ກອງປະຊຸມອົງການປົກຄອງ ແຂວງສາລະວັນຄົ້ນຄວ້າຫຼາຍບັນຫາ

  ກອງປະຊຸມອົງການປົກຄອງ ແຂວງສາລະວັນ ຄັ້ງທີ 6 ສະໄໝທີ VIII ໄດ້ຈັດຂຶ້ນໃນວັນທີ 7 ສິງຫາ 2019 ທີ່ຫ້ອງປະຊຸມສະໂມສອນໃຫຍ່ແຂວງເປັນປະທານໂດຍທ່ານ ສີສຸວັນ ວົງຈອມສີ ເຈົ້າແຂວງໆສາລະວັນ, ມີບັນດາທ່ານຄະນະປະຈຳພັກແຂວງ,ສະພາປະຊາຊົນແຂວງສາລະວັນ, ກຳມະການພັກແຂວງ, ຫົວໜ້າ-ຮອງຈາກພະແນກການອ້ອມຂ້າງແຂວງ, ມີຫົວໜ້າ-ຮອງຫົວໜ້າຫ້ອງການຈາກ 8 ຕົວເມືອງ, ຫົວໜ້າ-ຮອງຂະແໜງການ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

  ທ່ານ ສີສຸວັນ ວົງຈອມສີ ເຈົ້າແຂວງສາລະວັນ ກໍໄດ້ມີຄຳເຫັນຕໍ່ກອງປະຊຸມ ແລະ ກ່າວເປີດກອງປະຊຸມຊຶ່ງໄດ້ເນັ້ນໜັກໃຫ້ບັນດາພະແນກການທີ່ເຂົ້າຮ່ວມກອງປະ ຊຸມຄັ້ງນີ້ຈົ່ງໄດ້ພ້ອມກັນຍົກສູງຄວາມຮັບຜິດຊອບ, ຄວາມເປັນເຈົ້າການຂອງຕົນໃນການປະກອບຄຳຄິດຄຳເຫັນຢ່າງກົງໄປກົງມາ ແລະ ພາວະວິໄສເຂົ້າໃສ່ບັນຫາສ່ວນຕ່າງໆຢ່າງມີຈຸດສຸມພ້ອມກັນຊອກທາງອອກ ແລະວິທີແກ້ໄຂໃນຕໍ່ໜ້າໃຫ້ບັນລຸຄາດໝາຍທີ່ວາງໄວ້ກໍເພື່ອພ້ອມກັນຄົ້ນຄວ້າ ແລະປຶກສາຫາລືໃນການວາງທິດທາງການເຄື່ອນໄຫວວຽກງານຮອບດ້ານ 6 ເດືອນທ້າຍປີ 2019 ໃຫ້ມີຄວາມຮັດກຸມດີຂຶ້ນກວ່າເກົ່າ.

 ໂອກາດດຽວກັນນີ້ກອງປະຊຸມໄດ້ພ້ອມກັນຮັບຟັງການລາຍງານວຽກງານທີ່ສໍາຄັນອື່ນໆອີກຈຳນວນໜຶ່ງຈາກພາກສ່ວນຕ່າງໆຂອງແຂວງເພື່ອຕີລາຄາຄືນການຈັດຕັ້ງປະຕິບັດວຽກງານປະຈຳ 6 ເດືອນຕົ້ນປີ ແລະທິດທາງແຜນການທ້າຍປີ 2019 ພ້ອມກັນນັ້ນຍັງໄດ້ຄົ້ນຄວ້າແຜນຄາດຄະເນການລົງທຶນຂອງລັດ ແລະ ການຈັດຕັ້ງປະຕິບັດລາຍຮັບລາຍຈ່າຍປະຈຳປີ 2019 ເພື່ອເປັນການກວດກາຄືນບັນຫາຕ່າງໆທີ່ໄດ້ວາງຄາດໝາຍໃນໄລຍະຜ່ານມາໂດຍສະເພາະການປະຕິບັດໂຄງການລົງທຶນຂອງລັດບໍ່ທັນໄດ້ປະຕິບັດຕາມຂັ້ນຕອນ, ການລົງທຶນຂອງລັດຍັງມີໜີ້ສິນສູງ,ການເຊົ່າ-ສໍາປະທານຍັງບໍ່ທັນປະຕິບັດຕາມສັນຍາ;ການຈັດເກັບລາຍຮັບເຂົ້າງົບປະມານບໍ່ທັນບັນລຸແຜນ,ຍັງມີພະນັກງານຈຳນວນໜຶ່ງຂາດຄວາມຮັບຜິດຊອບ, ການປະຕິບັດມາດຕະການໃນການຄວບຄຸມບັນດາໂຮງງານ, ການຊຸກຍູ້-ສົ່ງເສີມທຸລະກິດຂະ ໜາດນ້ອຍ-ກາງ, ການຄຸ້ມຄອງລາຄາສິນຄ້າຍັງເບົາບາງ, ການຜະລິດກະສິກຳເປັນສິນຄ້າ, ສ້າງຄອບຄົວຕົວແບບ, ການປູກ-ການລ້ຽງ, ການລຶບລ້າງຄວາມທຸກຍາ ກຍັງບໍ່ທັນມີຄວາມຄືບໜ້າ,ການອອກໃບຕາດິນ,ປະເມີນຜົນກະທົບສິ່ງແວດລ້ອມຕໍ່ໂຄງການເຊົ່າ-ສໍາປະທານທີ່ດິນຍັງຊັກຊ້າ,ອັດຕາການເຂົ້າຮຽນຂອງເດັກນ້ອຍເກນອາຍຸ, ຊັ້ນປະຖົມມັດທະຍົມຕົ້ນ-ປາຍ, ການຊົມໃຊ້ນໍ້າສະອາດ, ວິດຖ່າຍ, ໄຂ້ຍຸງລາຍລະບາດ, ການພັດທະນາສີມືແຮງງານ, ການດຶງດູດນັກທ່ອງທ່ຽວ ແລະບັນຫາອື່ນໆ ເພື່ອຕີລາຄາຈຸດດີຈຸດອ່ອນ ແລະບັນຫາຂໍ້ຄົງຄ້າງອື່ນໆ, ທັງສາເຫດທີ່ພາໃຫ້ຄົງຄ້າງແນໃສ່ວາງທິດທາງການເຄື່ອນໄຫວໃນຕໍ່ໜ້າໃຫ້ໄດ້ຮັບການຈັດຕັ້ງປະຕິບັດຢ່າງຕໍ່ເນື່ອງ ແລະໄດ້ຮັບຜົນດີຂຶ້ນກວ່າເກົ່າ.

  ກອງປະຊຸມຄັ້ງນີ້ຈະໄດ້ດຳເນີນຮອດວັນທີ 9 ສິງຫາ 2019 ຈິ່ງຈະໄດ້ສໍາເລັດ. 

------------

ຂຽນ: ກິນດາວັນ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์