ອັດຕະປື ສົ່ງເສີມຊາວສະໜາມໄຊ ປູກພືດກະສິກຳຕາມກົນໄກ 2+3

  ປະຕິບັດຕາມຂໍ້ຕົກລົງຂອງທ່ານເຈົ້າແຂວງສະບັບເລກທີ 1034/ຈຂອປ ລົງວັນທີ 27 ມິຖຸນາ 2019, ໃນວັນທີ 6 ສິງຫານີ້ພະແນກແຜນການ ແລະການລົງ ທຶນໄດ້ຈັດພິທີລົງນາມເຊັນສັນຍາຮ່ວມກັບບໍລິສັດສຳປະທານທີ່ດິນເຮັດໂຄງການສົ່ງເສີມປະຊາຊົນປູກພືດກະສິກຳຕາມກົນໄກ 2+3 ໃນເນື້ອທ່ີ່ດິນ 440 ເຮັກຕາ, ໄລຍະສໍາປະທານ 30 ປີ ຢູ່ເຂດບ້ານໄຊດອນໂຂງ ເມືອງສະໜາມໄຊ.

  ໂຄງການດັ່ງກ່າວແມ່ນຈະໄດ້ສົ່ງເສີມໃຫ້ປະຊາຊົນປູກພືດກະສິກຳແບບພື້ນເມືອງເຊັ່ນ: ໝາກຖົ່ວລຽນ, ໝາກນ໋ອດ, ໝາກກ້ວຍ; ໝາກສົ້ມໂອ; ໝາກມັງກອນ ແລະໝາກໄມ້ບາງຊະນິດທີ່ສາມາດເປັນສິນຄ້າ, ສຳລັບການເລີ່ມຈັດຕັ້ງປະຕິບັດໃນການບຸກເບີກແມ່ນລໍຖ້າໃບອະນຸຍາດລົງທຶນຈາກ ຄລທຂ ແລະ ຕໍ່ກັບສັນຍາຍ່ອຍລະຫວ່າງປະຊາຊົນກັບບໍລິສັດນັ້ນພະແນກກະສີກຳ-ປ່າໄມ້ຈະໄດ້ມີມາດຕາການຄຸ້ມຄອງເປັນອັນລະອຽດຕື່ມພາຍຫຼັງ.

  ຮ່ວມລົງນາມເຊັນສັນຍາການລົງທຶນຕາງໜ້າອຳນາດການປົກຄອງແຂວງມີ ທ່ານ ສຸລິຈັນ ພອນແກ້ວ ຫົວໜ້າພະແນກແຜນການ ແລະ ການລົງທຶນ, ທ່ານ ບຸນໂຮມພົມະສານ ເຈົ້າເມືອງສະໜາມໄຊ, ທ່ານ ບຸນເສີດ ເສດທິລາດ ຫົວໜ້າພະແນກກະສີກຳ ແລະປ່າໄມ້, ທ່ານ ລັດສະໜີ ວັນໄຊ ຫົວໜ້າພະແນກຊັບພະຍາກອນທຳມະຊາດ ແລະ ສິ່ງແວດລ້ອມແລະຕາງໜ້າໂຄງການມີທ່ານ ວູ ຈຽນ ຈິງ ອຳນວຍການບໍລິສັດຈຽນຕາພັດທະນາກະສິກຳຈຳກັດຜູ້ດຽວໂດຍຊ່ອງໜ້າ ທ່ານ ພອນສະໄໜ ມຽງລາວັນ ຮອງເຈົ້າ ແຂວງອັດຕະປື, ທ່ານ ສຸກສະໄໜ ຈັນທະມາດ ຮອງເຈົ້າອັດຕະປື ພ້ອມດ້ວຍຫົວໜ້າພະແນກ ແລະພະນັກງານວິຊາການທີ່ກ່ຽວຂ້ອງເຂົ້າຮ່ວມ.

---------------

ຂຽນໂດຍ: ມາລາທິບ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์