ຄຳມ່ວນໄຂ້ຍຸງ 2,1 ພັນຄົນ

 ຄຳມ່ວນກໍ່ແມ່ນແຂວງໜຶ່ງທີ່ມີການລະບາດຂອງພະຍາດໄຂ້ເລືອດອອກ ແລະຕິດຢູ່ໃນອັນດັບທີ 5 ຂອງບັນດາແຂວງໃນທົ່ວປະເທດທີ່ເປັນພະຍາດໄຂ້ເລືອດອອກຮອດປະຈຸບັນຕົວເລກຜູ້ຕິດເຊື້ອ 2,1 ພັນຄົນ ເສຍຊີວິດ 4 ຄົນ.

  ທ່ານ ດຣ. ຖາວອນ ໄກຍະລາດ ຮອງຫົວໜ້າອໍານວຍການໂຮງໝໍແຂວງຄຳມ່ວນ, ທັງເປັນແພດຊ່ຽວຊານເດັກໄດ້ໃຫ້ຮູ້ວ່າ: ເລີ່ມແຕ່ຕົ້ນລະດູຝົນປີນີ້ມາຮອດປະຈຸ ບັນທົ່ວແຂວງຄຳມ່ວນມີຄົນເຈັບທີ່ເປັນພະຍາດໄຂ້ຍຸງລາຍ 2,1 ພັນຄົນ, ໃນນີ້ເສຍຊີວິດແລ້ວ 4 ຄົນ. ສະເພາະຄົນເຈັບທີ່ມານອນໂຮງໝໍມີ 891 ຄົນ, ໃນນີ້ເປັນເດັກ 305 ຄົນ, ຜູ້ໃຫຍ່ 586 ຄົນ, ເມືອງທີ່ພົບການລະບາດຫຼາຍກວ່າໜູ່ແມ່ນເມືອງຍົມມະລາດ, ເມືອງທ່າແຂກ ແລະເມືອງເຊບັ້ງໄຟ.

  ຕໍ່ກັບສະພາບດັ່ງກ່າວທາງພະນັກງານ-ແພດໝໍໄດ້ເອົາໃຈໃສ່ປິ່ນປົວ ແລະມີມາດຕະການຕອບໂຕ້ເປັນຢ່າງດີໂດຍໄດ້ແຕ່ງຕັ້ງຄະນະຮັບຜິດຊອບປິ່ນປົວພະຍາດໄຂ້ຍຸງລາຍປະກອບມີ 16 ທ່ານ, ຄະນະກຳມະການແຕ່ລະທ່ານໄດ້ເອົາໃຈໃສ່ປະຕິບັດຕາມໜ້າທີ່ຖືກມອບໝາຍໂດຍສະເພາະການປິ່ນປົວຄົນເຈັບທີ່ເປັນໄຂ້ຍຸງລາຍທີ່ນອນປິ່ນປົວຢູ່ຕຶກທີ່ທ່ານໝໍຮັບຜິດຊອບ,ແຕ່ລະເຊົ້າມີການລາຍງານສະພາບຂອງຄົນເຈັບທຸກມື້, ຖ້າກໍລະນີຄົນເຈັບໜັກກໍ່ໄດ້ມີການຫາລືແລ້ວລາຍງານໃຫ້ຂັ້ນເທິງຮັບຊາບ.

 ສໍາລັບຕຽງນອນຮອງຮັບຄົນເຈັບຢູ່ໂຮງໝໍຂອງພວກເຮົາແມ່ນມີພຽງພໍຕອບສະໜອງກັບປະລິມານຂອງຄົນເຈັບຊຶ່ງໄດ້ແບ່ງອອກຢ່າງລະອຽດຄື: ຕຶກພາຍໃນ I ຈາກ 28 ຕຽງນອນໄດ້ເພີ່ມຂຶ້ນອີກ 16 ຕຽງນອນ, ຕຶກປິ່ນປົວເດັກຈາກ 18 ຕຽງນອນເພີ້ມຂຶ້ນອີກ 13 ຕຽງນອນ, ມີການແບ່ງໂຊນຄົນເຈັບທີ່ມີອາການເຕືອນ ແລະບໍ່ ມີອາການເຕືອນ (ກາງ) ເພື່ອງ່າຍໃນການຕິດຕາມ.

  ກໍລະນີຄົນເຈັບເພີ່ມຂຶ້ນຫຼາຍພວກເຮົາກໍ່ຍັງມີຕຶກປິ່ນປົວຂະແໜງອື່ນທີ່ສາມາດຮອງຮັບຄົນເຈັບໄດ້ເຊັ່ນຕຶກພາຍນອກ II, ພາຍນອກ III ແລະຕຶກນອນພີ່ນ້ອງຄົນເຈັບກໍ່ສາມາດນຳໃຊ້ໄດ້.

  ໃນນາມຕາງໜ້າຄະນະອຳນວຍການໂຮງໝໍແຂວງຄຳມ່ວນທ່ານໄດ້ຮຽກຮ້ອງໃຫ້ພໍ່ແມ່ປະຊາຊົນ, ພະນັກງານທະຫານຕຳຫຼວດທຸກຄົນຈົ່ງໄດ້ມີສ່ວນຮ່ວມ, ຮ່ວມມືກັນໃນການຕ້ານ, ແກ້ໄຂບັນຫາພະຍາດໄຂ້ຍຸງລາຍເປັນເຈົ້າການໃນການກຳຈັດແຫຼ່ງເພາະພັນຂອງຍຸງລາຍເປັນປະຈຳ, ປົກກະຕິ, ນອນໃນມຸ້ງ ແລະ ເວລາລູກຫຼານເປັນໄຂ້ຫ້າມຊື້ຢາກິນເອງ, ຄວນຟ້າວມາພົບແພດຢູ່ສະຖານທີ່ບໍລິການໂຮງໝໍ ຫຼື ສຸກສາລາໃກ້ບ້ານເພື່ອຈະສະດວກໃນການປິ່ນປົວ ແລະທັນກັບສະພາບການ.

-------------

ຂຽນໂດຍ: ມະນີວັນ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์