ມວຍມິດຕະພາບ ລາວ-ໄທ ກຽມແຂ່ງຂັນ ສະຫຼອງວັນສ້າງຕັ້ງກອງທັບ

 ການແຂ່ງຂັນຊົກມວຍມິດຕະພາບລາວ-ໄທ ຫຼື ລາຍການມວຍດີວິທີໄທສັນຈອນຈະຂຶ້ນຊົກກັນ 4 ມື້ລຽນຕິດລະຫວ່າງວັນທີ 17-20 ມັງກອນ 2019 ນີ້ທີ່ສັງວຽນມວຍຊົ່ວຄາວແຂວງສາລະວັນເພື່ອສ້າງຂະບວນການສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວຄົບຮອບ 70 ປີ ແລະ ສົ່ງເສີມສິລະປະແມ່ໄມ້ມວຍລາວເປັນທີ່ຮູ້ຈັກໃຫ້ມວນຊົນໃນທົ່ວໂລກ.

  ຕາມການໃຫ້ສຳພາດຂອງທ່ານ ຈີລະ ຊະນະວົງໄຊ ຫົວໜ້າສະໂມສອນມວຍລຸ້ງໂລດເມື່ອວັນທີ 10 ມັງກອນ ຜ່ານມາໃຫ້ຮູ້ວ່າ: ເພື່ອເປັນການສ້າງບັນຍາກາດໃຫ້ທົ່ວພັກ, ທົ່ວລັດ ແລະທົ່ວປວງຊົນລາວທັງຊາດເວົ້າລວມເວົ້າສະເພາະແມ່ນປະຊາຊົນບັນດາເຜົ່າຊາວ ແຂວງສາລະວັນມີຄວາມເບີກບານມ່ວນຊື່ນເພື່ອສ້າງຂະບວນການສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວຄົບຮອບ 70 ປີ ຢ່າງມີບັນຍາກາດຟົດຟື້ນ ແລະ ສົ່ງເສີມສິລະປະແມ່ໄມ້ມວຍລາວເປັນທີ່ຮູ້ຈັກໃຫ້ມວນຊົນໃນທົ່ວໂລກພ້ອມນັ້ນຍັງເປັນການດຶງດູດນັກທ່ອງທ່ຽວໃຫ້ເຂົ້າມາທ່ຽວລາວຫຼາຍຂຶ້ນກວ່າເກົ່າ. ດັ່ງນັ້ນ, ໃນລະຫວ່າງວັນທີ 17-20 ມັງກອນ ນີ້ສະໂມສອນມວຍລຸ້ງໂລດສົມທົບກັບແຂວງສາລະວັນ ຈະຈັດ ການແຂ່ງຂັນມວຍມິດຕະພາບ ລາວ-ໄທ ຫຼື ລາຍການມວຍດີວິທີໄທສັນຈອນຂຶ້ນເຖິງ 4 ມື້ລຽນຕິດຈະຈັດແຂ່ງຂັນມື້ລະ 9 ຄູ່ ສະນັ້ນ, ຂໍຮຽກຮ້ອງມາຍັງແຟນມວຍຊາວແຂວງດັ່ງກ່າວມາຕິດຕາມຊົມ ແລະ ເຊຍຢ່າງມ່ວນຊື່ນນຳກັນທີ່ສັງວຽນມວຍຊົ່ວຄາວແຫ່ງນີ້ເນັ້ນແຂ່ງຂັນໃນລະບົບມືອາຊີບແສງສີສຽງ ແລະ ນັກຊົກລາວ-ໄທສີມືດີລະດັບມືອາຊີບຂຶ້ນສັງວຽນຟາດຄາງກັນມ່ວນມັນເດືອດແນ່ນອນ.

