ເມືອງສັງທອງ ຈັດງານບຸນກອງເຂົ້າໃຫຍ່ ຕິດພັນປີທ່ອງທ່ຽວ ລາວ-ຈີນ

ອົງການປົກຄອງເມືອງສັງທອງ ນະຄອນຫຼວງວຽງຈັນ ໄດ້ຈັດງານບຸນກອງເຂົ້າໃຫຍ່ຂຶ້ນໃນວັນທີ 12 ມັງກອນ 2019 ທີ່ບ້ານໃຫຍ່ນາຈະເລີນເພື່ອເປັນການສົ່ງເສີມປີທ່ອງທ່ຽວລາວ-ຈີນ ກໍຄືສືບສານຕຳນານຮີດຄອງປະເພນີທີ່ປະຕິບັດກັນມາ, ໂດຍການເປັນປະທານຂອງທ່ານ ດາວເພັດ ອາລຸນ ເຈົ້າເມືອງໆສັງທອງ, ທ່ານ ອຸ່ນທວງ ຂາວພັນ ຮອງລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະທ່ອງທ່ຽວ (ຖວທ), ທ່ານ ສີຫຸນ ສິດທິລືໄຊ ຮອງເຈົ້າຄອງນະຄອນຫຼວງ,ພ້ອມດ້ວຍບັນດາອ້າຍນ້ອງ ປກສ-ປກຊ ແລະພໍ່ແມ່ປະຊາຊົນເຂົ້າຮ່ວມ.

ທ່ານ ບຸນອູ ໄຊຍະວົງ ປະທານແນວລາວສ້າງຊາດບ້ານໃຫຍ່ນາຈະເລີນໄດ້ກ່າວວ່າ: ບຸນກອງເຂົ້າໃນປີນີ້ປະຊາຊົນບັນດາເຜົ່າໃນກຸ່ມບ້ານໃຫຍ່ນາຈະເລີນໄດ້ສາມັກຄີສ້າງກອງເຂົ້າ 4 ກອງ. ໃນນັ້ນ, ກອງໃຫຍ່ 1 ກອງກວ້າງ 6 ແມັດ ສູງ 8 ແມັດ, ກອງນ້ອຍ 3 ກອງ ກວ້າງ 2 ແມັດ ສູງ 3 ແມັດຊຶ່ງໃນກອງເຂົ້າໃຫຍ່ຍັງມີວັດຖຸອຸປະກອນການຜະລິດຕ່າງໆທີ່ເປັນເຄື່ອງມືການຜະລິດ, ເປັນຫົວຄິດປະດິດສ້າງຂອງປະຊາຊົນ, ໃນພິທີງານບຸນກອງເຂົ້າໄດ້ມີການແຫ່ຜາສາດອ້ອມວັດບ້ານໃຫຍ່ນາຈະເລີນ 3 ຮອບຕາມຮີດຄອງປະເພນີໂດຍມີຂະບວນແຫ່ທັງໝົດ 5 ຂະບວນ ຄື: ຂະບວນການນຳ, ຂະບວນ ປກສ–ປກຊ, ຂະບວນຊາວໜຸ່ມ, ຂະບວນສິລະປະ-ວັນນະຄະດີ ແລະຂະບວນມວນຊົນ. ທັງນີ້ເພື່ອເປັນການລ້ຽງຜີໄຮ່ຜີນາຕາມຄວາມເຊື່ອຖືວ່າເປັນເທວະດາມາຮັກສາໄຮ່ນາຮົ້ວສວນ. ໃນພິທີລ້ຽງປະກອບມີຕົ້ມໄກ່, ເຫຼົ້າໄຫ, ກອກຢາ, ເຂົ້າດຳ, ເຂົ້າແດງ, ອາຫານຫວານ-ຄາວ ແລ້ວສານຕາແຫຼວປັກໃສ່ສີ່ແຈຂອງລານເຂົ້າ, ເຮັດກະໂທງ 9 ຫ້ອງ, ສຳລັບລ້ຽງເທວະດາທີ່ຮັກສາໄຮ່ ນາແຕ່ບາງຄອບຄົວກໍເຮັດບາສີບຸນຄຸນເຂົ້າຢູ່ເຮືອນນິມົນພະສົງມາສັນເຂົ້າເຮືອນ ແລະສູດປະຣິຕະມຸງຄຸນເອົາຂວັນເຂົ້າມາສູ່ເລົ້າສູ່ເຍຍເພື່ອໃຫ້ເຂົ້າໄຮ່ເຂົ້ານາໃນລະດູຕໍ່ໄປມີຜົນຫຼາຍຂຶ້ນກວ່າເກົ່າ.

 ທ່ານເຈົ້າເມືອງໆສັງທອງໄດ້ກ່າວວ່າ: ບຸນກອງເຂົ້າແມ່ນຮີດຄອງປະເພນີອັນດີງາມຂອງຊາດຂອງເຜົ່າຊຶ່ງເປັນມໍລະດົກອັນລ້ຳຄ່າຂອງບັນ ພະບຸລຸດຂອງຊາດລາວເຮົາ, ພໍຮອດເດືອນຍີ່ປະຊາຊົນຊາວພຸດໄດ້ສຳເລັດການເກັບກ່ຽວ. ຈາກນັ້ນ, ຈຶ່ງໄດ້ພ້ອມພຽງຮຽງໜ້າເຮັດບຸນກອງເຂົ້າເພື່ອເປັນການລ້ຽງເຈົ້າຖິ່ນເຈົ້າຖານຜູ້ປົກປັກຮັກສາໄຮ່, ນາ, ຮົ້ວ, ສວນຕາມຄວາມເຊື່ອຖື. ໂດຍໃນລະດູຝົນຜ່ານມານີ້ເມືອງສັງທອງ ຖືກຜົນກະທົບໜັກສົມຄວນຈາກອຸທົກກະໄພນ້ຳຖ້ວມແຕ່ກໍສາມາດຜະລິດເຂົ້າໄດ້ເຖິງ 38.619 ໂຕນ. 

แชร์