາດໄຂ້ຍຸງລາຍບໍ່ໃຫ້ແຜ່ກ້ວາງອອກອົງການປົກຄອງແຂວງກໍ່ຄືປະທານຄະນະກຳ ມະການກັນ ແລະ ຕ້ານຄວບຄຸມໄຂ້ຍຸງລາຍຂັ້ນແຂວງພ້ອມດ້ວຍທຸກຂະແໜງການ, ໜ່ວຍງານຕະຫຼອດຮອດພໍ່ແມ່ປະຊາຊົນລົງໂຕ້ຕອບການລະບາດຢູ່ບ້ານທີ່ມີການລະບາດໄຂ້ຍຸງລາຍເຕົ້າໂຮມຊາວບ້ານເຮັດສຸຂະສຶກສາອະນາໄມຂ້ວມກະໂປະ, ກະປ໋ອງ, ອະນາໄມຖາງຫຍ້າທີ່ຮົກເຮື້ອເພື່ອທຳລາຍແຫຼ່ງເພາະພັນຂອງຍຸງລາຍໃນທຸກໆອາທິດ.

 ສະນັ້ນເພື່ອບໍ່ຢາກໃຫ້ຍຸງກັດເຮົາຕ້ອງຫຼຸດຜ່ອນຄວາມແໜ້ນໜາຂອງຍຸງລາຍລົງດ້ວຍການປະຕິບັດ 5ປ ໃຫ້ເປັນປົກກະຕິຄື: ປິດພາສະນະທີ່ບັນຈຸນໍ້າໃນເຮືອນ ແລະນອກເຮືອນ, ປ່ຽນນໍ້າ ແລະ ພັດຖູພາຊະນະ, ປ່ອຍປາຫາງນົກຍຸງໃສ່ພາຊະນະທີ່ບັນຈຸນໍ້າເພື່ອໃຫ້ກິນໜອນນໍ້າຍຸງລາຍ ແລະ ປັບປຸງອະນາໄມບໍລິເວນທີ່ຢູ່ອາໄສທັງໃນ-ນອກເຮືອນໃຫ້ສະອາດ.

  ພະແນກສາທາລະນະສຸກແຂວງໄຊຍະບູລີໃຫ້ຮູ້ຕື່ມວ່າ: ປະຕິບັດ 5 ປ ຄວນໃຫ້ເປັນນິໄສປະຕິບັດເປັນປະຈຳທຸກໆອາທິດສິ່ງສຳຄັນຕ້ອງກຽມຄວາມພ້ອມດ້ານ: ຢາ, ອຸປະກອນການແພດ, ສະຖານທີ່ບໍລິການ, ບຸກຄະລາກອນດ້ານການແພດ, ພາກສ່ວນອໍານວຍຄວາມສະດວກ, ຈັກຜົ່ນຢາ, ນໍ້າຢາຂ້າໜອນນໍ້າ. ໂຮງໝໍແຂວງຕ້ອງຊີ້ນໍາດ້ານວິຊາການໂຮງໝໍຂັ້ນລຸ່ມຂອງຕົນ ແລະກຽມພ້ອມຮັບມືໃຫ້ແກ່ການລະບາດມີການປະສານງານກັບຂະແໜງປິ່ນປົວພະແນກສາທາລະນະສຸກແຂວງ ແລະຂະ ແໜງການທີ່ກ່ຽວຂ້ອງພ້ອມທັງກະກຽມພະນັກງານຂອງຕົນລົງຊ່ວຍໂຮງໝໍຊຸມຊົນ ແລະໂຮງໝໍນ້ອຍ.

--------------

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์