ນະຄອນຫຼວງ ສາມາດຄວບຄຸມພະຍາດອະຫິວາໝູໄດ້ແລ້ວ

  ພາຍຫຼັງທີ່ນະຄອນຫຼວງວຽງຈັນ ມີການລະບາດຂອງພະຍາດອະຫິວາໝູໃນເຂດບ້ານນາສ້ຽວ ເມືອງນາຊາຍທອງ ໃນຕົ້ນເດືອນກໍລະກົດຜ່ານມາຈຳນວນ 110 ໂຕ, ໃນນັ້ນຕາຍເອງ 96 ໂຕ ແລະ ຂ້າຖິ້ມ 14 ໂຕ, ຊຶ່ງເປັນສາຍພັນໝູປ່າລ້ຽງແບບປ່ອຍໃນສວນ ແລະປະຈຸບັນນະຄອນຫຼວງສາມາດຄວບຄຸມໄດ້ແລ້ວ, ພ້ອມດຽວກັນນີ້, ກໍຍັງບໍ່ທັນມີພົບການຕິດເຊື້ອໃນເຂດອື່ນຕື່ມ.

  ທ່ານ ຫຼ້າສາຍ ນວນທາສິງ ຫົວໜ້າພະແນກກະສິກຳ ແລະປ່າໄມ້ນະຄອນຫຼວງວຽງຈັນ ໃຫ້ສຳພາດໃນທ້າຍອາທິດຜ່ານມາຮູ້ວ່າ: ສະເພາະການລ້ຽງໝູໃນນະຄອນ ຫຼວງວຽງຈັນ ມີທັງໝົດ 2 ແສນກວ່າໂຕ, ໃນນັ້ນມີຟາມລ້ຽງໝູ 186 ຟາມ ມີໝູທັງໝົດ 1,85 ແສນໂຕ, ໃນເດືອນໜຶ່ງສາມາດຜະລິດໝູຊີ້ນໄດ້ 29,80 ພັນໂຕ, ຄິດໄລ່ເປັນຊີ້ນ 1,93 ພັນໂຕນຕໍ່ເດືອນ ແລະໝູລ້ຽງຂອງຄອບຄົວ 14,07 ພັນໂຕ, ຜະລິດຊີ້ນໄດ້ 2,42 ພັນໂຕ, ໃຫ້ຊີ້ນຕໍ່ເດືອນ ແມ່ນ 157,8 ໂຕນ, ລວມທັງໝົດໃນເດືອນຜະລິດໝູຊີ້ນໄດ້ 32,23 ພັນໂຕ ຕໍ່ເດືອນ ແລະຄິດໄລ່ເປັນຊີ້ນ 2,09 ພັນໂຕນຕໍ່ເດືອນ.

 ຊຶ່ງພາຍຫຼັງໄດ້ຮັບແຈ້ງມີການລະບາດຂອງພະຍາດອະຫິວາໝູຢູ່ບ້ານນາສ້ຽວ,ເມືອງນາຊາຍທອງ,ທາງພະແນກໄດ້ສົ່ງໜ່ວຍງານສະເພາະກິດລົງເກັບກຳຕົວຢ່າງ ແລະ ພົບວ່າມີການລະບາດແທ້, ໂດຍໝູທີ່ຕິດເຊື້ອເປັນສາຍພັນໝູປ່າທີ່ລ້ຽງປ່ອຍຢູ່ສວນໃນຈຳນວນ 110 ກວ່າ ໂຕ, ໃນນັ້ນຕາຍເອງ 96 ໂຕ ແລະລະດົມໃຫ້ເຈົ້າຂອງໝູຂ້າຖິ້ມອີກ 14 ໂຕ, ໂດຍລວມແລ້ວມາຮອດປະຈຸບັນການລະບາດຂອງພະຍາດດັ່ງກ່າວແມ່ນສາມາດຄວບຄຸມໄດ້ແລ້ວ. 

