ທສກ ເຊກອງ ປະກອບສ່ວນປ່ອຍສິນເຊື່ອຜະລິດສິນຄ້າ ແກ້ທຸກຍາກປະຊາຊົນ

ກອງປະຊຸມໃຫຍ່ຄັ້ງທີ II ຂອງຄະນະກໍາມະບານຮາກຖານທະນາຄານສົ່ງເສີມກະສິກໍາ (ທສກ) ສາຂາແຂວງເຊກອງ ໄດ້ໄຂຂຶ້ນ ແລະສໍາເລັດລົງໃນວັນທີ 31 ກໍລະ ກົດ 2019 ໂດຍການເປັນປະທານຂອງທ່ານ ໄກ່ຍະແກ້ວ ໄຊຍະວົງ ປະທານໜ່ວຍກໍາມະບານຮາກຖານ ທສກ ສາຂາແຂວງເຊກອງ ແລະ ເຂົ້າຮ່ວມມີສະຫາຍ ວົງເດືອນ ຈັນທະບຸດຊຽງ ກໍາມະການພັກແຂວງ, ປະທານສະຫະພັນກໍາມະບານແຂວງ,ສະຫາຍ ສີໝຸກ ບຸດສິງທອງ ເລຂາໜ່ວຍພັກ, ຫົວໜ້າ ທສກ ສາຂາເຊກອງ, ນອກນີ້ ກໍມີຄະນະໜ່ວຍກໍາມະບານຮາກຖານທະນາຄານທຸລະກິດ ແລະສະມາຊິກກໍາມະບານພາຍໃນໜ່ວຍເຂົ້າຮ່ວມ.

 ກອງປະຊຸມໃຫຍ່ຄັ້ງນີ້ສະຫາຍ ໄກ່ຍະແກ້ວ ໄຊຍະວົງ ໄດ້ລາຍງານສະພາບການປະຕິບັດມະຕິກອງປະຊຸມໃຫຍ່ໃນ 3 ປີຜ່ານມາຊຶ່ງໄດ້ຍົກໃຫ້ເຫັນຜົນງານທີ່ພົ້ນເດັ່ນ ແລະ ຂໍ້ຄົງຄ້າງໃນການຈັດຕັ້ງການເຄື່ອນໄຫວວຽກງານທີ່ຜ່ານມາໂດຍສະເພາະການປະກອບສ່ວນໃນການສະໜອງສິນເຊື່ອເພື່ອການພັດທະນາພື້ນຖານໂຄງລ່າງ, ເສດຖະກິດ ແລະ ການຜະລິດເປັນສິນຄ້າຂອງປະຊາຊົນແຂວງເຊກອງໃນແຕ່ລະປີບັນລຸໄດ້ຕາມແຜນທີ່ວາງໄວ້ຊຶ່ງມາຮອດທ້າຍປີ 2018 ມີຍອດຊັບສິນທັງໝົດ 65,84 ຕື້ກວ່າກີບ ທຽບໃສ່ແຜນເທົ່າກັບ 114%; ຍອດການນໍາໃຊ້ທຶນເງິນກູ້ 18,1 ຕື້ກວ່າກີບເທົ່າ 107,79% ແລະຍອດເງິນຝາກ 59,26 ຕື້ກວ່າກີບທຽບໃສ່ແຜນປະຕິບັດໄດ້ 102,02%.

  ພ້ອມດຽວກັນນີ້ ທສກ ຍັງໃຫ້ການບໍລິການດ້ວຍຜະລິດຕະພັນຕ່າງໆເພື່ອຮັບໃຊ້ປະຊາຊົນເປັນຕົ້ນການນໍາໃຊ້ບັດ ATM, SMS, ປະກັນໄພອຸບັດເຫດ, ປະກັນໄພ ເງິນກູ້,RoadTax ຊໍາລະຄ່າທໍານຽມທາງ, EasyTax ຊໍາລະຄ່າອາກອນ, ໂອນຊໍາລະຄ່າໂທລະສັບ, ຄ່ານໍ້າປະປາ, ບໍລິການ Swift ໂອນເງິນໄປ ທສກ ປະເທດໄທ ແລະອື່ນໆ.

 ກອງປະຊຸມຍັງໄດ້ວາງທິດທາງແຜນການໃນຕໍ່ໜ້າໂດຍເລັ່ງໃສ່ຈັດຕັ້ງຜັນຂະຫຍາຍບັນດາມະຕິຂອງພັກ, ແຜນພັດທະນາເສດຖະກິດ-ສັງຄົມຂອງລັດໂດຍສະເພາະ ຂອງຄະນະພັກ-ຄະນະນໍາ ທສກ ສໍານັກງານໃຫຍ່ວາງອອກ; ໃນຂະນະດຽວກັນກອງປະຊຸມຍັງໄດ້ມີການປ່ອນບັດຄັດເລືອກເອົາຄະນະໜ່ວຍກໍາມະບານຮາກຖານ ທສກ ຊຸດໃໝ່ໂດຍສະຫາຍ ສຸກທະວີ ເສນາພັນ ເປັນປະທານ, ສະຫາຍ ນາງ ວົງສອນ ເນົາພະຈັນ ເປັນຮອງປະທານ ແລະ ສະຫາຍບຸນທັນ ສຸວັນນະສີ ເປັນຮອງ ປະທານ, ທັງເປັນປະທານກວດກາ.

ຕອນທ້າຍສະຫາຍເລຂາໜ່ວຍພັກຮາກຖານ ທສກ ສາຂາເຊກອງ ແລະສະຫາຍປະທານສະຫະພັນກໍາມະບານແຂວງໄດ້ຜັດປ່ຽນກັນມີຄໍາເຫັນໂດຍສະເພາະໃຫ້ເພີ່ມທະວີວຽກງານການເມືອງແນວຄິດ ຊຶ່ງບັນດາສະຫາຍສະມາຊິກກໍາມະບານຕ້ອງໄດ້ປະຕິບັດວິໄນຢ່າງເຂັ້ມງວດເພື່ອເຮັດໃຫ້ອົງການຈັດຕັ້ງກໍາມະບານເປັນກໍາລັງແຮງ ຂອງພັກ ແລະເພີ່ມທະວີການສໍາຫຼວດກວດກາພາຍໃນໜ່ວຍຢ່າງເປັນປົກກະຕິຕໍ່ເນື່ອງ, ເຊີດຊູບົດບາດການນໍາພາຕາມຫຼັກການລວມສູນປະຊາທິປະໄຕໂດຍສະເພາະກໍາມະບານ ທສກ ຕ້ອງຕິດພັນກັບການພັດທະນາເສດຖະກິດ-ສັງຄົມ ແລະການແກ້ໄຂຄວາມທຸກຍາກຂອງປະຊາຊົນພາຍໃນແຂວງ, ທັງນີ້ເພື່ອຈັດຕັ້ງປະຕິບັດແນວທາງປ່ຽນແປງໃໝ່ຮອບດ້ານຢ່າງມີຫຼັກການຂອງພັກໃຫ້ປະກົດຜົນເປັນຈິງ.

------------

ຂຽນໂດຍ: ສັນຍາ 

ພາບ ແລະຂ່າວຈາກ: ໜັງສິພິມເສດຖະກິດ-ສັງຄົມ

แชร์