ດີເຄ ຄອງແຊ້ມ ບານເຕະຊິງແຊ້ມ ສປ ຈີນ ຄັບ 2019

   ຂຸນພົນນັກເຕະເຍົາວະຊົນ ລາວ ຮຸ່ນອາຍຸບໍ່ເກີນ 14 ປີ ຫຼື ຢູ-14 ສະໂມສອນ ດີເຄ ເອັບຊີ ຖະຫຼົ່ມເອົາຊະນະທິມເສີນໂຈບີ ໄປແບບຂາດຮອຍ 8-0 ປະຕູ ນັດສຸດທ້າຍຂອງຮອບ 4 ທິມ ເກັບໄຊ ຊະນະ 3 ນັດຊ້ອນ ມີ 9 ຄະແນນ ເຕັມພ້ອມທັງສ້າງສະຖິຕິໃໝ່ໃນ ການເຂົ້າຮ່ວມງານດັ່ງກ່າວທີ່ສາມາດເອົາຊະນະທຸກທິມຈາກ 6 ນັດທັງຮອບຄັດເລືອກ ແລະຮອບຮອງ ດ້ວຍການຍິງປະຕູໄປແບບຖະຫຼົ່ມຖະລາຍ ແລະເສຍປະຕູພຽງໜ່ວຍໜ້ອຍທີ່ສຸດຄອງແຊ້ມການ  ແຂ່ງຂັນບານເຕະຮຸ່ນເຍົາວະຊົນ ຢູ-14 ຊິງແຊ້ມ ສປ ຈີນ ທີ່ເມືອງ ຣີຈາວ ສປ ຈີນ ໄປຄອງ.

ຕາມການລາຍງານຂອງທ່ານວິສອນ ພັນທະວົງຮອງປະທານ ສະໂມສອນ ດີເຄ ເອັບຊີ ໃຫ້ຮູ້ວ່າ:ການແຂ່ງຂັນນັດສຸດທ້າຍຂອງ ຮອບ 4 ທິມ ລະຫວ່າງທິມຢູ-14 ດີເຄ ພົບກັບທິມເສີນໂຈບີ ໃນຄັ້ງນີ້ໄດ້ມີຂຶ້ນໃນຕອນເຊົ້າວັນທີ 5 ສິງຫາ ຜ່ານມາ ທີ່ສະໜາມເມືອງຣີ ຈາວ ສປ ຈີນ ກໍເປັນໄປຕາມຄາດ  ຢູ-14 ດີເຄ ສາມາດຖະຫຼົ່ມເອົາ ຊະນະທິມເສີນໂຈບີ ໄປແບບຂາດຮອຍ  8-0  ປະຕູ  ເກັບໄຊຊະນະເປັນ ນັດທີ 3 ຕິດຕໍ່ກັນມີ 9 ຄະແນນ ເຕັມຄອງແຊ້ມການແຂ່ງຂັນລາຍການດັ່ງກ່າວໄປຄອງຢ່າງສົມສັກ ສີ ສ່ວນທີ 2 ຕົກເປັນຂອງທິມ ເສີນໂຈ ເອ ແຂ່ງຂັນ 3 ນັດ ຊະ ນະ 2 ນັດ ແລະເສຍ 1 ນັດ ມີ 6 ຄະແນນ, ທີ 3 ທິມສົງສິ້ງ ແຂ່ງຂັນ 3 ນັດ ຊະນະ 1 ນັດ ແລະເສຍ 2 ນັດມີ 3 ຄະແນນ ແລະທີ 4 ທິມ ເສີນໂຈ ບີ ລົງສະໜາມ 3 ນັດເສຍ 3 ນັດບໍ່ມີຈັກຄະແນນ.

ສຳລັບຜົນງານຂອງຂຸນພົນນັກເຕະເຍົາວະຊົນດີເຄຕາງໜ້າເຍົາວະຊົນລາວ ເຂົ້າຮ່ວມແຂ່ງຂັນລາຍການດັ່ງກ່າວໃນຮອບຄັດເລືອກຖືກຈັດຢູ່ກຸ່ມເອຖະຫຼົ່ມເອົາຊະນະ ທິມເສີນໂຈ ເອ 10-0 ປະຕູ,ຖະຫຼົ່ມກວນເຊິນ 17-0 ປະຕູ ແລະຊະນະເຈົ້າພາບທິມຣີຈາວ 6-1 ປະຕູ ເກັບໄຊ 3 ນັດລວດ ມີ 9 ຄະແນນເຕັມເປັນອັນດັບທີ 1 ຂອງກຸ່ມ ເອ ຜ່ານເຂົ້າຮອບຮອງຊະນະເລີດທີ່ກຳນົດການແຂ່ງຂັນແບບພົບກັນໝົດ  ແລະຢູ-14  ດີເຄ ກໍຍັງຮັກ ສາຟອມເກັ່ງສາມາດເອົາຊະນະ ທິມສົງສິ້ງວ້າຍກົວຢູເສ້ຍສ້ຽວ 9-0 ປະຕູ ແລະຊະນະທິມເສີນ ໂຈ (ທິມເອ) 7-0  ປະຕູ ມີ 6 ຄະແນນ ຍັງເຫຼືອຄິວລົງສະໜາມນັດສຸດທ້າຍຊະນະທິມເສີນໂຈ ບີ 8-0 ປະຕູ.

ການແຂ່ງຂັນລາຍການນີ້ມີ ການຊິງໄຊກັນເຖິງ 7 ຮຸ່ນ ກໍຄື: ຢູ-7, ຢູ-8, ຢູ-9, ຢູ-10, ຢູ-11, ຢູ-12 ແລະຢູ-14 ຊິງແຊ້ມ ສປ ຈີນໂດຍມີ 81 ທິມເຂົ້າຮ່ວມ, ໃນນັ້ນສະໂມສອນ ດີເຄ ເອັບຊີ ຕາງໜ້າ ສປປ ລາວ ສົ່ງເຂົ້າຮ່ວມແຂ່ງຂັນລາຍການດັ່ງກ່າວພຽງຮຸ່ນດຽວ ຮຸ່ນອາຍຸບໍ່ເກີນ 14 ປີ ໂດຍມີ 8 ພາກສ່ວນເຂົ້າຮ່ວມແບ່ງອອກເປັນ 2 ກຸ່ມ ໂດຍ ດີເຄ ຖືກຈັດຢູ່ກຸ່ມ A ຮ່ວມກັບເສິນໂຈວ, ກວນເຊິນ ແລະເຈົ້າພາບຣີຈາວ. ສ່ວນກຸ່ມ B ເຈີງ ໂຈວຈົງເສ້ຍ, ຢື້ຈາວຊິນຍິງຈົງ, ຢື້ນຈາວຫຼຽນຕ້າ ແລະສົງສິ້ງວ້າຍ ກົວຢູເສ້ຍສ້ຽວແຕ່ລະກຸ່ມແຂ່ງຂັນ ພົບກັນໝົດຄັດເອົາທີ 1-2 ຜ່ານ ເຂົ້າໄປຫຼິ້ນໃນຮອບຕໍ່ໄປ.

ພາບ  ແລະຂາ່ວຈາກ: ໜັງສືິພິມເສດຖະກິດ-ສັງຄົມ

แชร์