  ເພື່ອເປັນການປ້ອງກັນ, ຄວບຄຸມ ແລະ ເຝົ້າລະວັງ, ນະຄອນຫຼວງໄດ້ວາງມາດຕະການປ້ອງກັນໂດຍສະເພາະກຳນົດເອົາຈຸດກໍລະນີພົບເຊື້ອພະຍາດດັ່ງກ່າວຢູ່ບ້ານນາສ້ຽວເປັນຈຸດເຝົ້າລະວັງແບບເຄັ່່ງຄັດລັດສະໝີແດງ 1-5 ກິໂລແມັດ ເປັນເຂດເຝົ້າລະວັງຕິດຕາມ,ພ້ອມທັງເຂັ້ມງວດໃນການກວດກາການນຳເຂົ້າໝູຢູ່ 3 ຈຸດຊາຍແດນລະຫວ່າງນະຄອນຫຼວງວຽງຈັນຕໍ່ແຂວງ ຕົ້ນຕໍເສັ້ນທາງເລກທີ 13 ເໜືອ, ເສັ້ນທາງເລກທີ 13 ໃຕ້, ເສັ້ນທາງເລກທີ 10 ແລະເສັ້ນທາງເລກທີ 11 ຄື: ຈຸດເມືອງນາຊາຍທອງ, ເມືອງສັງທອງ ແລະຈຸດເມືອງປາກງື່ມ,ເພີ່ມຈຸດກວດກາຢູ່ເມືອງໄຊທານີ ອີກ 1 ຈຸດ ແລະກວດກາຈຸດທີ່ມີຄວາມສ່ຽງລວມທັງເຂັ້ມງວດກວດກາໂຮງງານຂ້າສັດ, ຈຸດ ຂ້າສັດຍ່ອຍ, ສະຖານທີ່ຈຳໜ່າຍໝູເປັນ, ຕະຫຼາດສົດ, ຮ້ານຄ້າ, ສາງເຢັນ ແລະທີ່ ສຳຄັນ ໃນການນຳເອົາໝູເຂົ້າຂ້າ ແມ່ນໄດ້ ຖືເອົາມາດຖານຂອງການກວດກາຮັບ ຮອງເອົາຄຸນນະພາບຊີ້ນກ່ອນເຂົ້າສູ່ຕະຫຼາດເປັນບັນຫາສຳຄັນ ໂດຍສະເພາະ ໂຮງງານຂ້າສັດ ຊຶ່ງຕ້ອງແຈ້ງກ່ອນ 15 ວັນ ເພື່ອໃຫ້ໜ່ວຍງານທີ່ກ່ຽວຂ້ອງ ເຂົ້າໄປກວດກາກ່ອນ, ສະເພາະຈຸດທີ່ມີການລະບາດນັ້ນມາຮອດປະຈຸບັນພວກເຮົາໄດ້ມີການຂ້າໝູ, ສິດຢາຂ້າເຊື້ອແລ້ວ 3 ຄັ້ງ ແລະພວມຕິດຕາມອີກ 3 ເດືອນຈຶ່ງຈະມີການປະເມີນຄືນກ່ຽວກັບເຊື້ອພະ ຍາດຕາຍ ຫຼືຍັງ ແລະໃນໄລຍະນີ້ເຂດທີ່ມີການລະບາດແມ່ນເດັດຂາດຈະບໍ່ອະນຸ ຍາດໃຫ້ລ້ຽງສັດອື່ນ.

 ທ່ານ ຫຼ້າສາຍ ນວນທາສິງ ໃຫ້ຮູ້ຕື່ມວ່າ: ຈາກກໍລະນີພົບການລະບາດພະຍາດອະຫິວາໝູອາຟຣິກາຢູ່ບ້ານນາສ້ຽວຕາມການລົງສຳຫຼວດເຫັນວ່າມີກຸ່ມບໍລິໂພກຈຳນວນໜຶ່ງຢຸດກິນຊີ້ນໝູ 5-10%, ແຕ່ສ່ວນຫຼາຍກໍບໍ່ໄດ້ຕື່ນຕໍ່ຂ່າວສະພາບ ດັ່ງກ່າວ, ທັງພາກລັດກໍບໍ່ໄດ້ນິ່ງນອນໃຈ ກ່ອນໜ້ານີ້ໄດ້ຖະແຫຼງຂ່າວໄປແລ້ວວ່າພະຍາດດັ່ງກ່າວ ບໍ່ໄດ້ຕິດໃສ່ຄົນ, ແຕ່ອັດຕາການບໍລິໂພກຊີ້ນແມ່ນຫຼຸດລົງ ໃນໄລຍະ ທຳອິດ ແລະບາງຟາມທີ່ຢ້ານກົວກໍໄດ້ມີການເທຂາຍໝູອອກ, ເຮັດໃຫ້ລາຄາຊີ້ນໝູມີການສັ່ນຄອນເລັກນ້ອຍ, ສ່ວນລາຄາຊີ້ນໝູຈະມີການປັບຂຶ້ນ ຫຼື ບໍ່ນັ້ນພາຍຫຼັງທີ່ພະຍາດດັ່ງກ່າວນີ້ຢຸດຕິລົງ,ໂດຍບັນຫາດັ່ງກ່າວນີ້ຖ້າມີການຄວບຄຸມໄດ້ແຕ່ຫົວທີອາດຈະບໍ່ມີຜົນກະ ທົບຕໍ່ລາຄາຊີ້ນໝູ, ປະຈຸບັນລາຄາສິນຄ້າຕາມທ້ອງຕະຫຼາດກໍມີການເໜັງຕິງຢູ່ແລ້ວເນື່ອງຈາກອີງໃສ່ຫຼາຍປັດໄຈທີ່ປິ່ນອ້ອມ.

----------------

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์