ບົ້ງສາລີລະບາດແລ້ວເກືອບ 60 ເມືອງ ເສຍຫາຍ 40 ພັນກວ່າເຮັກຕາ

 ການລະບາດຂອງບົ້ງຝູງສາລີໃນຂອບເຂດທົ່ວປະເທດຈຳນວນ 12 ແຂວງໃຊ້ເວລາບໍ່ເຖິງ 3 ເດືອນ, ກໍສາມາດເຂົ້າໄປທຳລາຍສວນສາລີຂອງຊາວສວນແລ້ວ 40 ພັນກວ່າເຮັກຕາຈາກທີ່ປູກໄດ້ທັງໝົດ 1,06 ແສນເຮັກຕາ, ເກືອບ 60 ເມືອງ, ໃນນັ້ນມີ 4 ແຂວງ ທີ່ຍັງມີໂຕເລກເພີ່ມຂຶ້ນຢ່າງຕໍ່ເນື່ອງໂດຍສິ່ງທີ່ເຮັດໄດ້ໃນປະຈຸບັນແມ່ນສຸມໃສ່ການກຳຈັດຕາມທ່າແຮງທີ່ມີຂອງແຕ່ລະທ້ອງຖິ່ນ.

 ອີງຕາມການລາຍຂອງສູນປ້ອງກັນພືດກົມປູກຝັງກະຊວງກະສິກຳ ແລະປ່າໄມ້ທີ່ໄດ້ເກັບກຳມາຮອດວັນທີ 2 ສິງຫາ 2019 ໃຫ້ຮູ້ວ່າ: ການລະບາດຂອງບົ້ງຝູງສາລີ ໃນຈຳນວນ 12 ແຂວງມາຮອດປະຈຸບັນຍັງມີທ່າອ່ຽງເພີ່ມຂຶ້ນຢ່າງຕໍ່ເນື່ອງເຫັນໄດ້ຈາກການລະບາດເບື້ອງຕົ້ນໃນແຂວງໄຊຍະບູລີ ຊ່ວງກາງເດືອນພືດສະພາ ມາເຖິງດຽວນີ້ມີ 12 ແຂວງ ໄດ້ມີການລະບາດແລ້ວ, ໂດຍຕາມແຜນການປູກສາລີປີນີ້ວາງໄວ້ 1,26 ແສນເຮັກຕາ ຊຶ່ງຜ່ານການປູກຕົວຈິງສຳເລັດແລ້ວ 1,04 ແສນເຮັກ ຕາ, ແຕ່ວ່າຖືກບົ້ງຝູງສາລີເຂົ້າທຳລາຍແລ້ວຈຳນວນ 40,75 ພັນເຮັກຕາຂອງ 691 ບ້ານ, 59 ເມືອງໃນ12 ແຂວງ.

 ໃນນັ້ນມີ 4 ແຂວງ ທີ່ຍັງມີການລະບາດໜັກຄື: ແຂວງອຸດົມໄຊ ເພີ່ມຈາກ 94 ບ້ານມາເປັນ 211 ບ້ານ ໃນເນື້ອທີ່ 12,37 ພັນເຮັກຕາ ເພີ່ມເປັນ 13,02 ພັນເຮັກ ຕາ, ສ່ວນແຂວງຫົວພັນເພີ່ມຈາກ 25 ບ້ານເປັນ 74 ບ້ານ ແລະ 8 ເມືອງ ມາເປັນ 9 ເມືອງ, ສິດພົ່ນຢາໄດ້ 570 ເຮັກຕາ, ແຂວງວຽງຈັນ ເພີ່ມບ້ານຈາກ 3 ບ້ານເປັນ 13 ບ້ານ ແລະ 3 ເມືອງ ເປັນ 4 ເມືອງ, ສຳລັບແຂວງທີ່ 4 ແມ່ນ ແຂວງຜົ້ງສາລີ ເພີ່ມພື້ນທີ່ລະບາດຈາກ 279 ເຮັກຕາ ເປັນ 1,89 ພັນເຮັກຕາ, ພື້ນທີ່ຖືກກະທົບຈາກ 27,5 ເຮັກຕາ ເປັນ 480 ເຮັກຕາ, ບ້ານຈາກ 25 ບ້ານ ມາເປັນ 108 ບ້ານ.

  ພ້ອມນັ້ນໃນຈຳນວນ 8 ແຂວງທີ່ມີການລະບາດແມ່ນຍັງບໍ່ທັນໄດ້ຮັບແຈ້ງເຖິງການເພີ່ມຂຶ້ນເປັນຕົ້ນ ແຂວງໄຊຍະບູລີ ຊຶ່ງເປັນແຂວງທີ່ມີການລະບາດຮ້າຍແຮງຈາກການປູກທັງໝົດ 34,99 ພັນເຮັກຕາ ໄດ້ຮັບຜົນກະທົບ 15,46 ພັນເຮັກຕາ ຂອງຈຳນວນ 174 ບ້ານ ໃນ 11 ເມືອງ, ນອກນັ້ນຍັງມີແຂວງຊຽງຂວາງຖືກກະ ທົບ 6,93 ພັນເຮັກ ຕາຈາກການປູກໄດ້ 20,87 ພັນເຮັກຕາ, ແຂວງຫຼວງພະບາງຖືກກະທົບ 190 ເຮັກຕາ, ນະຄອນຫຼວງວຽງຈັນ 71 ເຮັກຕາ, ບໍລິຄຳໄຊ 14 ເຮັກຕາ, ສະຫວັນນະເຂດ, ສາລະວັນ ແຂວງແຂວງບໍ່ແກ້ວ 11 ເຮັກຕາ ແມ່ນຍັງຄົງທີ່ບໍ່ມີການເພີ່ມຂຶ້ນ.

 ດັ່ງທີ່ຮູ້ແລ້ວວ່າວົງຈອນຊີວິດໜຶ່ງຂອງບົ້ງຝູງສາລີເລີ່ມຈາກໄຂ່ຮອດໂຕແກ່ໃຊ້ເວລາປະມານ 30-40 ວັນ, ມີ 6 ໄລຍະຂອງການຂະຫຍາຍພັນ, ໂດຍບົ້ງເພດແມ່ສາ ມາດວາງໄຂ່ໄດ້ປະມານ 100-200 ໜ່ວຍ ແລະໂຕໜຶ່ງສາມາດໃຫ້ໄຂ່ໄດ້ທັງໝົດ 1,5-2 ພັນໜ່ວຍ, ພ້ອມດຽວກັນນັ້ນໂຕແກ່ຂອງບົ້ງຊະນິດນີ້ສາມາດບິນໄດ້ປະ ມານ 100 ກິໂລແມັດຕໍ່ ໜຶ່ງຄືນ,ສະນັ້ນເພື່ອເປັນການຢັບຢັ້ງການລະບາດຂອງພະຍາດດັ່ງກ່າວໃຫ້ນັບມື້ຫຼຸດໜ້ອຍຖອຍລົງ, ສູນປ້ອງກັນພືດກົມປູກຝັງກະຊວງກະ ສິກຳ ແລະປ່າໄມ້ແມ່ນໄດ້ສຸມໃສ່ການຝຶກອົບຮົມໃຫ້ແກ່ພະນັກງານ ແລະຊາວກະສິກອນກ່ຽວກັບການປ້ອງກັນ ແລະການກຳຈັດບົ້ງຝູງສາລີ.

------------

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์