ເກີດເຫດນໍ້າຖ້ວມຢູ່ຈີນເສຍຊີວິດ 13 ຄົນ

  ເກີດເຫດຝົນຕົກໜັກຕິດຕໍ່ກັນຫຼາຍວັນ ສົ່ງຜົນເຮັດໃຫ້ເກີດນໍ້າຖ້ວມ ຢູ່ ສປ ຈີນ ສ້າງຄວາມເສຍຫາຍຕໍ່ບ້ານເຮືອນຫຼາຍສິບຫຼັງ ແລະມີຜູ້ເສຍຊີວິດແລ້ວ 13 ຄົນ.

ຕາມຂ່າວຕ່າງປະເທດລາຍງານວ່າອຸທົກໄພຈາກພາຍຸຝົນທີ່ພັດເຂົ້າຢ່າງໜັກສົ່ງຜົນເຮັດໃຫ້ມີຜູ້ເສຍຊີວິດ 13 ຄົນ ແລ້ວທີ່ເມືອງສື່ຢຽນມົນທົນຫູເປີ່ຍທາງພາກກາງຂອງຈີນຜູ້ທີ່ຕິດຄ້າງຢູ່ທ່າມກາງກະແສນໍ້າໄດ້ ຮັບຄວາມຊ່ວຍເຫຼືອ 40 ຄົນ ໃນຈຳນວນນີ້ໄດ້ຮັບບາດເຈັບຖືກນໍາຕົວສົ່ງ ໂຮງໝໍ 9 ຄົນ ອຸທົກໄພຍັງສ້າງຄວາມເສຍຫາຍເຮັດໃຫ້ບ້ານເຮືອນເສຍຫາຍຫຼາຍສິບຫຼັງຊາວບ້ານຫຼາຍກວ່າ 2.000 ຄົນ ຕ້ອງອົບພະຍົບອອກຈາກບ້ານເຮືອນ,ຝົນທີ່ຕົກໜັກຍັງສົ່ງຜົນເຮັດໃຫ້ເກີດນໍ້າຖ້ວມຖະໜົນ ບາງສາຍ ແລະໄຟມອດໃນບາງສ່ວນຂອງເມືອງ ຊຶ່ງເຈົ້າໜ້າທີ່ກຳລັງດຳ ເນີນການຊ່ວຍເຫຼືອຢູ່ໃນຂະນະນີ້, ລັດຖະບານທ້ອງຖິ່ນປະກາດເຕືອນໄພລະດັບສີແດງ ຫຼັງຈາກພົບຄວາມສ່ຽງສູງຂອງການເກີດນໍ້າຖ້ວມກະທັນຫັນໃນຫຼາຍພື້ນທີ່, ໄພພິບັດທາງທໍລະນີວິທະຍາ ແລະແມ່ນໍ້າຖ້ວມລົ້ນ.

ທັງນີ້ຄາດວ່າພື້ນທີ່ພາກເໜືອ,ຕາເວັນອອກສຽງເໜືອ ແລະຕາເວັນຕົກສຽງໃຕ້ຂອງປະເທດຈະມີຝົນຕົກໜັກກວ່າປົກກະຕິຂະນະທີ່ພາກໃຕ້ຂອງປະເທດມີທ່າອຽງປະເຊີນກັບອາກາດຮ້ອນ ແລະແຫ້ງແລ້ງ.

 ພາບ ແລະຂາ່ວຈາກ: ໜັງສືພິມເສດຖະກິດ-ສັງຄົມ

• 09/08/2019