ທ່ານ ຈີລະ ຊະນະວົງໄຊ ບອກຕື່ມອີກວ່າ: ສຳລັບໂປຣແກຣມແຂ່ງຂັນຄູ່ມວຍມັນມວຍເດືອດໃນ 4 ວັນດັ່ງກ່າວແມ່ນຈະເລີ່ມແຂ່ງຂັນເວລາ 18:30 ໂມງເປັນຕົ້ນໄປໂດຍສ່ວນໃຫຍ່ຈະມີຄູ່ນັກມວຍໄທປະທະກັນເອງຫຼາຍທີ່ສຸດເພາະນັກມວຍລາວເຂດນັ້ນຈະມີໜ້ອຍສະນັ້ນຈຶ່ງຈັດໃຫ້ເປັນການເອົາໃຈແຟນມວຍທັງໄທ ແລະລາວໄດ້ມ່ວນມັນເຕັມທີ່ໂດຍສະເພາະຄູ່ ມວຍລາວ-ໄທ ທີ່ຈະຂຶ້ນຊົກກັນມື້ທຳອິດວັນທີ 17 ມັງກອນ 2019 ສະເພາະມວຍລາວ-ໄທ ມີພຽງ 1 ຄູ່ ປະກອບມີເຊຍເພັດໂບ້ສຳໂລງ (ໄທ) ພົບກັບຕະວັນ ສ. ສາລະວັນ (ລາວ) ໃນຮຸ່ນນໍ້າໜັກ 50 ກິ ໂລກຣາມ, ວັນທີ 18 ມັງກອນ 2019 ມວຍລາວ-ໄທມີ 2 ຄູ່ໃນລາຍການ ສຳລັບຄູ່ທີ 1 ສະຫຼາມບຸກ ສປປ ລາວ ພົບກັບດາມ່ອນແມ່ນໍ້າສອງສີ (ໄທ) ໃນຮຸ່ນນໍ້າໜັກ 65 ກິໂລ ກຣາມ ແລະຄູ່ທີ 2 ມວຍຮອງຄູ່ເອກຊາດສະໄໝ ສປປ ລາວ ພົບກັບເມືອງທອງ ສັນທານີ (ໄທ) ໃນຮຸ່ນນໍ້າໜັກ 60 ກິໂລກຣາມ.

  ສ່ວນວັນທີ 19 ມັງກອນ 2019 ມວຍລາວ-ໄທມີ 1 ຄູ່ ແລະລາວຕີກັນເອງ ມີ 4 ຄູ່ ປະກອບມີຄູ່ທີ 1 ແລມໂບ້ຈິ່ວ ສ.ແສນເມືອງຈຳປາ ສັກພົບກັບເພັດສີມອກ ສ.ເຊກອງ ໃນຮຸ່ນນໍ້າໜັກ 51 ກິໂລກຣາມ, ຄູ່ ທີ 2 ເພັດຊໍ່ຟ້າ ສ.ເຊກອງພົບກັບດາວເດັ່ນ ສ.ສາລະວັນ ໃນຮຸ່ນນໍ້າ ໜັກ 46 ກິໂລກຣາມ, ຄູ່ທີ 3 ເພັດ ສອງຟາກ ສິດຄູເຕື່ອນ (ໄທ) ພົບກັບສົມດີ ສ.ຈະເລີນສິງ ນະຄອນຫຼວງວຽງຈັນ (ລາວ) ໃນຮຸ່ນນໍ້າ ໜັກ 61 ກິໂລກຣາມ, ຄູ່ທີ 4 ຍອດ ເລົ່າງາມ  ສ.ສາລະວັນ ພົບກັບອັດຕະໄຊ ສ. ອະໄພມະນີຈຳປາສັກ ໃນຮຸ່ນນໍ້າໜັກ 58 ກິໂລກຣາມ ແລະ ຄູ່ທີ 5 ເພັດຂວັນໄຊ ສ.ເຊກອງ ພົບກັບເພັດອາລຸນ ສິດຫົງຄຳ ສະຫວັນນະເຂດ ໃນຮຸ່ນນໍ້າໜັກ 55 ກິໂລກຣາມ ແລະ ວັນທີ 20 ມັງ ກອນ 2019 ມວຍລາວຕີກັນເອງມີ 5 ຄູ່ ປະກອບມີຄູ່ທີ 1 ເດັ່ນ ໜອງໂກ່ມສິດຄູຕອງ  ສະຫວັນນະ ເຂດພົບກັບເພັດຮຸ່ງເຮືອງສິດຊຽນ  ນິຍົມຈຳປາສັກ ໃນຮຸ່ນນໍ້າໜັກ 44 ກິໂລກຣາມ, ຄູ່ທີ 2 ເຈົ້າເວຫາສິດຄູຕອງພົບກັບເພັດຈຳປາ ສ. ເຊກອງ ໃນຮຸ່ນນໍ້າໜັກ 50 ກິໂລ ກຣາມ, ຄູ່ທີ 3 ເພັດຂວັນເຂົ້າສິດຄູອ໋ອດພົບກັບເພັດສະຫວັນຂວັນໃຈເຊໂນໃນຮຸ່ນນໍ້າໜັກ 55 ກິໂລກຣາມ, ຄູ່ທີ 4 ມົນດຳສິດຄູຕອງພົບກັບແລມໂບ້ເຫຼັກ ສ. ແສນເມືອງຈຳປາສັກໃນຮຸ່ນນໍ້າໜັກ 49 ກິໂລກຣາມ ແລະຄູ່ທີ 5 ກ້າວໜ້າ ສ. ສາລະວັນ ພົບກັບສູ້ຊົນສິດຄູແຫຼ້ ນະຄອນຫຼວງວຽງຈັນ ໃນຮຸ່ນນໍ້າໜັກ 65  ກິໂລກຣາມ.

แชร์